InfoHub Logo

رەسەيدىڭ تاتارستان رەسپۋبليكاسىنداعى «درۋجبا» مۇناي قۇبىرىنىڭ «كالەيكينو» ستانسياسىنا دروندار شابۋىلداپ، ءورت شىقتى. بۇل جاعداي قازاقستاننىڭ مۇناي ەكسپورتتىق باعىتتارىنا اسەر ەتە مە دەگەن سۇراقتار تۋدىردى. قازاقستان ەنەرگەتيكا مينيسترلىگى بۇل وقيعانىڭ ەلدىڭ مۇناي تاسىمالىنا ەشقانداي اسەر ەتپەگەنىن ناقتىلادى.

بۇل تۋرالى Infohub.kz اقپارات اگەنتتىگى حابارلايدى.

«كالەيكينو» ستانسياسىنداعى جاعداي

المەتيەۆسك قالاسىندا 23 اقپانعا قاراعان ءتۇنى «كالەيكينو» مۇناي ايداۋ ستانسياسىندا ءورت بولدى. جەرگىلىكتى تۇرعىندار بىرنەشە جارىلىس ەستىگەنىن ايتتى. اكىمدىكتىڭ مالىمەتىنشە، ءورت درونداردىڭ سىنىقتارى قۇلاعاننان كەيىن ونەركاسىپتىك ايماقتا باستالعان. قازا تاپقاندار مەن زارداپ شەككەندەر جوق.

«كالەيكينو» ستانسياسى «ترانسنەفت» جۇيەسىندەگى ەڭ ءىرى ستانسيالاردىڭ ءبىرى. ول ءارتۇرلى ايماقتاردان مۇناي قابىلداپ، ونى ارالاستىرىپ، ساقتاپ، ءارى قاراي ماگيسترالدى مۇناي قۇبىرلارىنا جىبەرەدى. بۇل باعىتتاردىڭ ءبىرى – ەۋروپاعا ەكسپورتتالاتىن «درۋجبا» مۇناي قۇبىرىنا كەتەدى.

مينيسترلىكتىڭ رەسمي مالىمدەمەسى

قازاقستان ەنەرگەتيكا مينيسترلىگى تاتارستانداعى وقيعانىڭ ەلدىڭ مۇناي تاسىمالىنا اسەر ەتپەگەنىن حابارلادى.

«تاتارستانداعى وقيعاعا بايلانىستى مينيسترلىك حابارلايدى: بۇل جاعداي قازاقستاندىق مۇناي تاسىمالداۋ پروسەسىنە اسەر ەتكەن جوق. جۇك جونەلتۋشىلەردەن شيكىزاتتى قابىلداۋ جانە ماگيسترالدى مۇناي قۇبىرلارى جۇيەسى بويىنشا ونى ءارى قاراي ايداۋ بەكىتىلگەن كەستەگە سايكەس شتاتتىق رەجيمدە جۇزەگە اسىرىلۋدا. قازاقستاندىق مۇنايدىڭ ءترانزيتى نەمەسە ەكسپورتى بويىنشا قانداي دا ءبىر شەكتەۋلەر تىركەلگەن جوق»، - دەلىنگەن مينيسترلىكتىڭ حابارلاماسىندا.

قازاقستاننىڭ مۇنايى «كالەيكينو» ستانسياسىمەن تىكەلەي بايلانىستى بولماعانىمەن، ول وسى جۇيە ارقىلى وتەدى. اتىراۋ – سامارا قۇبىرىمەن رەسەيگە جەتكەن شيكىزات «ترانسنەفت» ماگيسترالدىق جەلىسىنە ءتۇسىپ، ءارتۇرلى باعىتتارعا بولىنەدى. «كالەيكينو» وسى جۇيەنىڭ ماڭىزدى توراپتارىنىڭ ءبىرى بولىپ سانالادى.

بۇرىنعى وقيعالار مەن بالاما جولدار

بۇعان دەيىن قازاقستان سىرتقى ىستەر مينيسترلىگى قارا تەڭىز تەرمينالىنا بارا جاتقان ءۇش تانكەرگە جاسالعان شابۋىلدارعا قاتىستى الاڭداۋشىلىق بىلدىرگەن بولاتىن. سونداي-اق، قىزىل تەڭىزدەگى جاعدايعا بايلانىستى قازاقستاننىڭ كاسپيي قۇبىر جەلىسى كونسورسيۋمى (كاسپييسكيي ترۋبوپروۆودنىي كونسورسيۋم - كتك) ارقىلى مۇناي ەكسپورتتاۋ كولەمى قاڭتار ايىندا 45 پايىزعا ازايعان ەدى.

وسى ماسەلەلەرگە بايلانىستى قازاقستان مۇناي جەتكىزۋ باعىتتارىن وزگەرتۋگە ءماجبۇر بولدى.