InfoHub Logo

بيىل جاز ايىندا قازاقستاندىقتار يپوتەكا نارىعىنداعى جاڭا وزگەرىستەرگە بايلانىستى باسپانالى بولۋ مۇمكىندىگىن قايتا قاراستىرۋدا. شىلدە ايىنان باستاپ يپوتەكالىق نەسيەلەر بويىنشا جىلدىق ءتيىمدى سىياقى مولشەرلەمەسىنىڭ شەكتى دەڭگەيى 25%-دان 20%-عا دەيىن تومەندەيدى. بۇل وزگەرىس تەك الداعى ۋاقىتتا راسىمدەلەتىن يپوتەكالارعا قاتىستى بولادى.

بۇل تۋرالى Infohub.kz اقپارات اگەنتتىگى حابارلايدى.

يپوتەكا تالاپتارىنىڭ وزگەرۋى

بۇعان دەيىن يپوتەكا بويىنشا ەكى ءتۇرلى ستاۆكا بەلگىلەنگەن بولاتىن: ەگەر باستاپقى جارنا 30%-دان اسسا، مولشەرلەمە 20% بولادى، ال جارنا 30%-دان از بولسا – 25% بولادى. الايدا، بۇل ماسەلە بويىنشا تۇپكىلىكتى شەشىم ءالى جاريالانباعان ەدى. جاڭا ەرەجە بويىنشا، بانكتەر ەندى يپوتەكالىق نەسيەنى 20%-دان جوعارى مولشەرلەمەمەن بەرە المايدى.

نارىق ساراپشىلارىنىڭ پىكىرى

ساراپشىلاردىڭ ايتۋىنشا، مولشەرلەمەلەردىڭ تومەندەۋى نەسيە بەرۋ تالاپتارىنىڭ قاتاڭداۋىمەن قاتار جۇرەدى. بانكتەر ەندى تەك تولەم قابىلەتى جوعارى، سەنىمدى قارىز الۋشىلارمەن جۇمىس ىستەۋگە باسىمدىق بەرەدى. بۇل يپوتەكانىڭ قولجەتىمدىلىگىن تومەندەتۋى مۇمكىن. الايدا، سەنىمدى قارىز الۋشىلار ءۇشىن جاعداي جاقسارادى، ويتكەنى پايىزدىق مولشەرلەمەلەر تومەندەيدى.

«يپوتەكالىق تالاپتاردىڭ قاتاڭداتىلۋى، ەگەر ول ادامدار كوپ قاتىساتىن يپوتەكاعا قاتىستى بولسا، ارينە، سۇرانىستى تۇسىرەدى. بۇل ءۇي باعاسىن تۇسىرەدى دەپ ايتا الماسام دا، ءۇيدىڭ قىمباتتاۋ قارقىنىن توقتاتادى. بىزدە تۇرعىن ءۇيدىڭ جىل سايىن 6-7 پايىزعا نەمەسە ينفلياسيا دەڭگەيىندە 11-12 پايىزعا قىمباتتاۋ قارقىنى بار. بارلىق نارىقتاعى نەگاتيۆتى وزگەرىستەر ءۇيدىڭ باعاسىن ارزانداتپايدى، ءبىراق قىمباتتاۋدى توقتاتادى. باعا دا ءبىر ورىندا قالىپ قويادى. بۇل ستاگناسيا دەپ اتالادى، سوندا ينفلياسيانىڭ وسۋىنەن باعانىڭ ءوسۋى قالادى»، – دەيدى ساراپشى ايبار ولجاي.

باستاپقى جارنانىڭ ماڭىزى

ساراپشىلار باستاپقى جارنانىڭ ماڭىزدىلىعىن اتاپ وتەدى. جارنانى جيناي العان ادام ءوزىنىڭ اقشا جيناۋ مۇمكىندىگىن كورسەتەدى، بۇل ونىڭ يپوتەكا جۇيەسىنە كىرۋىنە جول اشادى. ەگەر ادام باستاپقى جارنانى جيناي الماسا، ونىڭ يپوتەكانى قالاي تولەيتىنى تۋرالى سۇراق تۋىندايدى. تاۋەكەلى جوعارى كليەنتتەرگە كوبىرەك پروسەنتپەن قىمباتىراق نەسيە بەرىلۋى مۇمكىن، سەبەبى ولاردىڭ كەز كەلگەن ۋاقىتتا تولەمەي قالۋ ءقاۋپى ەسكەرىلەدى.

قارجىلىق جاعدايى تۇراقتى جانە باستاپقى جارناسى جەتكىلىكتى ادامدارعا ءۇيدى ءقازىر ساتىپ الۋ ءتيىمدى بولۋى مۇمكىن. ال ەگەر قازىرگى جاعداي مۇمكىندىك بەرمەسە، يپوتەكا اي سايىنعى بيۋدجەتكە اۋىر سالماق سالسا، نەسيە الۋ شەشىمى دۇرىس بولماۋى ىقتيمال.