InfoHub Logo

قازاق رۋحانياتى تاعى ءبىر اسىل ازاماتىنان ايىرىلدى. بەلگىلى اقىن، ايتىسكەر، كۇيشى، شەجىرەشى ءارى زەرتتەۋشى كادىرحان قيزات ۇلى جول اپاتىنان كوز جۇمدى. بۇل تۋرالى اقىننىڭ ارىپتەسى ۇلاربەك نۇرعالىم ۇلى الەۋمەتتىك جەلىدە حابارلادى.

بۇل تۋرالى Infohub.kz اقپارات اگەنتتىگى حابارلايدى.

رۋحانيات مايدانىنداعى تۇلعا

ۇلاربەك نۇرعالىم ۇلى مارقۇمنىڭ بولمىسىن ەرەكشە تەبىرەنىسپەن ەسكە الىپ، ونىڭ ەل ىشىندەگى ورنى بولەك ازامات بولعانىن اتاپ ءوتتى. كادىرحان قيزات ۇلى تەك قىتايداعى قازاق ايتىسىنىڭ عانا ەمەس، جالپى قازاق رۋحانياتىنىڭ جاناشىرى ءارى بەلسەندى جاناشىرى ەدى. ول كۇي تارتتى، شەجىرە شەرتىپ، ءسوز ونەرىنىڭ بيىك شىڭدارىنا شىقتى. اينالاسىنداعى تالانتتى جانداردى باعالاپ، ولاردىڭ تابىسىنا قۋانا بىلگەن كەڭ جۇرەكتى جان بولعان.

قايعىلى وقيعانىڭ ءمان-جايى

جەلىدە تاراعان اقپاراتقا سايكەس، استانادان الماتىعا بەت العان اۆتوبۋس تاڭ الدىندا جول جيەگىندە تۇرعان جۇك كولىگىنە سوعىلعان. الدىن الا بولجام بويىنشا، اۆتوبۋس جۇرگىزۋشىسىنىڭ ۇيقىعا كەتكەنى سەبەپ بولعان. وسى قايعىلى وقيعا سالدارىنان بىرنەشە ادام جاراقات الدى، ال كادىرحان قيزات ۇلى قازا تاپتى.

قارالى حاباردى العاش جەتكىزگەن ۇلاربەك نۇرعالىم ۇلى مارقۇمنىڭ دەنەسى ءالى استاناعا جەتكىزىلمەگەنىن دە حابارلاعان.

جانازا نامازى قوسشىدا وتەدى

كادىرحان قيزات ۇلى سوڭعى جىلدارى استانا ماڭىنداعى قوسشى قالاسىندا تۇرعان. الدىن الا اقپارات بويىنشا، جانازا نامازى سول جەردە وقىلادى. ناقتى ۋاقىتى كەيىنىرەك بەلگىلى بولادى.

كادىرحان قيزات ۇلى كىم ەدى؟

كادىرحان قيزات ۇلى 1963 جىلى جۇڭگو حالىق رەسپۋبليكاسىنىڭ شىڭجاڭ ۇيعىر اۆتونوميالىق اۋدانىنداعى تارباعاتاي ايماعى، ءدوربىلجىن اۋدانىنا قاراستى سارى ەمىل فەرماسىنىڭ مايلىتاۋ وڭىرىندە دۇنيەگە كەلگەن. مالشى وتباسىندا وسكەن ول 1980 جىلى مەكتەپتى بىتىرگەن سوڭ ۇستازدىق قىزمەتكە كىرىسكەن. 1980-1995 جىلدارى باستاۋىش جانە ورتالاۋ مەكتەپتەردە ادەبيەت پانىنەن ساباق بەردى. ال 1995-2014 جىلدارى ءدوربىلجىن اۋداندىق مادەنيەت ءۇيىنىڭ ديرەكتورى قىزمەتىن اتقارىپ، 2014 جىلى زەينەتكەرلىككە شىقتى.

شىعارماشىلىعى مەن ونەردەگى ورنى

كادىرحان قيزات ۇلى 1980 جىلدان باستاپ ءۇش جۇزدەن استام ولەڭ-تولعاۋ، وننان استام پوەما جازعان قالامگەر. ول «قارىمجى»، «قايران، داۋرەن» اتتى ايتىس جانە جىر جيناقتارىنىڭ اۆتورى. 1986-2006 جىلدار ارالىعىندا «تانىمال ايتىسكەر»، «ولكە دارەجەلى ايتىسكەر»، «تارباعاتاي ايماعىنا ەڭبەگى سىڭگەن ايتىسكەر» سىندى اتاقتارعا يە بولدى. سونداي-اق، ول داۋلەسكەر كۇيشى رەتىندە دە تانىلىپ، رەپەرتۋارىندا ءوز شىعارمالارىمەن قاتار حالىق كۇيلەرىن دە ورىنداعان.

اتاجۇرتقا ورالعاننان كەيىن

2016 جىلى تاريحي وتانىنا ورالعاننان كەيىن دە كادىرحان قيزات ۇلى شىعارماشىلىقتان قول ۇزبەدى. وسى جىلدارى ول «مىڭ بۇلاق» جىر جيناعىن، «جۇڭگو قازاق اقىندار ايتىسى»، «اتام ايتقان اڭگىمەلەر» كىتاپتارىن قۇراستىردى. ول قحر مەملەكەتتىك اۋىز ادەبيەتى قوعامىنىڭ، ش ۇ ا ر ادەبيەت-كوركەمونەر قوعامىنىڭ، ىلە وبلىستىق ايتىس زەرتتەۋ قوعامىنىڭ مۇشەسى بولدى. جاقىندا قازاقستان جازۋشىلار وداعىنىڭ قاتارىنا قابىلدانعانى دا ايتىلادى.

ورنى تولماس قازا

كادىرحان قيزات ۇلى — قىتايداعى قازاق ايتىسىنىڭ كورنەكتى وكىلى عانا ەمەس، سول مۇرانى زەرتتەپ، جيناقتاپ، كەيىنگى ۇرپاققا اماناتتاپ كەتۋگە ەڭبەك سىڭىرگەن تۇلعا. ونىڭ قازاسى — قازاق رۋحانياتى ءۇشىن اۋىر قايعى، ورنى تولماس قازا. مارقۇمنىڭ وتباسى مەن تۋعان-تۋىستارىنا، جاقىن-جۋىقتارىنا، ونەردەگى ۇزەڭگىلەستەرىنە جانە بارشا قازاق جۇرتىنا كوڭىل ايتامىز. جانى ءجانناتتا، يمانى جولداس بولسىن.