InfoHub Logo

اتىراۋ قالاسى، № 23 ورتا مەكتەبىنىڭ
ورىس ءتىلى ءپانى ءمۇعالىمى بوزجيگيتوۆا لياززات كوناكبايەۆنا

تاقىرىبى: جاقسىلىق جاساۋ ءوز قولىڭدا (سلايدىمەن)
ماقساتى: وقۋشىلاردىڭ جاقسىلىق قۇندىلىعى تۋرالى، «جاقسى ادام» تۋرالى تۇسىنىكتەرىن كەڭەيتۋ جانە جاقسىلىق پەن جاماندىقتىڭ قاتار ءجۇرىپ ادام ومىرىندە سان قيلى بەلەڭ كورسەتەتىنىن ۇعىندىرۋ.
مىندەتتەرى: - جاقسىلىقتىڭ ادام ومىرىندەگى ءمانى جانە جاقسىلىق جاساۋدىڭ قۋانىش اكەلەتىندىگىن سەزىندىرۋ، جاقسىلىقتى ءتۇسىنۋ، جاقسىلىق جاساۋعا تاربيەلەۋ.

تاربيە ساعاتى سىن تۇرعىسىنان ويلاۋ تەحنولوگياسى بويىنشا قۇرىلعان

ءجۇرۋ بارىسى
1. ۇيىمداستىرۋ ءبولىمى
الدىمەن وقۋشىلارعا وزدەرىنە ۇناعان تۇستەرىن تاڭداۋىن سۇرايمىن (مەن ءۇش توپقا بەس وقۋشىدان ءبولدىم: سارى، جاسىل، قىزىل پىشىندەر) سول تۇستەر بويىنشا توپقا بولىنەدى.
وي شاقىرۋ
ءمۇعالىم ءسوزى: بالالار، بۇگىنگى تاقىرىپتى ايتپاس بۇرىن، مەن سىزدەرگە مىنا سلايد شوۋدى ءمان بەرىپ قاراۋدى سۇرايمىن. سودان كەيىن وزدەرىڭ تاقىرىپتى تاباتىن بولاسىزدار. (جاي مۋزىكا ءجۇرىپ تۇرادى، سلايد كورسەتىلەدى)
ال، بۇگىنگى تاربيە ساعاتىمىزدىڭ نەگىزگى تاقىرىبى نە بولماق، قالاي ويلايسىزدار؟ (بالالاردىڭ جاۋاپتارى تىڭدالادى)
دۇرىس ايتتىڭدار، بۇگىن بىزدەر جاقسىلىق تۋرالى ءسوز قوزعايمىز. الدىمەن مەن سەندەرگە ءبىر سۇراق قويامىن، سول سۇراقتىڭ جاۋابىن ىزدەپ كورەسىزدەر. («ارالاس، قاتىپ قوزعالما، توپتاس» ءادىسى بويىنشا وتكىزىلەدى. وقۋشىلار قولدارىنا قالام مەن قاعازدارىن الىپ شىعادى دا ءبىر مينۋت ىشىندە مالىمەت جازىپ الۋ كەرەك)
سۇراق: جاقسى ادام دەگەن قانداي ادام؟
ءمۇعالىم «ارالاس» دەگەندە وقۋشىلار بولمە ىشىندە ارلى بەرلى ءجۇرىپ، ارالاسىپ «جاقسى ادام دەگەن كىم؟» سۇراعىنا جاۋاپ الىپ، قاعازدارىنا جاۋاپتارىن جازادى.
«قاتىپ، قوزعالما» دەگەندە ورنىندا تۇرىپ قالادى. ءمۇعالىم بىرنەشە وقۋشىنىڭ جاۋابىن تىڭدايدى.
«توپتاس» دەگەندە ءوز توپتارىنا وتىرادى.
ءمۇعالىم: راحمەت، مەن دە ءوز جاۋابىمدى ايتايىن:
جاقسى كىسى دەپ سوزىنەن ءىسى كورىنەتىن، ايتقان ءسوزىن كەيىننەن ءوزى ۇستاناتىن كىسىنى ايتادى. جاقسى كىسى تۇسىنۋگە تىرىسادى، ءبىراق ودان پايدا ىزدەمەيدى. جاي ادام پايدا ىزدەيدى، ءبىراق تۇسىنۋگە تىرىسپايدى. ادام دۇنيەگە ەشتەمە قالاپ كەلمەيدى. جاقسى مەن جاماندى وسكەن سوڭ ءوزىڭ قالاپ الاسىڭ. جاقسىلىق پەن جاماندىق ادامنىڭ ءىس - ارەكەتى ارقىلى ولشەنەدى. حالقىمىز «جاقسىلىق» دەگەن ۇعىمدى ادامگەرشىلىككە بالاعان. ادامگەرشىلىگى مول ادامدى «جاقسى ادام» دەگەن. ەندەشە جاقسىلىق پەن جاماندىق تۋرالى ويلانىپ كورەيىك. وقۋشىلارعا سۇراق قويىلادى:
