InfoHub Logo

«حابار» تەلەارناسىنىڭ ءانشى جاسۇلان بازاربايەۆتىڭ ەرەكشە قاجەتتىلىگى بار قىزىنا قاتىستى كورسەتكەن باعدارلاماسى قوعامدا قىزۋ پىكىرتالاس تۋدىردى. ارنانىڭ قىزدىڭ بەينەجازباسىن كورسەتىپ، اكەسىن تىكەلەي ەفيردە جىلاتۋى كوپشىلىكتىڭ نارازىلىعىن تۋعىزدى.

بۇل تۋرالى Infohub.kz اقپارات اگەنتتىگى حابارلايدى.

ءانشى جاسۇلان بازاربايەۆ بۇعان دەيىن الەۋمەتتىك جەلىدە قىزىنىڭ ەرەكشە قاجەتتىلىگى تۋرالى ايتىپ، ونىڭ سويلەۋ قابىلەتىنىڭ دامۋى ءۇشىن كوپ ەڭبەك سىڭىرگەنىن جەتكىزگەن بولاتىن. ول سەگىز جىل كۇتكەن قىزى 2،5 جاستا بولعاندا دياگنوزى بارىن ءبىلىپ، سودان بەرى ەم ىزدەپ، تالاي ماماننىڭ ەسىگىن قاققانىن ايتقان ەدى. ءقازىر قىزى ون جاستان اسقان، سويلەپ، ءوز ويىن بىلدىرە الاتىن دارەجەگە جەتكەن.

ەفيردەگى جاعداي جۇرتشىلىقتى اشۋلاندىردى

جۋرناليست ءانشىنىڭ نازارىن ەكرانعا اۋدارعاندا، كىشكەنتاي قىزدىڭ اكەسىنە دەگەن سۇيىسپەنشىلىگىن بىلدىرگەن ۆيدەوسى كورسەتىلدى. بۇل كورىنىس ءانشىنى تولقىتىپ، كوزىنە جاس الدىردى. الايدا، جەلى قولدانۋشىلارى بۇل ارەكەتتى تىم ەرسى جانە ادامگەرشىلىككە جاتپايتىن جاعداي دەپ باعالاپ، ارنانىڭ بۇل ارەكەتىنە قاتتى اشۋلاندى. ولار مۇنداي جاعدايدى كورسەتۋ ارقىلى ارنانىڭ جاۋاپسىزدىعىن كورسەتكەنىن ايتتى.

«حابار» ارناسىنىڭ بۇعان دەيىنگى داۋلى جاعدايلارى

ايتا كەتەيىك، بۇل «حابار» ارناسىنىڭ قوعامدا رەزونانس تۋدىرعان العاشقى جاعدايى ەمەس. بۇعان دەيىن ارنا تۇرمىستىق زورلىق-زومبىلىق كورگەن ايەلدى توك-شوۋعا شاقىرىپ، ونىڭ كەلىسىمىنسىز، بەتىن جاباتىنىنا ۋادە بەرىپ، كۇيەۋىن ەفيرگە شىعارعان بولاتىن. بۇل جاعداي جابىرلەنۋشىگە اۋىر ءتيىپ، ۇلكەن داۋعا ۇلاسىپ، قوعامنىڭ قىزۋ تالقىسىنا تۇسكەن ەدى.