بورىكتى اسپانعا اتىپ، اتتان سالىپ،
جىگىتتەر، ماقتانبالىق، ماقتانبالىق!
قاشاننان قازاق دەگەن سىرمىنەزدى،
ماقتاۋسىز دا، ماقتانسىز جاتقان حالىق.
سابىرمەن ساباق الىپ داۋىرلەردەن،
سابىرىن سارى التىننان ءتاۋىر كورگەن.
قازاققا ماقتانسىن دەپ جەر بەرمەگەن،
جەرىنىڭ كەڭدىگىندەي سابىر بەرگەن.
يىقتاسىپ تۇرسىن دەپ ەلدەرمەنەن،
قازاققا مولشىلىقتى كەم بەرمەگەن،
الايدا، اتا-قازاق ماقتانۋدى،
ءالىمساقتان بەر قاراي ءجون كورمەگەن.
داۋلەت شالقىپ، ىرىسى اسقانىندا،
قاقىسى بار قازاقتىڭ ماقتانۋعا.
داراقى بوپ قازاعىم كەتپەسىن دەپ،
سابىرى تۇر، كۇزەتىپ ارت جاعىندا.
ىرگەلى قازاق بولدىق. ساقتار قالىپ،
قۇس مىندىك تەمىر قانات، اتتار قالىپ،
ايتسە دە، ماقتانبالىق، ماقتانبالىق!..
ۇلپىلدەگەن، ۇرپيگەن ۇكىم مەنىڭ،
جىل قۇستارىن ساعىنىپ، كۇتۋدەمىن.
كوز الماي شۇباتىلعان قۇس جولىنان،
بۇكىل ەلىم كۇتۋدە، بۇكىل جەرىم.
قىرلارىم دا كۇتۋدە، دوڭدەرىم دە،
ساعىنادى بىزبەنەن كول دە بىرگە.
ۇكىم مەنىڭ، قاراشى، جىل قۇستارى
كەلەدى ەكەن قايسى ەندىك بەلدەۋىندە.
قاراتورعاي، قارلىعاش، تىرنالارىم،
قاشان بىزگە اكەلەر جىل حابارىن؟
قاشان قونار زەرگەرلەر - اققۋ، قازدار
اشەكەيلەپ كولدەرىن، جىلعالارىن.
قاشان بولار توعايدا ءان ساباعى،
ءان سالادى، قاشان كەپ جان سالادى؟
قاشان مىناۋ جايقالىپ ەمەن، تەرەك،
جاپىراقتار جابىلا قول سوعادى؟
ايلار ءوتتى قولىما قونعانىنا،
ەرىكسىزدىك باسىنا ورنادى ما؟!
تۇتقىن بولىپ وتىرماي تويدا مىنا،
ورالاسىڭ سەن قاشان ورمانىڭا؟..

---