InfoHub Logo

فرانسيانىڭ وڭتۇستىگىندەگى تانىمال انتيب مۇيىسىندە ورنالاسقان ەليتالىق Parc du Cap تۇرعىن ءۇي كەشەنىنەن پاتەرلەر ساتىلىمعا شىعارىلدى. اشىق دەرەككوزدەردەگى مالىمەتتەرگە سۇيەنسەك، بۇل نىساندار قازاقستان بيلىگى تاركىلەگەن اكتيۆتەرگە تولىق سايكەس كەلەدى. اڭگىمە ەكس-پرەزيدەنت نۇرسۇلتان نازاربايەۆتىڭ نەمەرە ءىنىسى قايرات ساتىبالدى مەن ونىڭ ءۇش جۇبايىنا تيەسىلى بولعان مۇلىكتەر تۋرالى بولىپ وتىر.

بۇل تۋرالى Infohub.kz اقپارات اگەنتتىگى حابارلايدى.

ماڭىزدى دەرەكتەر

“ۆىحود ك موريۋ” تەلەگرام ارناسىنىڭ حابارلاۋىنشا، پاتەرلەردى ساتۋ تۋرالى حابارلاندىرۋلار شەتەلدىك جىلجىمايتىن مۇلىككە ماماندانعان Prian اگەنتتىگىنىڭ سايتىندا جاريالانعان. ساتىلىمدا تۇرعان ءتورت پاتەردىڭ جوسپارلانۋى مەن ورنالاسۋى قايرات ساتىبالدى جانە ونىڭ جۇبايلارى — سايدا قاناتبەك قىزى، اسەل باحتيار قىزى مەن گۇلميرا قاۋاسقىزىنا تيەسىلى بولعان اكتيۆتەرگە ءدال كەلەدى.

اتالعان پاتەرلەر KS Propriete، SK Propriete، AB Propriete جانە GK Propriete اتتى ءتورت كومپانيانىڭ اتىنا راسىمدەلگەن. بۇل زاڭدى تۇلعالار موناكودا تىركەلگەندىكتەن، ولاردىڭ قازىرگى ناقتى يەسىن اشىق دەرەككوزدەر ارقىلى انىقتاۋ مۇمكىن ەمەس. دەگەنمەن، اكتيۆتەر قازاقستان پايداسىنا تاركىلەنگەنىن ەسكەرسەك، ولاردى باسقارۋ قۇقىعى كومپانيا پو ۋپراۆلەنيۋ ءۆوزۆراششوننىمي اكتيۆامي قاراماعىنا وتكەن بولۋى ىقتيمال.

فرانسياداعى بۇل جىلجىمايتىن مۇلىكتىڭ جالپى قۇنى شامامەن 8،7 ملن ەۋروعا باعالانىپ وتىر. ساتىلىمنان تۇسكەن قاراجات قازاقستان بيۋدجەتىنە اۋدارىلۋى ءتيىس.

پاتەرلەردىڭ سيپاتتاماسى

بارلىق پاتەرلەر ءبىر ستيلدە، ارتىق ءسان-سالتاناتسىز جاسالعان. ءارقايسىسىندا جەكە جۋىناتىن بولمەسى بار ءۇش جاتىن بولمە، قوناق بولمە، اس ءۇي جانە بالكون بار. پاتەرلەر تولىق جيھازدالعان. كەشەندە كۇزەت، جەراستى پاركينگى، فيتنەس زالى، SPA، ساۋنا، باسسەين جانە تەڭىزگە كورىنىس بار.

اكتيۆتەر قازاقستاندا دا ساتىلىمدا

قايرات ساتىبالدىدان تاركىلەنگەن مۇلىك تەك فرانسيادا عانا ەمەس، قازاقستاندا دا ساتىلىمعا شىعارىلۋدا. ءساۋىر ايىنىڭ باسىندا الماتىداعى Kaisar Plaza ساۋدا-كەڭسە ورتالىعى اۋكسيونعا قويىلماق. باستاپقى باعاسى — 62 ملرد تەڭگەگە جۋىق. سونداي-اق DoubleTree by Hilton ءقوناقۇيى مەن «بايسات» بازارىن ساتۋ جوسپارلانعان. «بايسات» بازارىنان شامامەن 4 ملرد تەڭگە ءتۇسىرۋ كوزدەلىپ وتىر.

تاركىلەنگەن اكتيۆتەردىڭ ءبىر بولىگى مەملەكەتتىك مەكەمەلەرگە بەرىلدى. مىسالى، الماتىداعى بىرنەشە بيزنەس-ورتالىققا عىلىمي جانە ءبىلىم بەرۋ ۇيىمدارى ورنالاستىرىلسا، اياقتالماعان ءقوناقۇي سوت اكىمشىلىگى دەپارتامەنتىنە وتكەن.

كونتەكست

قايرات ساتىبالدى 2022 جىلدىڭ قىركۇيەگىندە ءىرى كولەمدەگى ۇرلىق بويىنشا 6 جىلعا باس بوستاندىعىنان ايىرىلعان بولاتىن. 2024 جىلى ونىڭ جازاسى بوستاندىعىن شەكتەۋمەن اۋىستىرىلدى. سول ۋاقىتقا دەيىن ول مەملەكەت باقىلاۋىنا 732،8 ملرد تەڭگە (شامامەن $1،5 ملرد) كولەمىندەگى اكتيۆتەردى وتكىزگەن.