InfoHub Logo

قىرعىزستاننىڭ ۇلتتىق قاۋىپسىزدىك كوميتەتىنىڭ (ۇقك) بۇرىنعى باسشىسى كامشىبەك تاشييەۆ ءوزىنىڭ قىزمەتىنەن بوساتىلۋىنا قاتىستى الەۋمەتتىك جەلىدە تاراعان ۇندەۋىندە پىكىرىن ءبىلدىردى. بۇل تۋرالى 24.kg سايتىنا سىلتەمە جاساپ Tengrinews.kz حابارلادى.

تاشييەۆتىڭ ايتۋىنشا، ول پرەزيدەنتتىڭ رۇقساتىمەن ەمدەلۋ ءۇشىن شەتەلگە شىققان. قىزمەتىنەن بوساتىلۋ تۋرالى شەشىم وعان كۇتپەگەن جاعداي بولعانىن اتاپ ءوتتى. دەگەنمەن، مەملەكەت باسشىسىنىڭ شەشىمىن ورىنداۋ كەرەكتىگىن ايتتى.

«مەن مەملەكەتىمىزگە، حالقىمىزعا جانە پرەزيدەنتىمىزگە ادال قىزمەت ەتتىم جانە بۇل ءۇشىن ماقتانامىن. تەك وكىنىشتىسى، جەكە قۇراممەن قوشتاسۋعا مۇمكىندىك بەرمەگەنى. ۇقك-نىڭ ءاربىر قىزمەتكەرىنە العىس ايتىپ، تابىس تىلەيمىن»، - دەلىنگەن ۇندەۋدە.

سونداي-اق، تاشييەۆ ازاماتتاردى زاڭدى قۇرمەتتەۋگە، ەلدەگى بەيبىتشىلىك پەن تۇراقتىلىقتى ساقتاۋدىڭ ماڭىزدىلىعىن ايتىپ، زاڭسىز ارەكەتتەرگە جول بەرمەۋگە شاقىردى.

ەسكە سالا كەتەيىك، 10 اقپاندا قىرعىزستان پرەزيدەنتى سادىر جاپاروۆتىڭ جارلىعىمەن كامشىبەك تاشييەۆ قىرعىزستان رەسپۋبليكاسى مينيسترلەر كابينەتى ءتوراعاسىنىڭ ورىنباسارى – ۇلتتىق قاۋىپسىزدىك مەملەكەتتىك كوميتەتىنىڭ ءتوراعاسى قىزمەتىنەن بوساتىلعان بولاتىن. پرەزيدەنتتىڭ باسپا ءسوز قىزمەتىنىڭ حابارلاۋىنشا، بۇل قادامنىڭ باستى ماقساتى – مەملەكەتتىڭ بىرلىگىن نىعايتۋ جانە قوعامدا، سونىڭ ىشىندە مەملەكەتتىك قۇرىلىمدار اراسىنداعى ىرىتكىنىڭ الدىن الۋ بولدى.