InfoHub Logo

ايتىس ونەرىنىڭ بەلدى ۇيىمداستىرۋشىسى، اقىن ءجۇرسىن ەرمان دەنساۋلىعىنا بايلانىستى باستان كەشكەن كۇردەلى جاعدايلار تۋرالى اشىق ايتتى. ول ءوزىنىڭ قانت ديابەتىمەن كۇرەسى جانە سول قيىن ساتتە مەملەكەت باسشىسى قاسىم-جومارت توقايەۆ تاراپىنان كورسەتىلگەن قولداۋ تۋرالى «1001 ءتۇن» باعدارلاماسىندا باياندادى.

بۇل تۋرالى Infohub.kz اقپارات اگەنتتىگى حابارلايدى.

اقىننىڭ ايتۋىنشا، قانت ديابەتى ونىڭ دەنساۋلىعىنا قاتتى اسەر ەتىپ، جاعدايى كۇرت ناشارلاعان. الماتىداعى ءىرى مەديسينالىق ورتالىقتا ەم قابىلداعان كەزدە، دارىگەرلەر اياعىن كەسۋ قاجەتتىگىن ايتىپ، بۇل شەشىمدى باسقا امال جوق ەكەندىگىمەن تۇسىندىرگەن.

شەتەلدەگى ەم جانە پرەزيدەنتتىڭ قولداۋى

«مەنىڭ جاعدايىمدى ناشارلاتقان – قانت. ونىڭ سەبەبىن ناقتى بىلمەدىم. قاتتى اۋىردىم. الماتىداعى بەدەلدى اۋرۋحانادا ەمدەلدىم. ءبىراق دارىگەرلەر اياعىمدى كەسۋ كەرەكتىگىن ايتتى. «بۇلاي ىستەمەسەك، ءولىپ قالاسىڭ» دەدى. ادامنىڭ اياعىن كەسۋ وڭاي ەمەس قوي. سول كەزدە شەتەلگە بارىپ ەمدەلۋدى ۇيعاردىم. شۆەيسارياعا كەتتىم. ول جاقتا مەنىڭ قۇدايىم، دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى بار ەدى. ولار مەنى قاراپ، اياقتى كەسۋدىڭ قاجەتى جوق ەكەنىن ايتتى.

شۆەيسارياعا بارۋ وڭاي بولعان جوق. پرەزيدەنتىمىز قاسىم-جومارت توقايەۆ ەمدەلۋىم ءۇشىن كوپ قارجى ءبولدى. بۇل تۋرالى ول ءوزى ايتپاسا دا، مەن ىشىمنەن ءبىلىپ، ريزاشىلىعىمدى ءبىلدىرىپ ءجۇرمىن. وسىلايشا، اياعىمدى كەستىرمەي، ەلگە امان-ەسەن ورالدىم. كەيىن قىزدارىمنىڭ كۇتىمى مەن شوپتەرمەن ەمدەۋىنىڭ ارقاسىندا امان قالدىم. حالىقتىڭ قولداۋى دا ماعان ۇلكەن دەم بەردى»، - دەپ اقىن جان سىرىن اقتاردى.