InfoHub Logo

قازاق مادەنيەتى الەمگە تانىلۋدا. بۇل جولى چيلي تۇرعىنى ماريا مۋنوس دومبىرادا شەبەر ويناپ، قازاق اندەرىن شىرقاپ، كوپشىلىكتى تاڭ قالدىردى. ول قازاقستاندا تۋماسا دا، دومبىرانى مەڭگەرىپ، قازاق اندەرىن ورىنداۋعا دەگەن قۇشتارلىعىن ينتەرنەت ارقىلى جۇزەگە اسىردى.

بۇل تۋرالى Infohub.kz اقپارات اگەنتتىگى حابارلايدى.

ىزگىلىك ىزدەرى

ماريا مۋنوس دومبىرانى العاش رەت ديماش قۇدايبەرگەننىڭ ورىنداۋىندا كورىپ، قىزىعۋشىلىق تانىتقان. ول ديماشتىڭ دومبىرادا ويناعانىن كورىپ، قازاق مادەنيەتىمەن تەرەڭىرەك تانىسۋعا بەل بۋدى. «ديماش ارقىلى دومبىراعا اۋەس بولدىم. ول وتە تالانتتى، وسى الەممەن تانىستىرعانى ءۇشىن راحمەت!» دەيدى ول.

ەكى جىلدىق ىزدەنىس

ماريا ەكى جىل بويى دومبىرانى ءوز بەتىنشە ۇيرەنىپ كەلەدى. YouTube ارقىلى بەينەساباقتار كورىپ، قۇلاققا سالىپ ۇيرەنەدى. ول دومبىرادا ويناۋدىڭ قيىندىعىن مويىندايدى، اسىرەسە، بۇرىن-سوڭدى بۇل اسپاپتى ۇستاماعان ادام ءۇشىن. كۇندەلىكتى جاتتىعۋلار بىرنەشە ساعاتقا سوزىلىپ، ساۋساقتارىندا ءىزىن قالدىرادى. «مەن YouTube-تەگى بەينەلەردى كورىپ، قۇلاققا سالىپ ۇيرەنەمىن. دومبىرادا ويناۋ – بۇل اسپاپپەن تانىس ەمەس ادامدار ءۇشىن قيىن. Dombyra Soft باعدارلاماسىن دا قولدانامىن»، – دەيدى ماريا.

جۇرەكتى تەربەيتىن اندەر

ماريانىڭ رەپەرتۋارىنان اقان سەرىنىڭ اتاقتى «بالقاديشا» ءانى دە ورىن العان. بۇل ءاندى ورىنداۋ وعان ۇلكەن سىناق بولدى. «بۇل ءاندى بىرنەشە اي بويى كوز جاسىمدى باسەڭدەتە الماي ايتتىم. بۇل ءاننىڭ تاريحىنداعى تەرەڭ قايعىنى سەزىندىم. ورىنداۋ وڭاي بولمادى، ءبىراق بۇل ءان سونشالىقتى ادەمى بولعاندىقتان، مەن ونى مىندەتتى تۇردە ايتۋىم كەرەك ەدى»، – دەپ ءبولىستى ول.

سونىمەن قاتار، ماريانىڭ ورىنداۋىندا ديماش قۇدايبەرگەننىڭ «سامالتاۋ» جانە «قاراتورعاي» اندەرى، «مۋزارت» توبىنىڭ «ءۇشقوڭىر» كومپوزيسياسى، «كوڭىل تولقىنى» كۇيى جانە باسقا دا تۋىندىلار بار.

جەلىدەگى اسەر

ماريانىڭ بەينەجازبالارى استىندا جۇزدەگەن پىكىرلەر قالدىرىلعان. ولاردىڭ قاتارىندا قازاقستاندىقتاردان بولەك، باسقا دا ەلدەردىڭ وكىلدەرى بار. «ناعىز قازاقشا وينايسىڭ، جانىڭدى سالىپ وينايسىڭ!»، «قانداي كەرەمەت ورىنداۋ! راحمەت، ماريا حانىم»، «براۆو! براۆيسيمو!»، «تالابىڭا نۇر جاۋسىن، ديماش فان-كلۋبىنىڭ ۇزدىك وكىلىسىڭ!» – دەپ جازادى كورەرمەندەر.

ماريانىڭ ءوزى ايتقانداي، ول اندەردى تانىمالدىلىق ءۇشىن ەمەس، مۋزىكانى، سوزدەرىن جانە ءار ءاننىڭ تاريحىن سۇيگەندىكتەن جازادى. «مەنىڭ جۇمىسىمدى ادامدار جاقسى كورەدى، ولار ءارقاشان جاقسى پىكىرلەر قالدىرىپ، مەنى جالعاستىرۋعا شاقىرادى. مەن ءوزىمدى شىنىمەن باقىتتى سەزىنەمىن»، – دەيدى ول.

قازاقستانمەن بايلانىس

قازاق مادەنيەتىن زەرتتەۋ بارىسىندا ماريانىڭ قازاقستاندا كوپتەگەن دوستارى پايدا بولدى. ولار اتىراۋداعى دومبىرا اكادەمياسىنىڭ شاكىرتتەرى مەن ۇستازدارى، سونداي-اق مارياعا ارناپ دومبىرا جاساعان شەبەر ەراسىل ادىلبەكوۆ. «ۋاقىت ايىرماشىلىعىنا بايلانىستى ءجيى سويلەسە المايمىز، ءبىراق ءاردايىم بايلانىستامىز. قازاقستانعا جانە قازاقتار ءۇشىن قاسيەتتىنىڭ بارىنە دەگەن تەرەڭ قۇرمەت پەن سۇيىسپەنشىلىك ءبىزدىڭ قارىم-قاتىناسىمىزدىڭ نەگىزى»، – دەيدى ول.

ول ءتىپتى قازاقستاندىق وقۋشىلارمەن بەينەبايلانىس ارقىلى سويلەسىپ، بىرگە جاتتىعادى.

قازاقستانعا ساياحات – ارمانى

ماريا ءالى قازاقستاندا بولماعان، ءبىراق ساياحات جوسپارىن جاساپ قويعان. ونىڭ تىزىمىندە استانا مەن الماتى عانا ەمەس، باسقا دا قالالار بار. «وكىنىشكە وراي، مەن قازاقستاندا بولعان ەمەسپىن. ءبىراق مەن كوپتەگەن تاريحي ورىنداردى، مۇراجايلاردى، سونداي-اق ۇلتتىق ساياباقتار مەن الماتى، استانا، قىزىلوردا جانە قاتونقاراعاي سياقتى قالالاردى ارالاعىم كەلەدى»، – دەپ ءبولىستى ول.

ازىرگە ول قازاق مادەنيەتىن زەرتتەۋدى جالعاستىرۋدا، ناعىز مۋزىكا مەن داستۇرگە دەگەن قۇرمەتتىڭ شەكاراسى جوق ەكەنىن دالەلدەپ كەلەدى.