- جاقسىلىق، جاماندىق دەگەن ۇعىمداردى قالاي تۇسىنەسىزدەر؟
- جاقسى بولۋ، جاقسىلىق جاساۋدى قالاي ۇيرەنۋگە بولادى؟
- جاقسى ءسوز ايتۋ، جاقسىلىققا جاتا ما؟
- جاقسىلىق جاساۋ ادام جاسىنا بايلانىستى ما؟
- جاقسى ادامنىڭ بويىندا قانداي قاسيەتتەر بولادى؟
ءمۇعالىم: راحمەت، جاقسى ويلارىڭدى ايتتىڭدار. ەندى ءار توپقا تاپسىرما بەرەمىن.
توپتاستىرۋ نەمەسە كلاستەر ستراتەگياسى بويىنشا
ءى توپ: «جاقسىلىق» دەگەن سوزگە
ءىى توپ: «جاماندىق» دەگەن سوزگە
ءىىى توپ: جاقسىلىق پەن جاماندىق تۋرالى ماقال ماتەل جازۋ
ماعىنانى تانۋ كەزەڭى
ءمۇعالىم: ادامنىڭ ىشكى سۇلۋلىعى — ادامنىڭ جۇرەگى، جۇرەك جىلۋى، ماحاببات، ار - ۇيات، قايرات، مەيىرىمدىلىك، جاقسىلىق، ادامشىلىق وسى جۇرەكتەن تۋىندايدى. ويىمىزدى ءارى قاراي ءوربىتۋ ءۇشىن ماتىنمەن جۇمىس جۇرگىزەمىز.
ءار توپقا ءۇش ءتۇرلى ءماتىن تاراتىلادى.
ءى توپ: «جاقسىلىق سىنىقتارى» ءماتىنى (قوسىمشانى قارا)
سۇراقتار:
بۇل اڭگىمەدەن كەيىن قانداي سەزىمدە بولدىڭدار؟
سەندەر قالاي ويلايسىڭدار، اجە نەلىكتەن كوپ جىلدار بويى اينەك سىنىقتارىن جيناپ ءجۇردى؟
ەگەر دە ادامدار اجەنىڭ نە ىستەپ جۇرگەنىن بىلگەندە نە ىستەر ەدى؟
ءىى توپ: «ۇستاز اقىلى» (قوسىمشانى قارا)
سۇراقتار:
ۇستازىنىڭ جاۋابىن شاكىرتتەرى ءتۇسىندى مە؟
ادامدار نەگە جاماندىققا تەز ءۇيىر بولادى، قالاي ويلايسىڭدار؟
مەن جاڭا ايتىپ كەتتىم، ادامنىڭ ىشكى سۇلۋلىعى — ادامنىڭ جۇرەگى، جۇرەك جىلۋى، ماحاببات، ار - ۇيات، قايرات، مەيىرىمدىلىك، جاقسىلىق، ادامشىلىق وسى جۇرەكتەن تۋىندايدى دەپ، جۇرەگىمىزدى جاماندىق جاۋىپ تاستاسا ءبىز قالايشا جاقسى ادام بولامىز. سوندىقتان دا بۇل اڭگىمەدەن نە تۇيۋگە بولادى؟
ءىىى توپ: «ەكى قاسقىر» اڭگىمەسى (قوسىمشانى قارا)
- اتا ەكى قاسقىر دەپ نەنى مەڭزەپ وتىر؟
جاماندىق پەن جاقسىلىق ومىردە بىرگە جۇرەدى ەكەن. ال قايسىسى جەڭەدى؟ جاقسىلىق جەڭۋ ءۇشىن ادام نە ىستەۋ كەرەك؟
- وسى ءۇش ءماتىندى ءبىر بىرىمەن بايلانىستىرۋعا بولا ما؟ ۇشەۋى ءبىر ءبىرىن تولىقتىرىپ تۇر ما؟
الدارىڭىزدا بىرنەشە ماقالدار، ناقىل سوزدەر جازىلعان پاراق جاتىر. ويلانىپ، سونىڭ ىشىندەگى قايسىسى ءوز ماتىندەرىڭە بايلانىسى بار دەپ ويلايسىزدار. ەگەر دە بايلانىسى بار دەسەڭدەر، سول ماقالدىڭ تۇسىنا بەلگى سالىڭىزدار.