InfoHub Logo

گەرمانياداعى Lufthansa، Lufthansa Cargo، CityLine جانە Eurowings اۋە كومپانيالارىنىڭ ۇشقىشتارى 13 جانە 14 ساۋىردە ەرەۋىلگە شىعادى. بۇل شەشىمگە كومپانيانىڭ كورپوراتيۆتىك زەينەتاقى باعدارلامالارىنا قاتىستى كەلىسپەۋشىلىك سەبەپ بولدى. بۇل تۋرالى نەمىس ۇشقىشتارى مەن اۆياينجەنەرلەرى وداعى Vereinigung Cockpit سايتىندا حابارلاندى.

بۇل تۋرالى Infohub.kz اقپارات اگەنتتىگى حابارلايدى.

Eurowings ۇشقىشتارى 13 ساۋىردە گەرمانياداعى بارلىق اۋەجايدان ۇشىپ شىعاتىن رەيستەردى توقتاتادى. الايدا، تاياۋ شىعىستاعى جاعدايعا بايلانىستى گەرمانيادان ءازىربايجان، باحرەين، مىسىر، يزرايل، يوردانيا، يراك، يەمەن، كاتار، كۋۆەيت، ليۆان، ومان، ساۋد ارابياسى جانە باا-گە قاتىنايتىن Lufthansa، Lufthansa Cargo جانە CityLine كومپانيالارىنىڭ ەكيپاجدارى ەرەۋىلگە قاتىسپايدى.

كەلىسسوزدەردە شەشىم تابىلمادى

Vereinigung Cockpit (VC) وداعىنىڭ ءتوراعاسى اندرەاس پينەيرۋ جۇمىس بەرۋشى تاراپىنىڭ بىرنەشە ەڭبەك داۋى بويىنشا شەشىم تابۋعا دايىن ەمەستىگىن ايتتى. ونىڭ ايتۋىنشا، پاسحا مەرەكەسى كەزىندە ەرەۋىلدەن باس تارتقانىمەن، تاراپتار اراسىندا ناقتى ۇسىنىستار بولماعان.

VC مالىمەتىنشە، Lufthansa مەن Lufthansa Cargo زەينەتاقى باعدارلامالارى بويىنشا، ال CityLine ۇجىمدىق شارت بويىنشا ۇسىنىس جاساماعان. ال Eurowingsء-تىڭ زەينەتاقى ۇسىنىسى «قاناعاتتانارلىقسىز» جانە «اتى عانا بار، مازمۇنى جوق» دەپ باعالاندى.

پينەيرۋ ەرەۋىلدى «كەلىسسوزدەردەگى ساتسىزدىكتى جويۋعا باعىتتالعان سوڭعى شارا» دەپ اتاپ، جاۋاپكەرشىلىكتى جۇمىس بەرۋشىگە جۇكتەدى. سونداي-اق، پروفسويۋز مۇشەلەرىن 15 ساۋىردە فرانكفۋرت اۋەجايىنداعى Lufthansa كەڭسەسى الدىندا وتەتىن بورتسەرىكتەردىڭ ميتينگىسىن قولداۋعا شاقىردى. 10 ساۋىردەگى UFO اكسياسى جۇزدەگەن رەيستىڭ توقتاتىلۋىنا سەبەپ بولعان.

Lufthansa جاعىنان جاۋاپ

Lufthansa كومپانياسى ەرەۋىلگە شاقىرۋدى «جاعدايدى ۋشىقتىرۋدىڭ جاڭا دەڭگەيى» دەپ اتاپ، سىنعا الدى. كومپانيانىڭ مالىمدەۋىنشە، VC-نىڭ نەگىزگى تالابى – «اۋەلدە دە جوعارى بولعان كومپانيانىڭ زەينەتاقى باعدارلاماسىن ەكى ەسەلەۋ» – «ابسۋرد جانە ورىندالمايتىن» تالاپ.

بۇعان دەيىن، 2026 جىلدىڭ اقپانىندا دا ۇشقىشتار كورپوراتيۆتىك زەينەتاقى ماسەلەسى بويىنشا ەرەۋىلگە شىققان بولاتىن.