InfoHub Logo

الەمگە تانىمال قازاقستاندىق ءانشى ديماش قۇدايبەرگەن ونەردەگى جاڭا قادام جاساپ، پروديۋسەرلىك قىرىنان كورىنەتىن بولدى. بۇل تۋرالى ءانشى ءوزىنىڭ الەۋمەتتىك جەلىسىندەگى پاراقشاسىندا قۋانىشتى جاڭالىعىمەن ءبولىستى.

بۇل تۋرالى Infohub.kz اقپارات اگەنتتىگى حابارلايدى.

جاڭا جوبا: الەمدىك ارەناعا جاڭا ەسىمدەر

ديماش قۇدايبەرگەن ەندى ءوزىنىڭ مول تاجىريبەسىن جاس ارتىستەرگە ۇيرەتىپ، ولاردى حالىقارالىق دەڭگەيدە تانىتۋدى ماقسات ەتەدى. ونىڭ العاشقى پروديۋسەرلىك جوباسى رەتىندە «Voice Beyond Horizon» بايقاۋىنىڭ جەڭىمپازى نۇرجاس سادىربايەۆ تانىستىرىلدى. بۇل تۋرالى ءانشى بىلاي دەپ جازدى:

«دوستار، ءبىر جاڭالىقپەن بولىسكىم كەلىپ وتىر: Hunan TV ارناسىنداعى «Voice Beyond Horizon» جوباسىنىڭ العاشقى جەڭىمپازى — نۇرجاس سادىربايەۆتى پروديۋسەرىم رەتىندە قاراماعىما الدىم. مەن 15 جىلعا جۋىق مانسابىمدى حالىقارالىق بايقاۋلاردان باستاپ الەم بويىنشا جەكە كونسەرتتەرگە دەيىن ءارتىس رەتىندە ۇزاق جولدان ءوتتىم. ەندى سول تاجىريبەممەن ءبولىسىپ، ەلىمىزدىڭ اتىنان ازيادان امەريكا قۇرلىعىنا دەيىنگى الەمدىك ارەنالاردا ونەر كورسەتەتىن ءارتىس دايىندايتىن كەز كەلدى!»

بىرلىك پەن قولداۋ – تابىستىڭ كىلتى

ديماش قۇدايبەرگەن جاس ارتىستەرگە قولداۋ كورسەتۋدىڭ ماڭىزدىلىعىن اتاپ ءوتتى. ونىڭ ايتۋىنشا، بۇل جولداعى باستى كۇش – بىرلىك پەن ءوزارا سەنىم.

«وسى جولداعى باستى كۇشىمىز — ءبىزدىڭ قولداۋىمىز بەن بىرلىگىمىز. بۇگىن ستۋدياداعى بىرلەسكەن جۇمىسىمىزدىڭ كورىنىسىن العاش رەت ۇسىنعالى وتىرمىن. ءان رەسمي تۇردە الداعى اپتادا جارىق كورەدى. استانا ۋاقىتى بويىنشا ساعات 17:00-دە مەنىڭ YouTube ارنامدا كەزدەسەمىز. كەزدەسكەنشە»، - دەپ قورىتىندىلادى ءانشى.