InfoHub Logo

الماتىداعى Burger King مەيرامحانالار جەلىسىنە قاتىستى تەكسەرۋ اياقتالدى. بۇل تەكسەرۋ جەلى قىزمەتكەرى قاراتاي الىبەكتىڭ ارىزى نەگىزىندە باستالعان بولاتىن. مەملەكەتتىك ەڭبەك ينسپەكسياسى دەپارتامەنتى جۇرگىزگەن جوسپاردان تىس تەكسەرۋ كەزىندە، ارىزدانۋشىنىڭ ايتقاندارى راستالدى.

بۇل تۋرالى Infohub.kz اقپارات اگەنتتىگى حابارلايدى.

ەڭبەك زاڭناماسىنىڭ بۇزىلۋى

جۇرگىزىلگەن تەكسەرۋ بارىسىندا جۇمىس بەرۋشىنىڭ (ج ش س "QSR") قىزمەتكەرلەردىڭ جالاقىسىنان كەلىسىمسىز اقشالاي ۇستالىمدار جاساعانى، جالاقىنى جۇيەلى تۇردە كەشىكتىرگەنى، ناقتى جۇمىس ىستەگەن ۋاقىتىن ەسەپكە الماعانى جانە مەرەكە كۇندەرى مەن دەمالىس كۇندەرى ءۇشىن جوعارى مولشەردە اقى تولەمەگەنى انىقتالدى. سونداي-اق، اۋىسىم كەستەلەرى قىزمەتكەرلەرگە زاڭمەن بەلگىلەنگەن مەرزىمدەردى بۇزا وتىرىپ جەتكىزىلگەن.

كومپانيا قىزمەتكەرلەردى قاجەتتى ارنايى كيىممەن جانە جەكە قورعانىس قۇرالدارىمەن قامتاماسىز ەتپەگەنى، سونداي-اق قىزمەتكەرلەردى ەڭبەك قاۋىپسىزدىگى بويىنشا مىندەتتى نۇسقاۋلىقتاردان وتكىزبەي جۇمىسقا جىبەرگەنى دە بەلگىلى بولدى.

قانداي شارالار قولدانىلادى؟

تەكسەرىس ناتيجەسىندە ج ش س "QSR"-گە انىقتالعان بارلىق بۇزۋشىلىقتاردى مىندەتتى تۇردە جويۋ تۋرالى نۇسقاۋلىق بەرىلدى. زاڭ بۇزۋشىلىقتار بويىنشا ق ر اكىمشىلىك قۇقىق بۇزۋشىلىق كودەكسىنىڭ 87، 93 جانە 94-باپتارى بويىنشا اكىمشىلىك ءىس قوزعالدى. ەڭبەك قۇقىقتارى تولىق قالپىنا كەلتىرىلىپ، بەرىلگەن نۇسقاۋلىقتار ورىندالعانعا دەيىن جاعداي مەملەكەتتىك ەڭبەك ينسپەكتورلارىنىڭ باقىلاۋىندا بولادى.

بۇعان دەيىن اقپارات قۇرالدارىندا Burger King Kazakhstan جەلىسىندەگى جاعدايعا بايلانىستى داۋ تۋىنداعان بولاتىن. الەۋمەتتىك جەلىدەگى جازبالار قوعامدا كەڭىنەن تالقىلانىپ، كومپانيا باسشىلىعىنا قاتىستى نارازىلىقتار ايتىلعان ەدى. وسى جاعدايدان كەيىن كومپانيا ىشكى تەكسەرۋ جۇرگىزىپ، ەكى شەتەلدىك باسشىنى جۇمىستان بوساتقان بولاتىن.