InfoHub Logo

ەلىمىزدە شەنەۋنىكتەردىڭ قىزمەتكە كەلىپ-كەتۋى ۇيرەنشىكتى جاعدايعا اينالعانىمەن، مۇنداي جىلدامدىق سيرەك كەزدەسەدى. اقتاۋ اكىمىنىڭ ورىنباسارى بولىپ تاعايىندالعان اسەت شوپانوۆ نەبارى ءبىر كۇننەن كەيىن قىزمەتىنەن بوساتىلدى. بۇل وقيعا قوعامدا قىزۋ پىكىرتالاس تۋدىردى،-دەپ حابارلايدى Infohub.kz ءتىلشىسى.

رەسمي اقپاراتقا سايكەس، اسەت شوپانوۆ 2025 جىلعى 3 ناۋرىزدا اقتاۋ قالاسى اكىمىنىڭ ورىنباسارى قىزمەتىنە تاعايىندالدى. الايدا 4 ناۋرىزدا ونىڭ قىزمەتتەن كەتكەنى بەلگىلى بولدى. بۇعان نە سەبەپ بولعانى تۋرالى رەسمي تۇسىنىكتەمە ازىرگە جوق.

دەرەكتەرگە سۇيەنسەك، بۇعان دەيىن، 2024 جىلدىڭ مامىر ايىندا، شوپانوۆقا قاتاڭ سوگىس تۇرىندە تارتىپتىك جازا قولدانىلعان ەكەن. بۇل ونىڭ مەملەكەتتىك قىزمەتتە بەلگىلى ءبىر ماسەلەلەرگە تاپ بولعانىن كورسەتەدى. ءبىراق ەڭ قىزىعى – مۇنداي جاعداي بولا تۇرا، ونىڭ جوعارى لاۋازىمعا تاعايىندالۋى.

بۇل جاعداي بىرنەشە ماڭىزدى سۇراق تۋىنداتادى. بىرىنشىدەن، نەگە تاعايىنداۋ الدىندا شەنەۋنىكتىڭ بۇرىنعى تارتىپتىك ماسەلەلەرى ەسكەرىلمەگەن؟ ەگەر ول قىزمەتكە لايىقسىز بولسا، نەگە تاعايىندالدى؟ ال ەگەر لايىقتى بولسا، نەگە ءبىر كۇننەن كەيىن جۇمىستان كەتتى؟

مۇنداي كادرلىق وزگەرىستەر ەلىمىزدەگى مەملەكەتتىك باسقارۋ جۇيەسىندەگى تۇراقسىزدىقتىڭ كورىنىسى ىسپەتتى. سوڭعى جىلدارى مەملەكەتتىك قىزمەتكەرلەردىڭ ءجيى اۋىسۋى، كادرلىق ساياساتتىڭ رەتسىزدىگى جانە قابىلدانعان شەشىمدەردىڭ جىلدام قايتا قارالۋى ءجيى بايقالۋدا. بۇل مەملەكەتتىك باسقارۋدىڭ ساپاسىنا دا، حالىقتىڭ بيلىككە دەگەن سەنىمىنە دە كەرى اسەر ەتەتىنى ءسوزسىز.

ەلىمىزدە شەنەۋنىكتەردىڭ تاعايىندالۋى كوبىنە اشىقتىق پەن كاسىبيلىك قاعيدالارىنا ەمەس، بەلگىسىز مەحانيزمدەرگە سۇيەنەتىندەي اسەر قالدىرادى. كوپ جاعدايدا كادرلىق شەشىمدەر قوعامعا تۇسىندىرىلمەيدى، ال كەيبىر جاعدايلاردا ولار قيسىنعا كەلمەيتىندەي كورىنەدى.

اسەت شوپانوۆتىڭ كەشەگى وقيعاسى – مۇنداي قايشىلىقتاردىڭ كەزەكتى مىسالى عانا. ءبىراق نەگىزگى ماسەلە وزگەرىسسىز قالىپ وتىر. ول مەملەكەتتىك قىزمەتتەگى تۇراقتىلىق پەن كاسىبيلىك قاشان باستى ورىنعا شىعادى؟ ەگەر كادرلىق ساياساتتاعى مۇنداي بەيبەرەكەتتىك جالعاسا بەرسە، كەلەشەكتە «ءبىر كۇندىك اكىم ورىنباسارلارى» كوپتەپ پايدا بولماسىنا كىم كەپىل؟