InfoHub Logo

ەكىباستۇز قالاسىندا ەكى ماس ازامات ەمدەلۋشىنىڭ دوسى رەتىندە قالالىق اۋرۋحانانىڭ قابىلداۋ بولىمىنە كەلىپ، مەديسينا قىزمەتكەرلەرىنە قول جۇمسادى. شابۋىل سالدارىنان دارىگەر مەن مەدبيكە جاراقات الىپ، اۋرۋحاناعا جاتقىزىلدى. پوليسيا كۇدىكتىلەردى ۇستادى.

بۇل تۋرالى Infohub.kz اقپارات اگەنتتىگى حابارلايدى.

وقيعانىڭ ءمان-جايى

12 ساۋىردە ەكىباستۇز قالالىق اۋرۋحاناسىنىڭ قابىلداۋ بولىمىنە جاق سۇيەگىنەن جاراقات العان ەر ادام كەلگەن. ونىمەن بىرگە ەكى جولداسى بولعان، ۇشەۋى دە ماس كۇيدە بولعان.

دارىگەر تەكسەرۋ كەزىندە ولاردىڭ بىرەۋىنەن كابينەتتەن شىعىپ تۇرۋىن وتىنگەن. الايدا، ول باس تارتپاي، اگرەسسيۆتى مىنەز تانىتىپ، ءتىپتى دورەكى سوزدەر ايتىپ، مامانداردىڭ جۇمىسىنا كەدەرگى كەلتىرگەن.

كابينەتتەن كەتۋ تۋرالى قايتا ايتىلعان تالاپتان كەيىن جانجال ۋشىعا ءتۇستى. ەر ادامداردىڭ ءبىرى ەسىكتى يتەرىپ اشىپ، ەسىك دارىگەردىڭ باسىنان سوعىلعان. تراۆماتولوگ دەبوشيرلەردى سىرتقا شىعارۋعا تىرىسقاندا، ولار قارسىلىق كورسەتكەن.

«ەر ادامدار دارىگەردىڭ باسى مەن دەنەسىنە بىرنەشە رەت سوققى جاسادى. العان جاراقاتتارى سالدارىنان دارىگەر ەسىنەن تانىپ قالدى. ارىپتەسىن قورعاماق بولعان مەديسينالىق مەيىربيكە دە شابۋىلداۋشىلاردىڭ قولىنان زارداپ شەگىپ، دەنە جاراقاتتارىن الدى»، - دەدى وقيعا كۋاسى.

پوليسيانىڭ مالىمدەمەسى

پاۆلودار وبلىستىق پوليسيا دەپارتامەنتىنىڭ باسپا ءسوز قىزمەتى مەديسينا قىزمەتكەرلەرىنە قاتىستى زورلىق-زومبىلىق فاكتىسى بويىنشا قىلمىستىق ءىس قوزعالعانىن حابارلادى.

«وقيعا ورنىنا جەدەل جەتكەن پوليسيا قىزمەتكەرلەرى سول جەردە ءۇش كۇدىكتىنى ۇستادى. ونىڭ ەكەۋى ۋاقىتشا ۇستاۋ يزولياتورىنا قامالدى، ال بىرەۋى پوليسيانىڭ باقىلاۋىندا ارنايى پالاتاعا ورنالاستىرىلدى»، - دەپ ءبولىستى وبلىستىق پد وكىلدەرى.

پوليسيا وقيعانىڭ بەينەجازباسىن جاريالادى. كادرلاردا ءبىر ەر ادامنىڭ دارىگەردى قۇلاتىپ، اۋرۋحانا الدىندا سوققىعا جىققانى كورىنەدى. زارداپ شەككەن مەديسينا قىزمەتكەرلەرى جاراقاتتارىمەن اۋرۋحاناعا جاتقىزىلدى.

پوليسيا مەديسينا قىزمەتكەرلەرى مەن جەدەل قىزمەتتەرگە قاتىستى زورلىق-زومبىلىققا «مۇلدەم توزبەۋشىلىك» قاعيداتىن ۇستاناتىنىن اتاپ ءوتتى.