InfoHub Logo

ەكىباستۇز قالاسىنداعى جەكە ۇيدەن ەكى ادامنىڭ مۇردەسى تابىلعان قايعىلى وقيعاعا قاتىستى جاڭا مالىمەتتەر جاريالاندى. الدىن الا بولجام بويىنشا، مارقۇمداردىڭ ءبىرى ەكى جىلداي، ەكىنشىسى بىرنەشە ايداي ءۇي ىشىندە جاتقان.

بۇل تۋرالى Infohub.kz اقپارات اگەنتتىگى حابارلايدى.

تۇرعىنداردى دارىگەرلەر الاڭداتقان

وقيعانىڭ ءمان-جايىنا ۇڭىلسەك، الدىمەن مەديسينا قىزمەتكەرلەرى الاڭداۋشىلىق بىلدىرگەن. سەبەبى، ءبىر پاسيەنت بەلگىلى ءبىر ۋاقىت بويى تەكسەرىسكە كەلمەگەن. كەيىن بۇل اقپارات ءتيىستى ورگاندارعا جەتكىزىلگەن.

كورشىلەر نە دەيدى؟

كورشىلەردىڭ ايتۋىنشا، بۇرىن بۇل وتباسى قالىپتى ءومىر سۇرگەن، ارالاسىپ-قۇرالاسىپ تۇرعان. الايدا، سوڭعى ۋاقىتتا ءۇي يەسى ايەل ادام مۇلدەم ەشكىمدى كىرگىزبەي، وزىنە-وزى تىعىلىپ قالعان.

«قالىپتى وتباسى ەدى، جاقسى ارالاساتىنبىز، ءبىر-بىرىمىزدىڭ ۇيىمىزگە باراتىنبىز. سوڭعى كەزدە مۇلدەم ەشكىمدى كىرگىزبەي قويدى. «كۇيەۋىڭىزدى، ساشا اعامدى كوپتەن كورمەدىك» دەيمىز. ەشتەڭە ايتپايدى. سوڭعى كەزدە مۇلدەم تانىمايتىن بولدىق»، - دەيدى كورشىسى وميرتاي ءشارىپجانوۆ.

ءۇي يەسىنىڭ قاسىنداعى ءۇيدى جالداپ تۇراتىن تۋىس اپكەسى دە بۇل جاعدايدان حابارسىز بولىپ شىقتى. جەرگىلىكتى تۇرعىنداردىڭ سوزىنشە، ەكى ايەلدىڭ اراسىنداعى قارىم-قاتىناس مۇلدەم بولماعان.

بالانىڭ جاعدايى

وقيعا ورىن العان ۇيدە ايەلدىڭ نەمەرەسى، التى جاسار قىز بالا بولعان. ول بىرنەشە كۇن بويى مايقايىڭ اۋرۋحاناسىندا تەكسەرىستەن ءوتتى.

«ءقازىر بالانىڭ پسيحوەموسيونالدى جاعدايى تۇراقتى. وعان تەك ماماندار عانا ەمەس، بالا پسيحولوگى دا كومەك كورسەتەدى. بەلگىلى ءبىر ۋاقىتتان كەيىن بارلىق راسىمدەردى ساقتاي وتىرىپ، بالا ەكىباستۇز قالاسىنىڭ بالالار قولداۋ ورتالىعىنا ورنالاستىرىلادى»، - دەدى بالالار قۇقىعىن قورعاۋشى ساۋلە شاكەنوۆا.

ءۇي يەسى ايەل ادامنىڭ جاعدايىن باعالاۋ ءۇشىن پسيحياتريالىق اۋرۋحاناعا جەتكىزىلدى.

پوليسيا نە دەيدى؟

وبلىستىق پوليسيا دەپارتامەنتى قىلمىستىق ءىس قوزعالعانىن حابارلادى. قازىرگى تاڭدا جاعدايدى انىقتاۋ ءۇشىن قاجەتتى تەرگەۋ ارەكەتتەرى جۇرگىزىلىپ جاتىر.