InfoHub Logo

قازاق ەستراداسىنىڭ تانىمال ءانشىسى ماقپال ءجۇنىسوۆا ءوزىنىڭ بۇرىنعى جارى، بەلگىلى ساياساتكەر زامانبەك نۇرقادىلوۆپەن قارىم-قاتىناسىنىڭ قالاي باستالعانى تۋرالى تىڭ دەرەكتەردى جاريالادى. ءانشىنىڭ ايتۋىنشا، ول العاشقىدا زامانبەك ءنۇرقادىلوۆتى جاقسى كورمەگەنىن جانە ءتىپتى ودان سەسكەنگەنىن جەتكىزدى.

بۇل تۋرالى Infohub.kz اقپارات اگەنتتىگى حابارلايدى.

قارىم-قاتىناستىڭ باستالۋى

ماقپال ءجۇنىسوۆا بۇل تۋرالى 2024 جىلى «Din Dina Show» باعدارلاماسىندا سۇحبات بەرگەندە ايتتى. ءانشىنىڭ سوزىنشە، زامانبەك ءنۇرقادىلوۆتىڭ وزىنە دەگەن ىقىلاسىنان كەيىن، قارىم-قاتىناستى باستاۋعا ول ءوزى ۇسىنىس جاساعان.

«مەن ول كىسىنىڭ ەسىگىن قاعىپ، «مەنى الشى» دەپ جالىنعان جوقپىن. ءتىپتى ول كىسىگە عاشىق تا بولماعانمىن. جاقسى دا كورگەن جوقپىن. زاكەڭ ءوزى دەگەنىن جاساپ، قالاۋىن ورىندادى. قولىندا بيلىگى بولدى، اينالاسىندا ءبىز قورقاتىن ادامدار بار ەدى. العاشقىدا ودان سەسكەنەتىنبىز. كەيىن سىيلاستىق ورنادى»، - دەپ ەسكە الدى ونەر يەسى.

نەكە جانە وتباسى

ءانشى زامانبەك نۇرقادىلوۆپەن نەكەلەرىنىڭ زاڭدى تۇردە بىردەن تىركەلمەگەنىن دە ايتىپ ءوتتى. ولار 1991 جىلى بىرگە تۇرا باستاعانىمەن، رەسمي نەكەگە تەك 1998 جىلى عانا وتىرعان. ماقپال ءجۇنىسوۆا قيىن ساتتەردە جارىنىڭ جانىندا قالۋ سەبەبىن دە ءتۇسىندىردى.

«ەكەۋمىز دە اكەسىز وستىك. ول دا مەن سياقتى قايىرشى بولاتىن. بيلىك تە، بايلىق تا قولدان كەتتى. مەن زاكەڭدى ۇستاعىم كەلسە، بىردەن احاج بولىمىنە بارار ەدىم. ءبىراق مەن بارماي قويدىم. جاقسى كورسەڭىز، قۇجاتسىز تۇرامىز دەدىم. 1991 جىلى شاڭىراق كوتەردىك، 1998 جىلى زاڭدى نەكەگە تۇردىق. ول ۋاقىتقا دەيىن كەتەتىن ەركەك كەتىپ قالار ەدى. ءبىراق ول كىسى قايتپاي قويدى. مەن ونىڭ جولىن بايلاعان جوقپىن»، - دەدى حالىق ءارتىسى.

ماقپال ءجۇنىسوۆا تۋرالى

ماقپال ءجۇنىسوۆا – قازاق ەستراداسىنىڭ دامۋىنا ەلەۋلى ۇلەس قوسقان، وزىندىك داۋسىمەن جانە ورىنداۋشىلىق مانەرىمەن حالىقتىڭ سۇيىسپەنشىلىگىنە بولەنگەن تۇلعا. ول 1963 جىلى قاراعاندى وبلىسىندا دۇنيەگە كەلگەن. كاسىبي ساحناداعى جولىن 1981 جىلى «قازاقكونسەرت» بىرلەستىگىندە باستاپ، كوپ ۇزاماي تانىمال بولدى. ءانشى نەبارى 22 جاسىندا «قازاقستاننىڭ ەڭبەك سىڭىرگەن ءارتىسى»، ال 31 جاسىندا «قازاقستاننىڭ حالىق ءارتىسى» اتاعىن الدى. ول تەك انشىلىك قىرىمەن عانا ەمەس، ۇستازدىق قىزمەتىمەن دە تانىمال.