InfoHub Logo

بىرىككەن ۇلتتار ۇيىمىنىڭ ادام قۇقىقتارى جونىندەگى جوعارعى كوميسسارى فولكەر تيۋرك يرانداعى ءولىم جازالارى سانىنىڭ كۇرت ارتۋىنا الاڭداۋشىلىق ءبىلدىردى. ونىڭ مالىمەتىنشە، 2025 جىلدىڭ العاشقى جارتىجىلدىعىندا ەلدە كەمىندە 612 ادام ءولىم جازاسىنا كەسىلىپ، ۇكىم ورىندالعان. بۇل — وتكەن جىلدىڭ سايكەس كەزەڭىمەن سالىستىرعاندا ەكى ەسەگە كوپ كورسەتكىش.

بۇۇ وكىلى يران بيلىگىن ءولىم جازاسىنا موراتوريي ەنگىزۋگە جانە بۇل جازانى قولدانۋدى شەكتەۋگە شاقىردى. فولكەر تيۋرك بۇل تەندەنسيانى "ادام قۇقىقتارىنا تىكەلەي ءقاۋىپ توندىرەتىن قۇبىلىس" دەپ اتاپ، حالىقارالىق نورمالارعا ساي كەلمەيتىنىن مالىمدەدى.

ادام قۇقىقتارىن قورعاۋ ۇيىمدارى دا يراندا ءولىم جازاسىنىڭ ءجيى قولدانىلۋى كوبىنە ءادىل سوتسىز نەمەسە ازاپتاۋ ارقىلى الىنعان ايعاقتارعا نەگىزدەلەتىنىن ايتىپ كەلەدى. ءولىم جازاسىنا كەسىلگەندەردىڭ كوپشىلىگى ەسىرتكىمەن بايلانىستى ايىپتار بويىنشا، كەيبىرى ساياسي نەمەسە ءدىني سەبەپتەرمەن سوتتالعان.

بۇۇ دەرەكتەرىنە سۇيەنسەك، 2024 جىلدىڭ العاشقى التى ايىندا يراندا 300-گە جۋىق ادام ءولىم جازاسىنا كەسىلگەن. ال 2025 جىلى بۇل كورسەتكىش ەكى ەسەگە ءوسىپ وتىر. ۇيىم بۇل جاعدايدى حالىقارالىق قۇقىقتىڭ ورەسكەل بۇزىلۋى دەپ باعالايدى.

حالىقارالىق قاۋىمداستىقتىڭ يران بيلىگىنە قىسىمى كۇشەيىپ كەلەدى. الايدا رەسمي تەگەران ءولىم جازاسىن ەلدىڭ ىشكى ءىسى جانە زاڭمەن بەلگىلەنگەن جازا رەتىندە قورعاپ كەلەدى.