InfoHub Logo

تانىمال تەلەجۇرگىزۋشى ءلايلا سۇلتان قىزى الەۋمەتتىك جەلىدە ينتيمدىك سيپاتتاعى فوتو مەن ۆيدەولاردىڭ تارالۋىنا قاتىستى الاڭداۋشىلىق ءبىلدىرىپ، جاستارعا ماڭىزدى ەسكەرتۋ جاسادى. ول مۇنداي ماتەريالداردىڭ ەشقاشان ماحابباتتىڭ دالەلى بولا المايتىنىن، كەرىسىنشە، بولاشاقتا وزدەرىنە قارسى قولدانىلۋى مۇمكىن ءقاۋىپتى قۇرالعا اينالۋى ىقتيمال ەكەنىن ايتتى.

بۇل تۋرالى Infohub.kz اقپارات اگەنتتىگى حابارلايدى.

جەكە مالىمەتتەردىڭ ءقاۋپى

سۇلتان قىزىنىڭ ايتۋىنشا، قازىرگى قوعامدا ادام تۋرالى جەكە مالىمەتتەردىڭ تەلەفوندا ساقتالۋى جانە ونىڭ تاراپ كەتۋى ۇلكەن ءقاۋىپ توندىرەدى. «قازىرگى تاڭدا ەڭ ءقاۋىپتى نارسە – قارۋ ەمەس، ادام تۋرالى «كومپروماتتىڭ» تەلەفوندا ساقتالۋى مەن ونىڭ تاراتىلۋى. جەكە شەكارا، رۇقسات، ەتيكا دەگەن ۇعىمدار جويىلىپ بارادى. بۇرىن «جانىم» دەگەن ادام، كەيىن اشۋىمەن، حايپ ءۇشىن نەمەسە ابايسىزدا ءسىزدىڭ ەڭ ءالسىز جەرىڭىزگە سوققى بەرە الادى»، – دەيدى ول.

ماحاببات پەن مانيپۋلياسيا

تەلەجۇرگىزۋشى ماحابباتقا سەنۋگە بولاتىنىن، ءبىراق ءوز قاۋىپسىزدىكتى ەشقاشان ۇمىتپاۋ كەرەكتىگىن باسا ايتتى. «ينتيمدىك فوتو، ۆيدەو، پارول، جەكە حاتتار – بۇلاردىڭ ەشقايسىسى دا بىرەۋگە دالەلدەيتىن ماحاببات ەمەس. بۇل – ەرتەڭگى كۇنى ءسىزدىڭ وزىڭىزگە قارسى قولدانىلۋى مۇمكىن قۇرال. «ماعان سەنبەيسىڭ بە؟»، «مەن ەشكىمگە كورسەتپەيمىن»، «ءبىز وتباسى بولامىز عوي» دەگەن سوزدەرگە سەنىپ، مانيپۋلياسيا مەن شانتاجدىڭ قۇربانى بولماڭىزدار. ماحاببات دالەلدەۋدى سۇرامايدى. ءوزىڭىزدى قورعاڭىز، ءوزىڭىزدى سىيلاڭىز. سەبەبى ينتەرنەتكە كەتكەن كەز كەلگەن اقپارات ەشقاشان تولىق وشپەيدى»، – دەپ كەڭەس بەردى ءلايلا سۇلتان قىزى.

زاڭدى جاۋاپكەرشىلىك

سونىمەن قاتار، ول زاڭ تالاپتارىن دا ەسكە سالدى. «بىرەۋدىڭ ينتيمدىك فوتو نەمەسە ۆيدەوسىن رۇقساتسىز تاراتۋ – قىلمىس. مۇنداي ارەكەتتەر ءۇشىن زاڭ الدىندا جاۋاپكەرشىلىك قاراستىرىلعان»، – دەپ قورىتىندىلادى ول.