InfoHub Logo

قازاقستاندا ۆيسە-پرەزيدەنت قىزمەتى قايتا ەنگىزىلەدى دەگەن جاڭالىق ەلدە قىزۋ تالقىلاۋ تۋدىردى. وسىعان وراي، ەكس-پرەزيدەنت نۇرسۇلتان نازاربايەۆتىڭ ۇلكەن قىزى داريعا نازاربايەۆانىڭ ساياساتقا ورالىپ، بۇل قىزمەتكە كەلۋى مۇمكىن دەگەن بولجامدار الەۋمەتتىك جەلىدە تاراۋدا. اتالعان ماسەلەگە قاتىستى ءماجىلىس دەپۋتاتتارى پىكىر ءبىلدىردى.

بۇل تۋرالى Infohub.kz اقپارات اگەنتتىگى حابارلايدى.

دەپۋتاتتاردىڭ جاۋابى

ءماجىلىس دالىزىندە جۋرناليستەردىڭ ساۋالىنا جاۋاپ بەرگەن دەپۋتات ابزال قۇسپان الەۋمەتتىك جەلىدەگى پىكىرلەردىڭ الۋان ءتۇرلى ەكەنىن اتاپ ءوتتى. ونىڭ ايتۋىنشا، ول مۇنداي بولجامدارعا قاتىستى ەشقانداي نۇسقانى راستامايدى جانە جوققا شىعارمايدى. "شىنىمدى ايتايىن، مەندە ۇمىتكەرگە قاتىستى ەشقانداي نۇسقا جوق. ءدال سول ايتىلعان كىسى لايىقتى دەپ ويلامايمىن"، - دەدى ول.

ءوز كەزەگىندە، دەپۋتات ايدوس سارىم داريعا نازاربايەۆانى "سۇيكىمسىز ساياساتكەر" دەپ اتاپ، ونىڭ ءداۋىرى الدەقاشان ءوتىپ كەتكەنىن جەتكىزدى.

ۆيسە-پرەزيدەنت ينستيتۋتى

ايتا كەتەيىك، 20 مامىردا پارلامەنت "پرەزيدەنت تۋرالى" كونستيتۋسيالىق زاڭدى ەكىنشى وقىلىمدا قابىلدادى. بۇل زاڭ بويىنشا قازاقستان رەسپۋبليكاسىنىڭ ۆيسە-پرەزيدەنتى ينستيتۋتى ەنگىزىلىپ، ونىڭ قۇقىقتىق جاعدايى ايقىندالادى. مەملەكەت باسشىسىنىڭ تاپسىرماسىمەن ۆيسە-پرەزيدەنت قۇرىلتايمەن، ۇكىمەتپەن جانە وزگە دە مەملەكەتتىك ورگاندارمەن ءوزارا ىس-ارەكەت جاسايتىن بولادى.

داريعا نازاربايەۆا 2022 جىلدىڭ 25 اقپانىندا ءماجىلىس دەپۋتاتى رەتىندە وكىلەتتىگىن توقتاتقان بولاتىن. سودان بەرى ول قوعامدىق-ساياسي ومىردەن بەلسەندى تۇردە كورىنبەي، كوپشىلىك نازارىنان تىس قالدى.