InfoHub Logo

الماتىدا وتكەن Fashion Week Almaty ءسان اپتالىعى بيىل تەك ديزاينەرلىك توپتامالارىمەن عانا ەمەس، ەرەكشە قوناقتارىمەن دە ەستە قالدى. سولاردىڭ ءبىرى – تانىمال تەلەجۇرگىزۋشى ءارى مەديامەنەدجەر ءلايلا سۇلتان قىزى. ول كۇتپەگەن جەردەن پوديۋمعا مودەل رەتىندە شىعىپ، كوپشىلىكتى تاڭعالدىردى.

كورسەتىلىمنەن كەيىن ءلايلا سۇلتان قىزى الەۋمەتتىك جەلىدەگى پاراقشاسىندا ءوزىنىڭ جاڭا قىرىنان كورىنۋدەن قورىقپاۋ كەرەكتىگىن جەتكىزگەن اسەرلى جازبا جاريالادى. «ەلۋگە كەلىپ ەسىردى دەمەڭىز، ەركىنسىدىم»، – دەپ جازدى ول. بۇل سوزدەرىمەن ءلايلا سۇلتان قىزى كەز كەلگەن جاستا ءوزىڭدى جاڭا باعىتتا سىناپ كورۋدىڭ ماڭىزىن اتاپ ءوتتى.

كەشتىڭ ەرەكشە ساتتەرىنىڭ ءبىرى – كورەرمەندەر زالىندا تۇسىرىلگەن بەينە. وندا تەلەجۇرگىزۋشىنىڭ اناسى قىزىنىڭ پوديۋمداعى ءجۇرىسىن تولقىپ تاماشالاپ وتىرعانى كورىنەدى. اناسىنىڭ مەيىرىمگە تولى كوزقاراسى مەن ىشكى قۋانىشى جەلى قولدانۋشىلارىنىڭ جۇرەگىن ەلجىرەتىپ، ەرەكشە اسەر قالدىردى.

بۇعان دەيىن ءلايلا سۇلتان قىزى الەۋمەتتىك جەلىدەگى پاراقشاسىندا جەكە ومىرىنە قاتىستى جازبا جاريالاپ، وزىنە باعىتتالعان سىن-پىكىرلەرگە جاۋاپ بەرگەن بولاتىن. سونداي-اق ول «قازاقستان» ارناسىنداعى «1001 ءتۇن» باعدارلاماسىندا قوناق بولىپ، جەكە ءومىرى مەن وتباسى تاقىرىبىنا قاتىستى پىكىر بىلدىرگەن ەدى.

ءلايلا سۇلتان قىزى تۋرالى

ءلايلا سۇلتان قىزى – قازاقستانداعى بەلگىلى جۋرناليست، تەلەجۇرگىزۋشى جانە مەديامەنەدجەر. ول 1977 جىلدىڭ 8 جەلتوقسانىندا شىمكەنت قالاسىندا دۇنيەگە كەلگەن. جوعارى ءبىلىمىن ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە الىپ، كاسىبي جولىن وسى سالادا قالىپتاستىردى.

ەڭبەك جولىن 1997 جىلى «شاھار» تەلەراديوكومپانياسىندا تەلەجۇرگىزۋشى رەتىندە باستاپ، كەيىن پروديۋسەر قىزمەتىنە دەيىن كوتەرىلدى. 2003-2006 جىلدارى «حيت تۆ» ارناسىنا جەتەكشىلىك ەتىپ، مەديامەنەدجمەنت باعىتىندا تاجىريبە جيناقتادى.

2008 جىلدان باستاپ قازاقستان تەلەراديوكورپوراسياسى جۇيەسىندە ءتۇرلى قىزمەت اتقارىپ، ءبىرقاتار جوبالاردىڭ پروديۋسەرى بولدى. سونىمەن قاتار «Kazmedia Mobile» كومپانياسىنىڭ باس ديرەكتورى قىزمەتىن اتقاردى. 2012 جىلى «بالاپان» تەلەارناسىنا باسشىلىق ەتىپ، بالالارعا ارنالعان ساپالى كونتەنتتىڭ دامۋىنا ۇلەس قوستى.

ءلايلا سۇلتان قىزى «ايەل باقىتى» توك-شوۋىنىڭ اۆتورى ءارى جۇرگىزۋشىسى رەتىندە كەڭىنەن تانىلىپ، قازاق مەديا كەڭىستىگىندە كاسىبي شەبەرلىگىمەن ەرەكشەلەندى. ونىڭ ەڭبەگى مەملەكەت تاراپىنان جوعارى باعالانىپ، 2015 جىلى «قازاقستان مادەنيەت سالاسىنىڭ ۇزدىگى» اتاعىنا، ال 2016 جىلى «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىنا يە بولدى.

بۇل تۋرالى Infohub.kz اقپارات اگەنتتىگى حابارلايدى.