InfoHub Logo

2000 جىلداردىڭ باسىندا اتىراۋ وبلىسىنداعى جاس بالانىڭ ەرتە قارتايىپ بارا جاتقانى تۋرالى جاڭالىق كوپشىلىكتى ەلەڭ ەتكىزگەن ەدى. سيرەك كەزدەسەتىن تەرىنىڭ ەرتە قارتايۋى (پروگەريا) دەرتىنە شالدىققان نۇرجان وركەشبايەۆ سول جىلدارى ەل ىشىندە عانا ەمەس، شەتەلدىك تەلەەكراننان ءجيى كورىندى. El.kz سايتى ونىڭ بۇگىنگى تىنىس-تىرشىلىگىن ءبىلۋ ءۇشىن كەيىپكەرمەن قايتا حابارلاستى.

بۇل تۋرالى Infohub.kz اقپارات اگەنتتىگى حابارلايدى.

نۇرجاننىڭ بۇگىنگى تىرشىلىگى

نۇرجان وركەشبايەۆ – بۇگىندە 35 جاستا. ول اتىراۋ وبلىسىنىڭ قىزىلقوعا اۋدانىنا قاراستى مۇقىر اۋىلىندا دۇنيەگە كەلگەن. تۋعان جەرىنەن ۇزاپ كورمەگەن نۇرجان وسى كۇنگە دەيىن سول اۋىلدا اناسىمەن بىرگە تۇرىپ كەلەدى. ونىڭ ءىنىسىنىڭ ەكى كىشكەنتاي قىزى بار، نۇرجان كۇندەلىكتى سول بۇلدىرشىندەردىڭ قىزىعىنا قاراپ، ۋاقىتىن وتباسىمەن بىرگە وتكىزەدى.

ايتۋىنشا، سوڭعى ەكى جىلدا ومىرىندە ايتارلىقتاي وزگەرىس بولماعان. دەگەنمەن دەنساۋلىعىنا قاتىستى جاعدايى تۇراقتى. «اللاعا شۇكىر، دەنساۋلىعىم جاقسى، ءبارى ويداعىداي»، - دەيدى ول.

نۇرجاننىڭ ايتۋىنشا، جۇمىسقا ورنالاسۋ ماسەلەسى ءالى دە شەشىلمەگەن. دەنساۋلىعىنا بايلانىستى ءتۇرلى مەكەمەلەر اراسىندا تۇسىنىسپەۋشىلىك تۋىنداپ، ەڭبەككە جارامدىلىعى جونىندەگى قۇجات ماسەلەسى كەدەرگى بولىپ وتىر. «اۋرۋحانا جۇمىسقا جارامدىسىڭ دەيدى. ال جۇمىسقا بارسام، جۇمىس بەرۋشىلەر ارنايى قاعاز سۇرايدى. ونى سۇراسام، اۋرۋحانا ونداي قۇجات جوق دەيدى. سولاي ماسەلە شەشىلمەي كەلەدى»، - دەيدى نۇرجان.

قازىرگى تاڭدا ول ءناپاقاسىن قۇرىلىس سالاسىندا تابادى. قولىنان كەلگەنشە قۇرىلىس جۇمىستارىنا ارالاسىپ، كۇندەلىكتى تۇرمىس قاجەتىنە جاراتار تابىس تاۋىپ ءجۇر. ال دەمالىس كۇندەرى توي-تومالاقتارعا شىعىپ، قوسىمشا تابىس تاباتىنىن جەتكىزدى.

ەستەرىڭىزگە سالا كەتەيىك، نۇرجان وركەشبايەۆ 2015 جىلى اسەمگۇل ەسىمدى ارۋمەن شاڭىراق كوتەرگەن ەدى. الايدا، وتاۋ قۇرعان نۇرجاننىڭ جۇبايىمەن ءدام-تۇزى جاراسپاي، قوس جۇپتىڭ جولى ەكىگە ايىرىلعان. نۇرجاننان قازىرگى جەكە ءومىرى جايلى سۇراعانىمىزدا، ول ازىرگە بويداق ەكەنىن ايتتى. «جوق، قايتادان شاڭىراق كوتەرگەن جوقپىن، ازىرگە بويداقپىن»، - دەپ قىسقا قايىردى.

