جىگىتتەر، ويىن ارزان، كۇلكى قىمبات،
ەكى ءتۇرلى نارسە عوي سىر مەن سىمبات.
ارزان، جالعان كۇلمەيتىن، شىن كۇلەرلىك
ەر تابىلسا جارايدى، قىلسا سۇحبات.

كەيبىرەۋ تىڭدار ۇيدەن شىققانىنشا،
كەيبىرەۋ قويار كوڭىل ۇققانىنشا.
ءسوز ءمانىسىن بىلەرلىك كەيبىرەۋ بار،
ابايلار ءاربىر ءسوزدى ءوز حالىنشا.

شىن كوڭىلمەن سۇيسە ەكەن، كىمدى سۇيسە،
ءبىر سوزىمەن تۇرسا ەكەن، جانسا-كۇيسە.
قىرمىزى، قىزىل جىبەك بوزبالالار،
وڭعاق پۇلداي بىلعايدى، ءبىر دىم تيسە.

كەرەك ءىس بوزبالاعا – تالاپتىلىق،
ءار ءتۇرلى ونەر، مىنەز، جاقسى قىلىق.
كەيبىر جىگىت جۇرەدى ماقتان كۇيلەپ،
سىرتقا پىسىق كەلەدى، سوزگە سىنىق.

كەمدى كۇن قىزىق داۋرەن تاتۋ وتكىز،
جەتپەسە، بىرىڭدىكىن ءبىرىڭ جەتكىز!
كۇنشىلدىكسىز تاتۋ بول شىن كوڭىلمەن،
قياناتشىل بولماقتى ەستەن كەتكىز!

ءبىر جەردە بىرگە جۇرسەڭ باسىڭ قوسىپ،
ءبىرىڭنىڭ ءبىرىڭ سويلە ءسوزىڭ توسىپ.
ءبىرىڭدى ءبىرىڭ ءعيززات، قۇرمەت ەتىس،
تۇرعانداي بەينە قورقىپ، جانىڭ شوشىپ.

جولداستىق، سۇحباتتاستىق – ءبىر ۇلكەن ءىس،
ونىڭ ءقادىرىن جەتەسىز ادام بىلمەس.
سۇيىكتى ەر بىلگەن سىرىن سىرتقا جايماس،
ارتىڭنان ءبىر اۋىز ءسوز ايتىپ كۇلمەس.

كۇيلەمە جىگىتپىن دەپ ۇنەمى ويناس،
سالىنساڭ، سالدۋارلىق ءقادىر قويماس.
ەر جىگىت تاڭداپ تاۋىپ، ەپپەن ءجۇرسىن،
توبەتكە ولەكشىننىڭ ءبارى ءبىر ءباس.

بىرەۋدى كوركى بار دەپ جاقسى كورمە،
لاپىلداق كورسە قىزار ناپسىگە ەرمە!
ايەل جاقسى بولمايدى كوركىمەنەن،
مىنەزىنە كوز جەتپەي، كوڭىل بولمە!

كوپ جۇرمەس جەڭسىكقويلىق، ءالى-اق توزار،
جاڭعىرار جەڭسىكقۇمار، جاتقا قوزار.
كۇندە كورگەن ءبىر بەتتەن كوڭىل قايتار،
قىلت ەتكىزبەس قىلىقتى تامىرشى وزار.

تولقىنىن جۇرەگىڭنىڭ حاتتاي تانىر،
بۇلك ەتكىزبەس قالايشا سوقسا تامىر.
جار كوڭىلىنە ءبىر جانىن پيدا قىلىپ،
بىلمەستىگىڭ بار بولسا، قىلار سابىر.

شۋ دەگەندە كورىنەر سۇلۋ ارتىق،
كوبى كوپشىل كورىنەر ونداي قانشىق.
بەتىم باردا بەتىمە كىم شىدار دەپ،
كىمى پاڭداۋ كەلەدى، كىمى – تانتىق.

