InfoHub Logo

تانىمال ءانشى ماقپال يسابەكوۆا جەكە ومىرىنە قاتىستى تىڭ مالىمدەمە جاسادى. ونەر يەسى تەلەجۇرگىزۋشى دينارا ءساتجانعا بەرگەن سۇحباتىندا بۇرىنعى كۇيەۋىمەن اجىراسقانىن العاش رەت ايتىپ بەردى.

بۇل تۋرالى Infohub.kz اقپارات اگەنتتىگى حابارلايدى.

اجىراسۋدىڭ سەبەبى مەن ۋاقىتى

ءانشىنىڭ ايتۋىنشا، ولار بىلتىر اقپان ايىندا رەسمي تۇردە اجىراسقان. قازىرگى ۋاقىتتا ەكەۋى بىر-بىرىمەن سويلەسپەيدى. «ءبىر جاعىنان بار، ەكىنشى جاعىنان جوق. شىنىندا، بۇل وتە سيمۆوليكالىق جاعداي. ومىرىمدەگى ۇلكەن وقيعالاردىڭ ءبارى – العاشقى جۇكتىلىگىم، تۇرمىسقا شىعۋ تۋرالى ۇسىنىس – ءبارى 14 اقپاندا بولعان. ال 14 اقپاندا مەن سىزدەرگە ءوزىمدى ەركىن ايەل ەكەنىمدى جاريالادىم. ماحاببات حيكايالارىنىڭ ءبارى ادەمى باستالادى عوي. ەشكىم تۇرمىسقا شىعاردا اجىراسامىن دەپ ويلامايدى»، – دەدى ول.

نەلىكتەن كۇيەۋىن كوپشىلىككە كورسەتپەدى؟

سونىمەن قاتار ماقپال يسابەكوۆا بۇرىنعى كۇيەۋىنىڭ نەلىكتەن كوپشىلىككە كورسەتىلمەگەنىن ءتۇسىندىردى. «ماعان جازىلۋشىلارىم ۇنەمى “نەگە كۇيەۋىڭىزدىڭ ءجۇزىن كورسەتپەيسىز؟” دەپ جازاتىن. ءبىراق ول ادام كوپشىلىك الدىندا بولۋدى قالامادى، بۇل – ونىڭ قۇقىعى. مەن ونىڭ تاڭداۋىن قۇرمەتتەدىم»، – دەيدى ءانشى.

قارىم-قاتىناستاعى قيىندىقتار

ونەر يەسى بۇرىنعى كۇيەۋىمەن ارادا تۇسىنىسپەۋشىلىكتەر بولعانىن دا جاسىرمادى. «مەن ادەتتە كەز كەلگەن اداممەن ورتاق ءتىل تابىسا الامىن. بىرەۋمەن تانىسۋ، سويلەسۋ مەن ءۇشىن قيىن ەمەس. ءبىراق ءدال كۇيەۋىممەن قارىم-قاتىناستا قيىندىق بولدى. بىزدە ديالوگ جوق، تۋرا ماعىناسىندا دا، اۋىسپالى ماعىناسىندا دا. ءبىز سويلەسە المايمىز»، – دەدى ءانشى.