«ءقازىر ەشكىم ىزدەمەيدى»

2024 جىلى El.kz ءتىلشىسى نۇرجان وركەشبايەۆپەن سۇحباتتاسقاندا، ونىڭ 2012 جىلى اتىراۋ قالاسىنان ءبىر بولمەلى پاتەر العانىمەن، ءالى كۇنگە دەيىن باسپانانى ءوز اتىنا راسىمدەي الماي جۇرگەنىن جازعان ەدى. سول كەزدە نۇرجان پاتەردى ءوز اتىنا اۋدارۋ ءۇشىن ءۇشىنشى توپتاعى مۇگەدەكتىك تۋرالى قۇجات قاجەتىن، سونداي-اق قوسىمشا تولەم جاساۋ كەرەكتىگى ايتىلعانىن جەتكىزگەن بولاتىن. بۇدان بولەك، زەينەتاقى ماسەلەسى دە شەشىلمەي كەلە جاتقانىن ايتىپ، ءتۇرلى مەكەمەلەردەن ناقتى قولداۋ كورمەگەنىنە قىنجىلعان ەدى.

اراعا ۋاقىت سالىپ، بۇل ماسەلەنىڭ شەشىلگەن-شەشىلمەگەنىن سۇراعانىمىزدا، نۇرجان جاعدايدىڭ ءالى وزگەرمەگەنىن ايتتى. «ءيا، 2012 جىلى اتىراۋدان پاتەر الدىم. ءبىراق قازىرگى تاڭدا ول پاتەر ءالى كۇنگە دەيىن ءوز اتىمدا ەمەس. قاشان اۋداراتىنى بەلگىسىز. كەزىندە تانىمال بولدىق قوي، ءقازىر ەشكىم ىزدەپ جاتقان جوق. تەك قۇرداستارىم، دوستارىم حابارلاسىپ تۇرادى. باسقا جاقتان كوپ ىزدەپ جاتقان ەشكىم جوق»، - دەيدى ول.

نۇرجاننان بۇگىندە قانداي ارمانى ورىندالماي جۇرگەنىن سۇرادىق. ونىڭ ايتۋىنشا، ارمان كوپ، تەك سونىڭ بارىنە بىرتىندەپ جەتۋدى قالايدى. «ارمان كوپ. ايتا بەرسەم، شەكسىز عوي. ءقازىر ەڭ الدىمەن نەسيەم بار، سونى جاۋىپ، باسپانامدى ءوز اتىما اۋدارسام دەگەن نيەت بار. ۇيلەنىپ بالالى-شاعالى بولىپ، اناما قۋانىش كورسەتسەم دەيمىن. تۇراقتى جۇمىسقا دا تۇرۋ قاجەت»، - دەدى نۇرجان وركەشبايەۆ.

كەزىندە كوپشىلىكتىڭ نازارىندا بولعان نۇرجان وركەشبايەۆ بۇگىندە قاراپايىم اۋىل تىرشىلىگىن كەشىپ وتىر. دەنساۋلىعىنا شۇكىرشىلىك ەتىپ، ادال ەڭبەكپەن كۇن كورىپ جۇرگەن ول دا ەل قاتارلى باسپانا، تۇراقتى جۇمىس، وتباسى باقىتى سەكىلدى قاراپايىم ارماندارعا ۇمتىلادى. جىلدار وتسە دە، ونىڭ كەيبىر ماسەلەلەرى شەشىمىن تاپپاعان. سوعان قاراماستان نۇرجان ءۇمىتىن ۇزبەي، ەرتەڭنەن جاقسىلىق كۇتەتىنىن اڭعارتتى.