InfoHub Logo

كورنەكتى اقىن تەمىرحان مەدەتبەكتى ەسكە الۋعا ارنالعان جىلدىق اسقا الماتىدا قوعام جانە مادەنيەت قايراتكەرلەرى جينالدى. بۇل شاراعا بۇرىنعى مەملەكەتتىك جانە قوعام قايراتكەرى يمانعالي تاسماعامبەتوۆ تە قاتىسىپ، ءسوز سويلەدى.

بۇل تۋرالى Infohub.kz اقپارات اگەنتتىگى حابارلايدى.

جازۋشىلار وداعىنىڭ مۇشەسى سەرىك سەيتمان الەۋمەتتىك جەلىدە بولىسكەن ۆيدەودا جيىننىڭ جوعارى دەڭگەيدە وتكەنى كورىنەدى. ونىڭ ايتۋىنشا، بۇل كەش اقىننىڭ رۋحىنا تاعزىم ەتىپ، ونى قۇرمەتپەن ەسكە الۋعا ارنالعان اسەرلى شارا بولدى.

رۋحاني جيىنعا بەلگىلى تۇلعالار كەلدى

اقىننىڭ جىلدىق اسىنا اقۇشتاپ باقتىگەرەيەۆا، قازىبەك يسا، ۇلىقبەك ەسداۋلەت جانە اسحات ورالوۆ سياقتى زيالى قاۋىم وكىلدەرى دە قاتىستى. سەرىك سەيتمان مارقۇم اقىننىڭ ءتىرى كەزىندە كورسەتكەن قولداۋى ءۇشىن ونى ەرەكشە قۇرمەتپەن ەسكە الۋ قاجەتتىگىن ايتىپ، بۇل شارانى ۇيىمداستىرۋدى ازاماتتىق پارىزىم دەپ بىلگەنىن جەتكىزدى.

اقىننىڭ شىعارماشىلىق مۇراسى ناسيحاتتالدى

شارا بارىسىندا تەمىرحان مەدەتبەكتىڭ شىعارماشىلىعىنا ارنالعان جاڭا كىتاپتار تانىستىرىلىپ، قاتىسۋشىلارعا تاراتىلدى. اتاپ ايتقاندا، سەرىك تاۋكەبايەۆتىڭ "كوك تۇرىك – تەمىرحان" جانە راقىمعالي قۇل-مۇحاممەدتىڭ "اقيقاتتىڭ الداسپانى" اتتى ەڭبەكتەرى كوپشىلىككە ۇسىنىلدى. جينالعاندار اقىننىڭ قازاق ادەبيەتىندەگى ورنى ەرەكشە ەكەنىن جانە ونىڭ شىعارماشىلىق مۇراسى ۇلت رۋحانياتى ءۇشىن ماڭىزدى ەكەنىن اتاپ ءوتتى.