InfoHub Logo

مەملەكەت باسشىسى قاسىم-جومارت توقايەۆ بىرنەشە ماڭىزدى زاڭنامالىق اكتىگە قول قويدى. بۇل قۇجاتتار ەلدەگى ارناۋلى مەملەكەتتىك ورگانداردىڭ قىزمەتىن جەتىلدىرۋگە، ترانزيتتىك الەۋەتتى ارتتىرۋعا جانە حالىقارالىق ەكونوميكالىق ىنتىماقتاستىقتى نىعايتۋعا باعىتتالعان.

بۇل تۋرالى Infohub.kz اقپارات اگەنتتىگى حابارلايدى.

ارناۋلى مەملەكەتتىك ورگاندار قىزمەتىنىڭ جاڭا رەتتەۋلەرى

پرەزيدەنت "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسى ارناۋلى مەملەكەتتىك ورگاندارىنىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭدى بەكىتتى. بۇل زاڭ ارناۋلى مەملەكەتتىك ورگاندارداعى قىزمەتكە قابىلداۋ، ونى وتكەرۋ جانە بوساتۋ ءتارتىبىن جاقسارتۋدى كوزدەيدى. سونداي-اق، قىزمەتكەرلەردىڭ الەۋمەتتىك قورعالۋىن كۇشەيتىپ، ەڭبەك جاعدايىن جاقسارتۋعا باسىمدىق بەرىلەدى. جاڭا وزگەرىستەر ۆەدومستۆولاردىڭ جۇمىس تيىمدىلىگىن ارتتىرادى دەپ كۇتىلۋدە.

ترانزيتتىك الەۋەتتى كۇشەيتۋ

مەملەكەت باسشىسى "ەۋرازيالىق ەكونوميكالىق وداق پەن ءۇشىنشى تاراپتىڭ كەدەندىك ءترانزيتىنىڭ ءبىرىڭعاي جۇيەسى تۋرالى كەلىسىمدى راتيفيكاسيالاۋ تۋرالى" زاڭعا دا قول قويدى. بۇل كەلىسىم قازاقستان ارقىلى وتەتىن جۇك تاسىمالىنىڭ كولەمىن ۇلعايتىپ، ەلدىڭ كولىك دالىزدەرىن دامىتۋعا جانە ترانزيتتىك الەۋەتىن نىعايتۋعا جول اشادى.

قازاقستان مەن ومان اراسىنداعى سالىقتىق كەلىسىم

بۇعان قوسا، پرەزيدەنت "قازاقستان رەسپۋبليكاسىنىڭ ۇكىمەتى مەن ومان سۇلتاندىعىنىڭ ۇكىمەتى اراسىنداعى تابىس پەن كاپيتالعا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق تولەۋدەن جالتارۋعا جول بەرمەۋ تۋرالى كەلىسىمدى جانە وعان حاتتامانى راتيفيكاسيالاۋ تۋرالى" زاڭدى بەكىتتى. بۇل كەلىسىم ەكى ەل اراسىنداعى ەكونوميكالىق بايلانىستاردى دامىتۋعا، ينۆەستيسيالىق احۋالدى جاقسارتۋعا جانە رەزيدەنتتەردىڭ تابىسىنا قوسارلانعان سالىق سالۋدى بولدىرماۋعا باعىتتالعان.