InfoHub Logo

1994 جىلى ەل تاريحىنداعى ەلەۋلى كەزەڭدەردىڭ بىرىندە، قازان ايىندا جوعارى كەڭەس اكەجان قاجىگەلديننىڭ پرەمەر-مينيسترلىگىن بەكىتتى. الايدا، ونىڭ ورىنباسارى بولۋعا ۇسىنىلعان التىنبەك سارسەنباي ۇلىنىڭ كانديداتۋراسى تالقىلاۋعا ءتۇسىپ، دەپۋتاتتار اراسىندا قىزۋ پىكىرتالاس تۋدىردى. پرەزيدەنتتىڭ ءوزى قولداپ وتىرعان تۇلعاعا قارسى شىققان دەپۋتات كىم بولدى جانە نەگە؟

بۇل تۋرالى Infohub.kz اقپارات اگەنتتىگى حابارلايدى.

دەپۋتاتتىڭ نارازىلىعى

التىنبەك سارسەنباي ۇلى جوعارى كەڭەس مىنبەرىنە شىعا بەرگەندە، «بۇل جولى پرەزيدەنت قاتەلەستى» دەگەن سوزدەر جينالعانداردى ەلەڭ ەتكىزدى. بۇل سوزدەردى ايتقان – دەپۋتات التىنشاش جاعانوۆا ەدى. ول كەزدەگى جاعدايدى ەسكە العاندا، جاعانوۆا بىلاي دەيدى: «نۇرسۇلتان ءابىش ۇلى ءسىزدىڭ كانديداتۋراڭىزدى قولدادى جانە ءالى دە قولداپ كەلەدى. بۇل جولى ول قاتەلەستى».

التىنبەك سارسەنباي ۇلى بۇعان جاۋاپ رەتىندە بولاشاقتا ءسوز بوستاندىعىنا كەپىلدىك بەرەتىن كونستيتۋسيانىڭ ءوزى جەتكىلىكتى بولاتىنىن، باسپا ءسوز تۋرالى زاڭنىڭ قاجەتى بولماي قالۋى مۇمكىن ەكەنىن ايتقان ەدى. الايدا، ۋاقىت وتە كەلە بۇل بولجام ورىندالمادى.

نە سەبەپتى قارسى بولدى؟

كەيىننەن ءابىش كەكىلبايەۆتىڭ ۇسىنىسىمەن داۋىسقا سالىنعاندا، التىنبەك سارسەنباي ۇلىنىڭ كانديداتۋراسىنا 58 دەپۋتات قولداپ، 61 دەپۋتات قارسى داۋىس بەردى. بۇل جايتتىڭ ءمان-جايىن انىقتاۋ ءۇشىن التىنشاش جاعانوۆامەن تىلدەسكەندە، ول بىلاي دەپ ءتۇسىندىردى: «پرەزيدەنت قاتتى رەنجىدى. «التەكە، مۇنىڭىز نە، ول جاقسى جىگىت» دەدى. «جاقسى ەمەس، نۇرەكە! كورەسىز ءالى» دەدىم. مىنە، ايتقانىم كەلدى. ويتكەنى ءبىز دەپۋتات بولار الدىندا مەن ءبىر جىل الماتى قالالىق كەڭەسىنىڭ دەپۋتاتى بولدىم. سوسىن ءبىر جىلدان كەيىن جوعارى كەڭەستىڭ دەپۋتاتى بولعاسىن، مەن ول جاقتاعى جۇمىسىمنان باس تارتتىم. سول ۋاقىتتا قالادا بۇل دا (التىنبەك سارسەنباي ۇلى) دەپۋتات بولدى. جۇرتتى مەنسىنبەي، ايتقان ادامداردى قاتتى تويتارىپ وتىردى. ءتارتىبى سونداي بولدى. پرينسيپتەرى باسقاشا بولاتىن. ماعان ۇنامايتىن ايتەۋىر».

سارسەنباي ۇلىنىڭ پىكىرى

التىنبەك سارسەنباي ۇلى بۇل جايتتى كەيىننەن بىلايشا ەسكە الدى: «مەنى بەكىتپەگەنىنە ءالى كۇنگە ريزامىن، راقمەت! مەنىڭ ورنىما بولعان ۆيسە-پرەمەردىڭ كەزىندە بۇكىل الەۋمەتتىك سالانىڭ تاس-تالقانى شىقتى. مەكتەپتەر قىسقاردى، اۋرۋحانالار جابىلدى، كىتاپحانالار عايىپ بولدى. ول كەزدە مەن جاستاۋ ەدىم. سولاقاي شەشىمدەردىڭ بارىنە تابانداپ قارسى تۇرار ەدىم دەپ ايتا المايمىن. ەگەر سول كەزدە ۆيسە-پرەمەر بولسام، تاس-تالقان بولعان دۇنيەنىڭ وبالى ءالى كۇنگە دەيىن موينىمدا تۇرار ەدى. مەنى سول جولى قۇداي قاقتى. ءالى كۇنگە سول اپايىمىزدى كورسەم، راقمەت ايتقىم كەپ تۇرادى».