InfoHub Logo

اقش-تا تۇراتىن يراننىڭ سوڭعى شاھىنىڭ ۇلى رەزا پەحليەۆي، امەريكاندىق پرەزيدەنت دونالد ترامپتى يرانداعى جاعدايعا تەزىرەك ارالاسىپ، رەجيمگە قارسى ادامداردىڭ ءومىرىن قۇتقارۋعا شاقىردى. بۇل تۋرالى DW باسىلىمىنا سىلتەمە جاساعان Tengrinews.kz حابارلادى.

«يراندا كۇن سايىن ودان دا كوپ يراندىقتار ءولىپ جاتىر»، - دەدى پەحليەۆي سەنبى كۇنى ميۋنحەن قاۋىپسىزدىك كونفەرەنسياسىندا نارازىلىق بىلدىرۋشىلەرگە جاسالعان قاتىگەزدىك تۋرالى ايتا كەلە.

ونىڭ ايتۋىنشا، تەگەرانداعى ۇكىمەتتى تەزىرەك قۇلاتۋ – باستى ماقسات، ويتكەنى قازىرگى باسشىلىق ۋاقىتتى سوزدىرۋ ءۇشىن كەلىسسوزدەردى پايدالانىپ وتىر.

«سىزدەر ۇلكەن اسكەردى جۇمىلدىرىپ، زورلىق-زومبىلىقتىڭ ۋاقىتى اياقتالىپ كەلە جاتقانىن ايقىن كورسەتتىڭىزدەر»، - دەدى پەحليەۆي اقش پرەزيدەنتىنە جانە يراندىق نارازىلار ترامپتى ەستىگەنىن جانە وعان سەنگەنىن ايتتى.

ونىڭ سوزىنە قاراعاندا، ترامپ ەگەر شەشۋشى اسكەري ارەكەتتەرگە بارسا، الەمنىڭ ەڭ ۇلى باتىرلارىنىڭ ءبىرى رەتىندە تانىلا الار ەدى.

«ادامدار ءالى دە قارسىلىق كورسەتۋدە. وكىنىشكە وراي، رەجيم تۇرمەگە جابۋ ناۋقانىن جالعاستىرۋدا»، - دەدى ول، دەمونسترانتتاردىڭ كوشەگە قايتا شىعۋ ءۇشىن شەتەلدەن قولداۋ قاجەت ەكەنىن ايتتى.

«يسلام رەسپۋبليكاسىن توقتاتۋدىڭ ۋاقىتى كەلدى. بۇل تالاپتى ءوز ەلىنىڭ قانىن توككەن، بىزدەن رەجيمدى تۇزەتۋدى ەمەس، ونى جەرلەۋگە كومەكتەسۋدى سۇراعان وتانداستارىم ايتىپ جاتىر»، - دەدى سوڭعى يراندىق شاحتىڭ ۇلى.

62ء-شى ميۋنحەن قاۋىپسىزدىك كونفەرەنسياسى باۆاريا استاناسىندا 13-15 اقپان ارالىعىندا ءوتتى. كونفەرەنسياعا 60-تان استام مەملەكەت جانە ۇكىمەت باسشىلارى، شامامەن 100 ەلدىڭ قورعانىس مينيسترلەرى قاتىستى.

جۇما كۇنى، 13 اقپاندا، اقش اكىمشىلىگىنىڭ ەكى وكىلى Reuters اگەنتتىگىنە اقش اسكەريلەرى يرانعا قارسى بىرنەشە اپتاعا سوزىلۋى مۇمكىن وپەراسياعا دايىندىق جۇرگىزىپ جاتقانىن حابارلادى. جوسپارلاۋ ترامپتىڭ يسلام رەسپۋبليكاسىندا بيلىكتى اۋىستىرۋ نيەتى تۋرالى مالىمدەمەسىنەن كەيىن كۇشەيدى.

اق ءۇي بۇعان دەيىن تاياۋ شىعىسقا ەكىنشى اۆياتاسىمالداۋشى كەمەسىن، سونداي-اق جويعىش ۇشاقتاردى، ەسمينەستەردى جانە مىڭداعان اسكەري قىزمەتكەرلەردى جىبەرگەنىن حابارلادى. ترامپ جۇما كۇنى تەگەراندى ەسكەرتىپ، يادرولىق كەلىسىم بويىنشا كەلىسسوزدەر ءساتسىز اياقتالسا، ەل ءۇشىن «جامان كۇن بولاتىنىن» ايتتى.