InfoHub Logo

الماتىنىڭ باس گازەتى سانالاتىن «Almaty aqshamy» باسىلىمىندا اۋقىمدى كادرلىق وزگەرىس بولدى. «Alatau Aqparat» مەديا حولدينگىنىڭ شەشىمىمەن گازەت تىزگىنى جاڭا، ءبىراق ۇجىمعا ەتەنە تانىس، تاجىريبەلى ماماندارعا سەنىپ تاپسىرىلدى. بۇل تۋرالى Infohub.kz اقپاراتتىق پورتالى حابارلايدى.

حولدينگ ديرەكتورى ەرجان قالىمباي ۇلىنىڭ بۇيرىعىمەن باسىلىمنىڭ باس رەداكتورى قىزمەتىنە بەلگىلى جۋرناليست ەستاي بوجان تاعايىندالدى. مەديا سالادا وزىندىك قولتاڭباسى قالىپتاسقان، قالامى جۇيرىك قالامگەر ەندى مەگاپوليستىڭ تىنىس-تىرشىلىگىن جازاتىن تاريحي گازەتتىڭ جۇمىسىن جانداندىرماق.

باسشىلىق قۇرامداعى وزگەرىس تەك ءبىرىنشى تۇلعامەن شەكتەلگەن جوق. رەداكسيا جۇمىسىن جاڭا دەڭگەيگە كوتەرۋ ماقساتىندا باس رەداكتوردىڭ ورىنباسارى بولىپ سەرىك جۇمابايەۆ بەكىتىلسە، باسىلىمنىڭ جاۋاپتى حاتشىسى قىزمەتى قۇرالاي يمانبەكقىزىنا جۇكتەلدى. «Alatau Aqparat» باسشىلىعىنىڭ پىكىرىنشە، بۇل تاعايىنداۋلار كەزدەيسوق ەمەس. جاڭا كوماندانىڭ ءۇش مۇشەسى دە «اقشامنىڭ» ءوز قازانىندا قايناپ، ىستىق-سۋىعىنا توسەلگەن كاسىبي كادرلار. ولاردىڭ بىلىكتىلىگى باسىلىمنىڭ ءداستۇرلى قۇندىلىقتارىن ساقتاي وتىرىپ، ونى زامان تالابىنا ساي تۇلەتۋگە مۇمكىندىك بەرەدى دەگەن سەنىم زور.

ايتا كەتەيىك، «Almaty aqshamy» – قازاق باسپاسوزىندەگى ورنى ەرەكشە، بىرەگەي مەكتەپ. كەزىندە ەرعالي ساعات، قالي سارسەنباي سىندى ۇلتتىق جۋرناليستيكانىڭ مارعاسقالارى باسقارعان باسىلىمنىڭ جاۋاپكەرشىلىگى قاشاندا اۋىر بولعان. وسى ۋاقىتقا دەيىن گازەتتى ابىرويمەن باسقارىپ كەلگەن تورەحان دانياروۆ قۇرمەتتى ەڭبەك دەمالىسىنا شىقتى. ارىپتەستەرى مەن مەديا قاۋىمداستىق ارداگەر جۋرناليستكە گازەتتىڭ دامۋىنا قوسقان سۇبەلى ۇلەسى ءۇشىن العىس ءبىلدىرىپ، زەينەت جاسىنداعى جاڭا كەزەڭىنە ساتتىلىك تىلەدى.