InfoHub Logo

جامبىل وبلىسىندا تابيعاتتىڭ توسىن مىنەزى سالدارىنان توتەنشە جاعداي رەجيمى ەنگىزىلدى. قاتتى جەلدەن بولعان زارداپتاردى باعالاۋ جانە زاقىمدالعان نىسانداردىڭ جاي-كۇيىن تەكسەرۋ ءۇشىن وبلىس اكىمىنىڭ ءبىرىنشى ورىنباسارى نۇرجان كالەندەروۆ وقيعا ورنىنا باردى.

بۇل تۋرالى Infohub.kz اقپارات اگەنتتىگى حابارلايدى.

تابيعي اپاتتىڭ سالدارى

اقپاراتقا سۇيەنسەك، 21 اقپاندا جامبىل وبلىسىنىڭ بىرنەشە ەلدى مەكەنىن قامتىعان قاتتى جەل سالدارىنان ۇيلەر مەن الەۋمەتتىك نىساندار زاقىمدالعان. ت. رىسقۇلوۆ اۋدانىندا جەل 29 نىساننىڭ شاتىرىن جۇلىپ اكەتكەن، ونىڭ 10-ى الەۋمەتتىك مەكەمەلەر. 19 ەلدى مەكەندە ەلەكتر قۋاتى ۋاقىتشا توقتاتىلىپ، جەتى ەلدى مەكەندە گازبەن جابدىقتاۋ دا قيىندىق تۋدىرعان. مەركى اۋدانىندا دا 27 تۇرعىن ءۇيدىڭ شاتىرى مەن بەس مەكتەپتىڭ قاسبەتى زاقىمدالدى. سەگىز ەلدى مەكەن ەلەكترسىز قالسا، ءۇش ەلدى مەكەندە گاز جەلىلەرى زارداپ شەككەن. قازىرگى ۋاقىتتا قۇرباندار مەن زارداپ شەككەندەر تۋرالى اقپارات جوق.

قالپىنا كەلتىرۋ جۇمىستارى

وبلىس اكىمىنىڭ ءبىرىنشى ورىنباسارى نۇرجان كالەندەروۆ جەدەل شتابتىڭ وتىرىسىن وتكىزىپ، ناقتى تاپسىرمالار بەردى. ونىڭ ىشىندە ەلەكتر جانە گازبەن جابدىقتاۋدى باسىمدىقپەن قالپىنا كەلتىرۋ، قۇلاعان اعاشتار مەن زاقىمدالعان قۇرىلىستاردى تازارتۋ، مەكتەپتەردە بالالاردىڭ قاۋىپسىزدىگىن قامتاماسىز ەتۋ جانە جۇمىستاردى ساپالى ءارى ۋاقىتىلى اياقتاۋ مىندەتتەلدى. ت. رىسقۇلوۆ اۋدانىندا ءبىرقاتار نىسانداردا جەرگىلىكتى توتەنشە جاعداي جاريالاندى. كەلتىرىلگەن شىعىننىڭ كولەمىن انىقتاۋ جۇمىستارى جالعاسۋدا. ەلەكتر جانە گازبەن جابدىقتاۋدى قالپىنا كەلتىرۋ ءۇشىن 10 بريگادا جۇمىلدىرىلىپ، جوندەۋ جۇمىستارى مارەسىنە جاقىنداپ قالدى.

«جاعداي وبلىس اكىمىنىڭ جەكە باقىلاۋىندا، ال تۇرعىندار كوممۋنالدىق قىزمەتتەردىڭ تولىق قولداۋىنا سەنە الادى»، - دەپ حابارلادى جامبىل وبلىسى اكىمىنىڭ باسپا ءسوز قىزمەتى.