InfoHub Logo

ەگيپەتتىڭ ەجەلگى پيراميدالارى مەن تاريحي جادىگەرلەرى ءالى دە كوپتەگەن قۇپيالاردى جاسىرىپ كەلەدى. جاقىندا يتاليالىق زەرتتەۋشى فيليپپو بيوندي گيزە پلاتوسىنىڭ استىنان ەكىنشى سفينكس ءمۇسىنى تابىلۋى مۇمكىن دەگەن بولجام ايتتى. بۇل جاڭالىق الەمدىك ارحەولوگيا قاۋىمداستىعىندا قىزۋ تالقىلاۋ تۋدىرۋدا.

بۇل تۋرالى Infohub.kz اقپارات اگەنتتىگى حابارلايدى.

ءبيونديدىڭ ايتۋىنشا، سپۋتنيكتىك راديولوكاسيالىق سكانەرلەۋ جۇمىستارى قۇمنىڭ استىندا ءىرى، سيممەتريالى قۇرىلىمنىڭ بارىن كورسەتكەن. ول بۇل جاڭالىقتى Matt Beall Limitless پودكاستىندا جاريالادى.

ەسكى جازبالار مەن جاڭا دەرەكتەر

زەرتتەۋشىنىڭ بۇل بولجامىنا نەگىز بولعان فاكتورلاردىڭ ءبىرى – مىسىر پەرعاۋىنى تۋتموس IV كەزىندە (شامامەن ءبىزدىڭ زامانىمىزعا دەيىنگى XIV عاسىر) جاسالعان «ءتۇس ستەلاسى». بۇل ستەلادا ەكى سفينكسكە ۇقساس بەينەلەر بار. بيوندي مۇنى ەكىنشى ءمۇسىننىڭ بار ەكەندىگىنىڭ بەلگىسى دەپ سانايدى.

بۇعان دەيىن ەگيپتولوگ باسسام ەل-شامماا دا وسىنداي پىكىر بىلدىرگەن بولاتىن. الايدا، مىسىردىڭ بۇرىنعى كونە جادىگەرلەر ءمينيسترى زاحي حاۆاسس بۇل ايماقتىڭ مۇقيات زەرتتەلگەنىن جانە ەكىنشى ءمۇسىننىڭ بار ەكەنىنە ەشقانداي دالەل تابىلماعانىن ايتقان ەدى.

عالىمدار نە دەيدى؟

ءبيونديدىڭ جاڭا راديولوكاسيالىق دەرەكتەرى پلاتوداعى توبەلەردىڭ ءبىرىنىڭ استىندا تىك شاحتالار مەن جولدارى بار ءىرى قۇرىلىمنىڭ بار ەكەنىن كورسەتەدى. بۇل قۇرىلىم بەلگىلى سفينكستىڭ استىنداعى قۇرىلىمدارعا ۇقساس كورىنەدى.

دەگەنمەن، ارحەولوگتار بۇل قورىتىندىلاردى ازىرگە مويىنداماي وتىر. پيراميدالار استىندا جاسىرىنعان «مەگاقۇرىلىمداردىڭ» بار ەكەندىگى قازبا جۇمىستارىمەن راستالماعان جانە بۇل ءالى دە دالەلدەنبەگەن گيپوتەزا بولىپ سانالادى.

ايتا كەتەيىك، ەگيپەتتە لۋكسورداعى سفينكستەر اللەياسى سياقتى كىشىرەك مۇسىندەر دە بار. زەرتتەۋشىلەر مەرزىم-مەرزىم قۇم استىندا جاتقان «ەكىنشى» سفينكستەر تۋرالى گيپوتەزالار ۇسىنىپ وتىرادى، ءبىراق رەسمي تۇردە تەك بىرەۋى – اتاقتى ۇلكەن سفينكس بار ەكەنى راستالعان.