اقىل كەرەك، ەس كەرەك، مىنەز كەرەك،
ەر ۇيالار ءىس قىلماس قاتىن زەرەك.
سالاق، ولاق، ويناسشى، كەرىم-كەربەز،
جىرتاڭ-تىرتاڭ قىزىلدان شىعادى ەرەك.

قاتىنىڭ سەنى سۇيسە، سەن دە ونى ءسۇي،
قورجاڭ سۋىق كەلەدى كەي ساسىق مي.
ەرى اقىلدى، قاتىنى مىنەزدى بوپ،
تاتۋ بولسا، رياز ۇستىندەگى ءۇي.

جوق بولسا قاتىنىڭنىڭ جات وسەگى،
بولماسا مىنەزىنىڭ ەش كەسەگى.
مايىسقان، بەينە گۇلدەي تولىقسىعان،
كەم ەمەس التىن تاقتان جار توسەگى.

جاساۋلى دەپ، مالدى دەپ بايدان الما،
كەدەي قىزى ارزان دەپ قۇمارلانبا.
ارى بار، اقىلى بار، ۇياتى بار،
اتا-انانىڭ قىزىنان عاپىل قالما.

ۇيىڭە تاتۋ قۇربىڭ كەلسە كىرىپ،
سازدانباسىن، قاباقپەن يمەندىرىپ.
ەرى سۇيگەن كىسىنى و دا ءسۇيىپ،
قىزمەت قىلسىن كوڭىلى تازا ءجۇرىپ.

قۇربىڭنىڭ ءتاۋىر بولسىن ءوز مىنەزى،
ابرويلى قالجىڭمەن كەلسىن ءسوزى.
سەن وعان مويىن بۇرىپ ءسوز ايتقاندا،
قاتىنىڭدا بولماسىن ونىڭ كوزى.

كەي قۇربى بۇگىن تاتۋ، ەرتەڭ باتۋ،
تىلەۋى، جاقىندىعى – ءبارى ساتۋ.
كوكىرەگىندە قاياۋ جوق، قيانات جوق،
قاجىماس، قايتا اينىماس قايران تاتۋ!

پايدا دەپ، مال دەپ تۋار ەندىگى جاس،
ەڭبەكپەن تەرىن ساتىپ تۇزدەن جيماس.
مەلىش ساۋدا سىقىلدى كۇلكى ساتىپ،
السا قويماس، ارانى تاعى تويماس.

اسىق ۇتىس سەكىلدى الىس-بەرىس –
ءتىرى جاننىڭ قىلعانى بۇگىن تەگىس.
ءبىرى كويتكە تالاسىپ، ءبىرى ارام قىپ،
توبەلەسكەن، داۋلاسقان جانجال-كەرىس.

جاس بالا اۋەل تاتۋ بولا قالار،
اتا-انادان جاقىن بوپ، ەرتىپ الار،
ءبىرىن ءبىرى قۇشاقتاپ، شۋىلداسىپ،
ويىن تارقار كەزىندە ۇرىس سالار.

بىرەۋى جىلاپ بارسا ۇيگە تامان،
اتا-اناسى بۇرقىلدار ونان جامان.
تاتۋلىعى قۇرىسىن ويىنى مەن،
ءدال سولارعا ۇقسايدى مىنا زامان.

جامان تاتۋ قازادى وزىڭە ور،
وعان سەنسەڭ، ءبىر كۇنى بولارسىڭ قور.
ارى بار، ۇياتى بار ۇلكەنگە سەن،
ءوزى زوردىڭ بولادى يىعى دا زور.

قازاقتىڭ قايسىسىنىڭ بار ساناسى؟
قىلت ەتەردە داپ-دايىن ءبىر جالاسى.
پىسىقتىقتىڭ بەلگىسى – ارىز بەرۋ،
جوق تۇرسا بەس بەرەسى، التى الاسى.

---