InfoHub Logo

ءانشى قايرات نۇرتاستىڭ اناسى، پروديۋسەر گۇلزيرا ايداربەكوۆا الەۋمەتتىك جەلىدەگى پاراقشاسىندا ۇلىنىڭ قاراپايىمدىلىعى مەن ادامگەرشىلىك قاسيەتتەرى تۋرالى جازبا جاريالادى. ول ۇلىنىڭ بيبىگۇل تولەگەنوۆانى سىناعاندارعا قالاي قولداۋ كورسەتكەنىن ەسكە الدى.

بۇل تۋرالى Infohub.kz اقپارات اگەنتتىگى حابارلايدى.

ۇلىنىڭ قاراپايىمدىلىعى

گۇلزيرا ايداربەكوۆا ۇلىنىڭ الەۋمەتتىك جەلىدەگى بەلسەندىلىگى تۋرالى ايتا كەلىپ، ونىڭ ۋاقىتىنىڭ ازدىعىنان سيرەك جازبالار سالاتىنىن اتاپ ءوتتى. تىڭدارماندار جىبەرگەن بەينەجازبالاردى ءوزىنىڭ پاراقشاسىندا بولىسەتىنىن ايتتى.

«بالام، نەگە ينستاگرامدا كۇندەلىكتى كونسەرتتەرىڭدى، تويلارىڭدى سالمايسىڭ، حالىقتىڭ ماحابباتى شەكسىز عوي»، – دەپ سۇرايمىن كەيدە. ءوزى جۇرگىزەتىن پاراقشاسىنا ۋاقىتى جەتپەيتىن شىعار، وتە سيرەك جازبالار جاريالايدى. تىڭدارماندار جىبەرگەن بەينەلەردى كورىپ، مەن بولسا دا سولاردى جاريالاۋعا شەشتىم. كوز تيمەسىن، باقىتىنا قۋانامىن، ءجۇز جاساسىن!» – دەپ جازدى ول.

ادامگەرشىلىك پەن سىيلاستىق

ايداربەكوۆا ۇلىنىڭ ادامگەرشىلىگى مەن كىشىپەيىلدىلىگىنە ەرەكشە توقتالدى. ونىڭ ايتۋىنشا، ۇلىنا دەگەن وكپە-نازى بارلاردىڭ ءوزى ونى مويىنداي باستاعان.

«وكپە-نازى بارلاردىڭ ءوزى مويىنداي باستادى – ءبارى ونىڭ قاراپايىمدىلىعى مەن جۇرەگىنىڭ تازالىعىندا. ونى سىناپ جاتقان ادامداردى بىلە تۇرا، ولاردىڭ نيەتىن كورسە دە، ەشقاشان مىنەز كورسەتپەگەن. كەرىسىنشە، سىيلاستىق تانىتىپ، جاقسى سوزدەرمەن باۋراپ الادى ەكەن، مەن ءوزىم دە تاڭعالامىن»، – دەدى ول.

بيبىگۇل تولەگەنوۆاعا كورسەتكەن قولداۋ

ەڭ تاڭ قالدىرعانى – بيبىگۇل تولەگەنوۆانىڭ ۇلىن كوپشىلىك الدىندا قورلاپ، سۇحبات بەرگەنىنە قاراماستان، قايرات نۇرتاس ءوزىنىڭ جەكە كونسەرتىندە «انا» ءانىن ورىنداعاندا، ەكرانعا بيبىگۇل اپانىڭ بەينەسىن شىعارىپ، ونى قازاق حالقىنىڭ قۇرمەتتى انالارىنىڭ قاتارىندا كورسەتكەن.

«بۇل جاعداي بۇكىل كوماندانى تاڭ قالدىردى. وعان: «ول ءسىزدى حالىق الدىندا قورلادى عوي، كەلەكە ەتتى» دەگەندە، ول: «قويىڭىزدارشى، بۇل كارىلىك، ايتا بەرسىن. ول حالىقتىڭ اناسى عوي»، – دەپ جاۋاپ بەرگەن. بۇل – ناعىز ادامگەرشىلىكتىڭ بەلگىسى»، – دەپ جازدى گۇلزيرا ايداربەكوۆا.