InfoHub Logo

ۇكىمەت ۇيىندەگى كەزەكتى وتىرىس ەرەكشە ساتپەن ەستە قالدى. پرەمەر-مينيستر ولجاس بەكتەنوۆ جاساندى ينتەللەكت جانە سيفرلىق دامۋ ۆيسە-مينيسترى روستيسلاۆ كونياشكيننىڭ ارەكەتىنە ءسۇيسىنىپ، ونى ارىپتەستەرىنە ۇلگى ەتتى. شەنەۋنىكتىڭ مەملەكەتتىك تىلدە مۇدىرمەي سويلەۋى ۇكىمەت باسشىسىنىڭ نازارىنان تىس قالمادى.

روستيسلاۆ كونياشكين مىنبەرگە كولىك-ترانزيت سالاسىن سيفرلاندىرۋ ماسەلەلەرى بويىنشا بايانداما جاساۋعا شىققان بولاتىن. كوپشىلىك ونى ادەتتەگىدەي رەسمي تىلدە سويلەيدى دەپ كۇتكەنىمەن، ۆيسە-مينيستر ءسوزىن باستان-اياق قازاق تىلىندە جەتكىزدى.

مۇنى كورگەن ولجاس بەكتەنوۆ ريزاشىلىعىن جاسىرمادى.

«جاقسى، قازاقشا باياندادىڭىز. دۇرىس، ۇيرەنۋ كەرەك»، — دەدى پرەمەر-مينيستر قىسقا ءارى نۇسقا قايىرىپ.

بايانداما نە تۋرالى بولدى؟

ۆيسە-مينيستردىڭ سوزىنشە، ەلىمىزدە سيفرلاندىرۋ قارقىندى ءجۇرىپ جاتىر. قازىرگى تاڭدا كولىك-ترانزيت سالاسىنداعى 38 مەملەكەتتىك قىزمەتتىڭ بارلىعى تولىعىمەن ونلاين فورماتقا كوشكەن.

ستاتيستيكاعا سۇيەنسەك، 2024 جىلى كورسەتىلگەن قىزمەتتەردىڭ 94 پايىزى ەلەكتروندى تۇردە جۇزەگە اسقان. كونياشكيننىڭ پىكىرىنشە، بۇل قاراپايىم حالىق پەن بيزنەس وكىلدەرى ءۇشىن ۋاقىت ۇنەمدەۋگە جانە بيۋروكراتيانى ازايتۋعا ۇلكەن سەپتىگىن تيگىزىپ وتىر.

بەكتەنوۆتەن «بارەكەلدى» ەستىگەن العاشقى شەنەۋنىك ەمەس

ايتا كەتەيىك، بۇل مينيسترلىكتە مەملەكەتتىك تىلگە دەگەن قۇرمەت ەرەكشە جولعا قويىلعانعا ۇقسايدى. بيىلعى اقپان ايىندا ولجاس بەكتەنوۆ ءدال وسى ۆەدومستۆونىڭ تاعى ءبىر وكىلى — دميتريي مۋندى ماقتاعان ەدى (ول ءقازىر دە ۆيسە-مينيستر لاۋازىمىندا).

سول كەزدە دميتريي مۋن ۋادەسىندە تۇرىپ، بايانداماسىن مەملەكەتتىك تىلدە جاساعانى ءۇشىن ۇكىمەت باسشىسىنان «سوزىندە تۇراتىن جىگىت» دەگەن جوعارى باعا العان بولاتىن. بۇل ءۇردىس باسقا مەملەكەتتىك قىزمەتشىلەرگە دە جاقسى وي سالۋى مۇمكىن.