InfoHub Logo

كوللەكتيۆتەندىرۋ كەزى. اۋداننان كەلگەن ءبىر وكىل جينالىس وتكىزبەكشى بولىپ، از عانا اۋىل ادامدارىن جينايدى. ءوزىنىڭ كىم ەكەنىن تانىستىرىپ، ەل جاعدايىن توقتالعان ول اقىرىندا:

— كىم «كەرىس» سوزگە شىعادى؟ — دەيدى.

جينالىستا سويلەپ ۇيرەنبەگەن حالىق ۇندەمەي وتىرىپ قالادى. سوندا قارا ءجۇسىپ تۇرىپ:

— مەن شىعامىن، — دەپ جامان كۇپىسىن شەشىپ تاستاپ، جەڭىن سىبانىپ، قولىنا قامشىسىن الىپ، جينالىس تورىنە جەتىپ بارادى دا:

— ۋاكىل، سەن وڭباعانسىڭ. حالىققا ايتقان ءبىر اۋىز ءجون ءسوزىڭ جوق. سەنى كىم شاقىردى. وتىرعان جەرىڭدە نە ىستەيسىڭ وسى؟ — دەپ، قامشىسىن الا ۇمتىلعاندا، جينالىس باسقارىپ وتىرعان ءتوراعاسى شاپ بەرىپ، ونىڭ قولىنان ۇستاي الادى.

— كەرىسكەن سوڭ جانىنا تيمەسەڭ، كەرىس بولا ما؟ شىقسىن بىلاي، ادامىنا كەزدەسپەي جۇرگەن شىعار، ەزۋىن ءتىلىپ جىبەرەيىن! — دەيدى قارا ءجۇسىپ ونىمەن دە قويماي. ءتوراعاسى سوزگە شىعۋ دەگەننىڭ ءمان-جايىن ءتۇسىندىرىپ، قارا ءجۇسىپتى زورعا باسادى.

ۋاكىل اشۋلانىپ:

— تابانىڭدى جالتىرات! — دەسە، قارا ءجۇسىپ سيىردىڭ باس تەرىسىنەن تىگىلگەن شاركەسىنىڭ تابانىن كەزەك-كەزەك كوتەرىپ، كورسەتە بەرىپتى. ودان بەتەر ىزالانعان ۋاكىل:

— كەت! — دەگەن ەكەن، قارا ءجۇسىپ يت بولىپ ارس ەتە قالادى.

سەلك ەتە تۇسكەن ۋاكىل:

— ناعىز توبەڭنەن جىرتقىزاتىن ادام ەكەنسىڭ ءبىر، — دەيدى قالشىلداپ-دىرىلدەپ.

— بىلاي جىرتايىن با؟ — دەپ، ەكى قولىمەن جەر تىرەپ، ەكى اياعىن جوعارى كوتەرىپ ءجۇرىپ الادى قارا ءجۇسىپ. ونىڭ سىرىن بىلەتىن ءتوراعاسى جالىنىپ-جالبارىنىپ ازەر دەگەندە قويعىزعان ەكەن.

---