InfoHub Logo

الدەكىم حان تەمىرگە شومبال ەسەكتىڭ ءبىرىن تارتۋ ەتىپ اكەپ بەرىپتى. بۇعان ول قاتتى قۋانىپتى. اركىم بىردەن ارتىقشىلعىن ايتىپ، قاسىنداعىلار دا بۇل ەسەكتى باسەكەلەسە ماقتاپتى. ءتىپتى، اقىرىندا ونى حيكىمەتتى حايۋانعا اينالدىرىپ جىبەرىپتى. باعالاۋ كەزەگى جۇقاعا كەلگەندە ماقتاۋ سوزدەرىنىڭ تۇگەل ايتىلىپ بولعاندىعىن بىلگەن ول ويلانىپ تۇرىپ:

—بۇل ەسەك وتە زەرەك، كىتاپتى دا وقي الادى،—دەپتى.

حان تەمىر قارقىلداپ كۇلىپ كەتىپ، جۇقاعا:

—ەگەر، ەسەككە كىتاپ وقۋدى ۇيرەتە الساڭ، مول سىيلىققا يە بولاسىڭ، ۇيرەتە الماساڭ، جازاعا تارتىلاسىڭ،—دەيدى.

—ءۇش ايلىق ۋاقىت بەرىڭىز، مەن ءسوزسىز ۇيرەتىپ شىعامىن،— دەيدى جۇقا.

حان تەمىر بۇعان ماقۇل بولادى، سونداي-اق قولاستىنداعىلارعا جۇقاعا نە قاجەت بولسا سونى بەرىڭىزدەر دەپ تاپسىرادى. ءسويتىپ، تاڭەرتەڭنەن كەشكە دەيىن جۇقا ەسەككە كىتاپ وقۋدى جاتتىقتىرادى. ءۇش اي تولعاندا، جۇقا ەسەكتى ادەمى ابزەلمەن بەزەندىرىپ حان تەمىردىڭ الدىنا جەتەكتەپ اكەلەدى. ول ەسەكتىڭ الدىنا ءبىر ورىندىقتى قويادى دا، ورىندىقتىڭ ۇستىنە كىتاپتى قويادى. ەسەك اۋزىمەن كىتاپتى ءبىر-بىر بەتتەن پاراقتاپ اشادى
جانە ارالىعىندا الدەبىردەمەلەردى ايتقانداي جۇقاعا قاراپ مەكىرەنىپ قويادى. مۇنى كورىپ جۇرتتىڭ ءبارى قايران قالادى، حان تەمىر دە توتەنشە قۋانىپ، جۇقاعا قىرۋار اقشا جانە گاۋھار سىيلايدى.

سول ارادا بىرەۋلەر جۇقادان:

—جۇقا مىرزا، ەسەككە كىتاپ وقۋدى قالاي ۇيرەتتىڭىز؟—دەپ سۇرايدى.

—مەن ءجۇز دانا كيىك جارعاعىن ساتىپ الىپ، ونان كىتاپ جاساپ شىقتىم. سونان سوڭ كىتاپتىڭ بەتتەرىنە ارپانىڭ داندەرىن شاشىپ قويدىم. ونان سوڭ ءار كۇنى وعان ءبىر بەت، ءبىر بەتتەن پاراقتاپ بەرىپ ونى بەت ارالىعىنداعى ارپانىڭ ءدانىن تەرىپ جەۋگە داعدىلاندىردىم. وسىلايشا ءبىر اي جاتتىقتىرۋ جۇرگىزدىم، تاعى ءبىر ايدان كەيىن ول كىتاپتى ءوزى پاراقتايتىن بولدى. بۇل ۋاقىتتا مەن كىتاپتىڭ اراسىنا ارپا داندەرىن سالمايتىن بولدىم، ول پاراقتاپ الدەنەشە بەتتى اشسا دا، ارپا كورىنبەگەن سوڭ، باسىن كوتەرىپ ماعان قاراپ اڭىرايتىن بولدى. بۇگىن بۇل جەرگە اكەلەردىڭ الدىندا وعان ەكى كۇن بويى ءنار تاتتىرماعان ەدىم، سوندىقتان، ول كىتاپتى ويداعىداي پاراقتاپ، سىناقتان وتە جاقسى ءوتتى،—دەپ جاۋاپ بەرەدى.

---