InfoHub Logo

بەلگيادا قازاقستاننىڭ ءبىرقاتار ايماقتىق اقپارات قۇرالىنىڭ وكىلدەرى، ونىڭ ىشىندە QazaqToday اقپارات اگەنتتىگىنىڭ باسشىسى ەلشى رومان ۆاسيلەنكومەن كەزدەستى، دەپ حابارلايدى infohub.kz اقپارات اگەنتتىگى.

بريۋسسەلگە بىلىكتىلىكتى ارتتىرۋ كۋرستارى اياسىندا كەلگەن جۋرناليستەر توبىن تۇركىتىلدەس جۋرناليستەر قورىنىڭ پرەزيدەنتى ءنازيا جويامەرگەن قىزى باستاپ باردى. دەلەگاسيا قۇرامىندا «infohub.kz» ديرەكتورى مەيىرجان اۋەلحان ۇلى، «جەتىسۋ» راديوسى، «قوستاناي تاڭى» گازەتى، «قىزىلجار-اقپارات» مەدياحولدينگى، «Turkistan Media Holding» جانە «الماتى» تەلەارناسىنىڭ وكىلدەرى بولدى.

كەزدەسۋدە ەلشى رومان ۆاسيلەنكو قازاقستاننىڭ ەۋروپالىق وداقپەن (ەو) اراداعى قارىم-قاتىناسىنىڭ نەگىزگى باعىتتارىنا توقتالدى. ونىڭ ايتۋىنشا، ەو – قازاقستاننىڭ ەڭ ءىرى ساۋدا جانە ينۆەستيسيالىق سەرىكتەسى.

«ەۋروپالىق ينۆەستيسيالاردىڭ قازاقستان ەكونوميكاسىنا سالىنعان جالپى كولەمى 200 ملرد دوللاردان استى، ال قازاقستان ەو-عا يمپورتتالاتىن مۇنايدىڭ شامامەن 13%-ىن قامتاماسىز ەتەدى»، — دەپ اتاپ ءوتتى ەلشى.

سونىمەن قاتار تاراپتار كولىك سالاسىنداعى، اسىرەسە ترانسكاسپيي حالىقارالىق كولىك باعىتى اياسىنداعى ىنتىماقتاستىقتى بەلسەندى دامىتىپ جاتىر. سونداي-اق سىني شيكىزات، جاسىل ەنەرگەتيكا جانە سيفرلاندىرۋ سياقتى جاڭا باعىتتاردا سەرىكتەستىك نىعايىپ كەلەدى.

كەزدەسۋ بارىسىندا كوتەرىلگەن ماڭىزدى ماسەلەلەردىڭ ءبىرى – ۆيزالىق رەجيمدى جەڭىلدەتۋ. ەلشىنىڭ سوزىنشە، ءقازىر قازاقستان مەن ەۋروپالىق وداق اراسىندا وسى ماسەلە بويىنشا كەلىسسوزدەر جالعاسىپ جاتىر.

ەلشى قازاقستان مەن بەلگيانىڭ ەكىجاقتى قاتىناستارىنىڭ وڭ قارقىن العانىن دا تىلگە تيەك ەتتى. بۇگىندە قازاقستاندا Ahlers، Sarens، Carmeuse، Solvay جانە Jan De Nul سياقتى ءىرى بەلگيالىق كومپانيالار جۇمىس ىستەيدى. ال 2024 جىلدىڭ قاڭتارىندا بريۋسسەلدە قازاقستاننىڭ مادەني ورتالىعى اشىلعان بولاتىن.