گۇلجامال
گۇلجامال كوزىن اشقاندا، ءۇي قاراڭعى بولاتىن. قابىرعادا ءىلۋلى تۇرعان ەلەكتروندى ساعاتقا كوز سالدى. ون ءبىر بولىپ قالىپتى. ول تەرەزەنى ەشكىمنىڭ اشپاعانىن تۇسىنگەن. كوپ ءارى قاتتى ۇيقىدان سولقىلداعان باسىن قولىمەن قىسىپ، سىرتقا بەتتەدى. دالادا جاڭبىر جاۋىپ تۇر ەكەن. سۋ-سۋ ءاقتوس الدەنەگە ءماز بولىپ، ارسالاڭدايدى. ول ءيتتى اياعىمەن تەۋىپ جىبەردى.
— كەت!
ءۇيدىڭ ماڭىندا دا ەشكىم جوق ءتارىزدى. تىم-تىرىس. كەنەت ول باقشا جاقتان الدەبىر دىبىس ەستىگەندەي بولدى. جاقىنداي كەلە مايرانىڭ داۋىسىن تانىعان.
بالاباقشادان تاعى قالىپ قالعان بولۋ كەرەك. جىلاپ وتىر. ول ادۋىڭدى ادىمداپ، داۋىس شىققان جاققا بەتتەدى. تۇلا بويىن كەرنەگەن كۇشتى ءدال ءقازىر اسىرەسە ايقىن سەزىنگەن. جاسى ون تورتكە تولماعان ودان مەكتەپتە وزىنەن ەكى-ۇش جاس ۇلكەن ۇلدار دا جاسقاناتىن. تۇسىنىكسىز مىنەزىنەن بە، الدە كەسكەن تومارداي كەسەك جارتىلىسىنان با ەشقاشان جاقىن قۇربىسى دا بولعان ەمەس. شىنداپ كەلگەندە ول قىزداردى ۇناتپايدى. ءالجۋاز، نە بولسا سوعان كوز جاستارىن كول قىلىپ وتىرعاندارى. سونىسىنا قاراماي ولاردىڭ ءوزى تۋرالى «ەركەكشورا» دەپ سىپسىڭدايتىندارىن قايتەسىڭ. اقىماقتار. ءقازىر دە مىنا قىزدىڭ بوتاسىنان ايىرىلعان ىنگەنشە بوزداعان داۋىسى ىزاسىن كەلتىرگەن.
— نە بولدى؟
جىلاپ-جىلاپ قارلىققان ۇنمەن الدەنەنى بىلدىرلاي باستاعان مايرانىڭ بىردە-بىر ءسوزىن تۇسىنگەن جوق.
— نە بولدى دەيمىن ساعان؟
— ەسى-ىكتى اشا الماي وتىرمىن...
— ساعان دارەتحاناعا وتىرۋعا بولمايدى دەپ ايتىلدى عوي. نەگە كىردىڭ؟!
مايرانىڭ جىلاعان داۋىسى زارلى شىقتى.
— ەندى وتىر وسىلاي. اشپايمىن. اكە-شەشەڭ كورسىن مىنا ءتۇرىڭدى.
گۇلجامال جاڭبىردىڭ سۋىق تامشىلارىنان قورعاناتىن جەر ىزدەپ جان-جاعىنا قارادى. كوزىنە ەش نارسە ىلىنە قويماعان سوڭ، نازارىن قايتا دارەتحاناعا اۋدارعان:
— اۋىزىندى جاپ!
— گۇلجامال، اش-ش-شى...
— ساعان ايتىلدى عوي دارەتحاناعا كىرمە، ىشىنە ءتۇسىپ كەتەسىڭ دەپ، نەگە تىڭدامايسىڭ؟
— مەن ى-ىشى-ىنە تۇسپەيمى-ىن...
— سەن بە؟ تۇسكەندە قالاي تۇسەسىڭ!
— تۇسپەيمى-ىن!..
ول ەسىكتى جۇلقىپ تارتىپ قالعاندا، ەسكى اعاش دارەتحانا سولق ەتە تۇسكەن. ءبۇرىسىپ بۇرىشقا تىعىلعان مايرانى قولىنان تارتىپ ورنىنان تۇرعىزدى.
— مىنە، مىنا تەسىككە ءتۇسىپ كەتەسىڭ. الدىمەن بىلاي اياعىڭ كىرەدى. سودان كەيىن بەلىڭ كىرەدى.
جانۇشىرا تىرمىسقان كىشكەنتاي قىزدىڭ قوبىراعان ۇزىن شاشى اۋزىنا كىردى. اسىرەسە شىرقىراعان اششى ءۇنى اشۋىن قوزدىرعان. باسىن وڭاي تىقتى. سودان كەيىن بىلش ەتكەن جاعىمسىز دىبىس، مايرانىڭ ءالسىز قۇمىققان ءۇنى ەستىلدى. ول كەۋدەسىنىڭ اۋىر جۇك تۇسكەندەي جەڭىلدەگەنىن سەزىنگەن. ۇيگە كىرىپ تەلەديداردى قوستى. مۋلتفيلم كورسەتىپ جاتىر ەكەن. ول توسەگىنە قايتا قۇلادى.
You Might Also Like
-
حاتشى وتىراتىن اۋىزۇيگە كىرىپ، شەتتەگى جۇمساق كرەسلوعا جايعاستىم. ءبىر ساعات وتىردىم. باسىندا ءتىپتى كىرە بەرىس بولمەنىڭ مىسى باساتىنىنا تاڭ قالدىم. ەڭسەلى، اپپاق تەرەزەسىنەن كۇننىڭ ءوزى يمەنىپ سىعالا...
-
اششى قوڭىراۋ قىسقا زىڭ ەتە قالدى. جەڭىل باسىپ كەلىپ كىلتكە قولىن سوزعان ول ءسال كىدىرىپ، "كىم بۇل؟" دەپ سۇرادى دا جاۋاپ كۇتپەستەن ەسىكتى اشا سالدى. ونالتى-ون جەتى شاماسىنداعى ۇزىن بويلى سار...
