InfoHub Logo

استانادا Threads الەۋمەتتىك جەلىسىندە ارمياداعى زورلىق تۋرالى جالعان جازبا جاريالاعان ازامات ۇستالدى. بۇل تۋرالى Polisia.kz سايتىنا سىلتەمە جاساپ Tengrinews.kz حابارلادى.

اقپاراتقا سۇيەنسەك، 23 اقپاندا Threads جەلىسىندە ءانونيمدى پوست جاريالانعان. وندا اۆتور ءوزىنىڭ اسكەردە قىزمەت ەتكەن كەزىندە زورلىق كورگەنىن ايتىپ، قۋدالاۋدان قورقاتىنىن مالىمدەگەن. ول ءبىر جىل بۇرىن اسكەردەن ورالعانىمەن، سول وقيعانىڭ سالدارىنان ءالى كۇنگە دەيىن ايىعا الماي جۇرگەنىن ايتقان.

جازبادا كومانديردىڭ وزىنە سەكسۋالدى سيپاتتاعى ارەكەتتەر جاساۋعا ماجبۇرلەپ، ايتپەسە جازالايتىنىن ايتىپ قورقىتقانى تۋرالى باياندالعان. اۆتور وقيعانى ەگجەي-تەگجەيلى سيپاتتاپ، كوپتەگەن قولدانۋشىلاردىڭ نازارىن اۋدارعان.

سونىمەن قاتار، ول ەلدەن كەتۋگە اسىعىس سەبەبى بار ەكەنىن ايتىپ، قارجىلاي كومەك سۇراعان. پوستقا اقشا اۋدارۋ ءۇشىن بانك رەكۆيزيتتەرى قوسا تىركەلگەن.

الداۋدىڭ قالاي اشكەرەلەنگەنى

جازبانىڭ شىنايىلىعىنا كۇمان كەلتىرگەن قولدانۋشىلاردىڭ ءبىرى پوليسياعا حابارلاسىپ، كورسەتىلگەن دەرەكتەردى تەكسەرۋدى سۇراعان. تەكسەرۋ بارىسىندا بانك شوتىنىڭ يەسى 17 جاستاعى ءجاسوسپىرىم ەكەنى انىقتالدى.

ول ءوز رەكۆيزيتتەرىن حوستەلدە تانىسقان تانىسىنا بەرگەنىن ايتتى. تانىسى ءوزىنىڭ ەسەپشوتتارىنداعى پروبلەمالارعا سىلتەپ، اۋدارىمدارعا كومەكتەسۋدى سۇراعان. ءجاسوسپىرىم ونىڭ قانداي دا ءبىر زاڭسىز ارەكەتتەرگە باراتىنىن بىلمەگەن.

ەكى كۇن ىشىندە ونىڭ شوتىنا 100-دەن استام اۋدارىم تۇسكەن.

ۇستاۋ جانە سالدارى

جەدەل-ىزدەستىرۋ شارالارى بارىسىندا جازبا اۆتورى انىقتالىپ، ۇستالدى.

«جاريالانعان اقپاراتتىڭ شىندىققا جاناسپايتىنى انىقتالدى. ونىڭ ۇستىنە، كونتەنت اۆتورىنىڭ اسكەري قىزمەتكە ەشقانداي قاتىسى جوق جانە ەشقاشان اسكەردە بولماعان. ءوز ارەكەتىمەن ول اسكەري قىزمەتتى دە قورلاعان. 23 جاستاعى قالا تۇرعىنىنىڭ ايتۋىنشا، جالعان حابارلامانى اقشا جيناۋ ماقساتىندا ادەيى تاراتقان»، - دەپ حابارلادى پوليسيا.

كورiنەۋ جالعان اقپارات تاراتقانى جانە الاياقتىق فاكتىلەرى بويىنشا قىلمىستىق ىستەر قوزعالدى. كۇدىكتى سوت سانكسياسىمەن قاماۋعا الىنىپ، ۋاقىتشا ۇستاۋ يزولياتورىنا توعىتىلدى.