InfoHub Logo

اقش-تىڭ دەنۆەر حالىقارالىق اۋەجايىندا جولاۋشىلار ۇشاعىنىڭ ۇشۋ جولاعىنداعى ادامدى قاعىپ كەتۋى سالدارىنان قايعىلى وقيعا بولدى. Frontier Airlines اۋە كومپانياسىنا تيەسىلى Airbus A321 ۇشاعى لوس-اندجەلەس باعىتىندا ۇشۋعا دايىندالىپ جاتقاندا، جولاقتا جۇرگەن ادامدى باسىپ وزدى.

بۇل تۋرالى Infohub.kz اقپارات اگەنتتىگى حابارلايدى.

وقيعا 8 مامىر كۇنى كەشكى ۋاقىتتا تىركەلگەن. سوققىدان ادام سول جەردە قازا تاپتى. سونىمەن قاتار، ۇشاق قوزعالتقىشىندا قىسقا ۋاقىتقا ءورت شىققانى حابارلاندى. ءورت ءسوندىرۋ قىزمەتى جالىندى تەز ارادا جويدى.

ۇشاقتا 224 جولاۋشى مەن 7 ەكيپاج مۇشەسى بولعان. وقيعانىڭ اۋىرلىعىن سەزىنگەن ۇشقىشتار رەيستى توقتاتۋ تۋرالى شەشىم قابىلدادى.

ەكيپاج بەن ديسپەچەر ديالوگى

الەۋمەتتىك جەلىدە ەكيپاج بەن ديسپەچەر اراسىنداعى بايلانىس جازباسى تارادى. وندا ۇشقىش:

«ديسپەچەر، Frontier 4345. ءبىز ۇشۋ جولاعىندا توقتاپ تۇرمىز… ءبىز بىرەۋدى قاعىپ كەتتىك… قوزعالتقىشتا ءورت شىقتى»، – دەپ حابارلاعان. كەيىن ەكيپاج كومانديرى ۇشاق ىشىندە ءتۇتىن پايدا بولعانىن ايتىپ، جولاۋشىلاردى شۇعىل ەۆاكۋاسيالاۋ قاجەتتىگىن جەتكىزدى.

بورتتاعى ادامدار ۇرلەمەلى تراپتار ارقىلى ۇشۋ جولاعىنا ءتۇسىرىلىپ، ارنايى اۆتوبۋستارمەن تەرمينالعا جەتكىزىلدى. الدىن الا مالىمەتتەر بويىنشا، ءبىر جولاۋشى جەڭىل جاراقات العان. ۇشاقتاعى بارلىق ادام مەديسينالىق تەكسەرۋدەن ءوتتى.

تەرگەۋ باستالدى

Frontier Airlines كومپانياسى وقيعانىڭ سەبەپ-سالدارىن انىقتاۋ ءۇشىن اۋەجاي اكىمشىلىگىمەن جانە قاۋىپسىزدىك قىزمەتتەرىمەن بىرلەسىپ جۇمىس ىستەپ جاتقانىن مالىمدەدى. قازىرگى تاڭدا دەنۆەر پوليسياسى مەن اقش-تىڭ ۇلتتىق كولىك قاۋىپسىزدىگى كەڭەسى تەرگەۋ جۇرگىزىپ جاتىر. ماماندار ادامنىڭ ۇشۋ جولاعىنا قالاي كىرىپ كەتكەنىن انىقتاۋ ءۇشىن اۋەجاي اۋماعىنداعى قورشاۋلار مەن قاۋىپسىزدىك جۇيەسىن مۇقيات تەكسەرۋدە.