InfoHub Logo

يتالياداعى وليمپيادادا تەمىرجولعا ديۆەرسيا جاسالدى

يتاليادا ءوتىپ جاتقان 2026 جىلعى قىسقى وليمپيادا ويىندارىندا تەمىرجولعا جاسالعان ديۆەرسيا سالدارىنان پويىزداردىڭ قوزعالىسى ۋاقىتشا توقتاتىلدى. بۇل تۋرالى Infohub.kz اقپارات اگەنتتىگى حابارلايدى.

وقيعا 7 اقپاندا، سەنبى كۇنى بولدى. بەلگىسىز بىرەۋلەر يتاليانىڭ سولتۇستىگىندەگى تەمىرجولعا ديۆەرسيا جاسادى. سالدارىنان جوعارى جىلدامدىقتى جانە ايماقتىق پويىزداردىڭ كەشىگۋى 2،5 ساعاتقا دەيىن جەتتى.

تەرگەۋ مالىمەتتەرى

يتاليا پوليسياسىنىڭ مالىمەتىنشە، ديۆەرسيالىق ارەكەتتەر ءۇش جەردە تىركەلگەن. 7 اقپانعا قاراعان تاڭەرتەڭ ادرياتيكا جاعالاۋىنداعى پەزارو قالاسىنىڭ ماڭىنداعى ەلەكتر قالقانىنا وت قويىلعان. بولونيادا بەلگىسىز بىرەۋلەر پويىزدىڭ جىلدامدىعىن ولشەيتىن كابەلدى كەسىپ تاستاعان. بولونيا مەن پادۋيا قالالارىنىڭ اراسىنداعى تەمىرجول ۋچاسكەسىندە قاراپايىم جارىلعىش زات تابىلدى.

يتاليانىڭ Ferrovie dello Stato (FS) مەملەكەتتىك تەمىرجول كومپانياسىنىڭ حابارلاۋىنشا، جوعارى جىلدامدىقتى پويىزدار وتەتىن بولونيا ۆوكزالى ۋاقىتشا جابىلدى. FS كومپانياسى ەلەكتر قالقانىنداعى ءورت پەن كابەلدىڭ زاقىمدالۋىنا تەحنيكالىق اقاۋلار سەبەپ بولۋى مۇمكىن دەگەندى جوققا شىعاردى.

قازىرگى ۋاقىتتا پوليسيانىڭ تەرروريزمگە قارسى بولىمشەسى تەرگەۋدى جۇرگىزىپ جاتىر. بارلىق جاعدايلار ءوزارا بايلانىستى سياقتى، ءبىراق ازىرگە ەشكىم جاۋاپكەرشىلىكتى ءوز موينىنا المادى.

بولونيا – يتاليانىڭ وڭتۇستىگى مەن سولتۇستىگىن بايلانىستىراتىن ماڭىزدى تەمىرجول تورابى، سونداي-اق وليمپيادا ويىندارىن وتكىزەتىن قالالارعا: ميلان مەن كورتينا-د'امپەسسوعا باراتىن باعىتتار ءۇشىن دە ماڭىزدى.

كۇننىڭ ەكىنشى جارتىسىندا يتالياداعى تەمىرجول قاتىناسى بىرتىندەپ قالپىنا كەلتىرىلدى. Dpa اگەنتتىگىنىڭ حابارلاۋىنشا، پوليسيانىڭ تەرروريزمگە قارسى بولىمشەسى تەرگەۋگە تارتىلدى. يتاليانىڭ كولىك مينيسترلىگى بۇل وقيعانى «ديۆەرسيانىڭ اۋىر جاعدايى» دەپ اتادى.

قىسقى وليمپيادا ويىندارى 7 اقپاندا يتاليادا باستالدى. قازاقستان قۇراماسى ويىنداردا ون سپورت تۇرىنەن سىنعا تۇسەتىن 36 سپورتشىمەن وكىلدىك ەتەدى.