InfoHub Logo

كورۋ اعزالارىنىڭ زاقىمدانۋى – سوقىرلىق پەن مۇگەدەكتىككە الىپ كەلەتىن باستى سەبەپتەردىڭ ءبىرى.

كوز بەن قوسالقى اعزالاردىڭ جاراقاتى مەحانيكالىق، تەرميالىق، حيميالىق زاقىمداۋشى فاكتورلاردان، سونداي-اق ساۋلەلىك زاقىمدانۋلاردان بولۋى مۇمكىن. تەسەتىن، كەسەتىن، جۇمىر زاتتاردىڭ اسەرى ءار ءتۇرلى جاراقاتتار مەن كونتۋزيالارعا سوقتىرۋى مۇمكىن. تەرميالىك، حيميالىق فاكتورلاردىڭ اسەرى، سونداي-اق كوزگە كورىنەتىن جانە ۋلتراكۇلگىن ساۋلەلەردىڭ ىقپالىنان كوز اعزالارى كۇيۋى مۇمكىن.

كوز جاراقاتتارى سيپاتى مەن جاراقات العان جاعدايعا بايلانىستى جىكتەلەدى. ادەتتە وندىرىستىك، تۇرمىستىق جانە اسكەري كوز جاراقاتتارى دەپ بولەدى. كوز اعزاسى جاراقات العان جاعدايدا زارداپ شەگۋشى ادامدى مامانداندىرىلعان وفتولمولوگيالىق كلينيكاعا دەر شاعىندا جەتكىزۋ اسا ماڭىزدى. ول جەردە ناۋكاسقا بىلىكتى مەديسينالىق جاردەم كورسەتىلەدى. ويتكەنى جاراقاتتانعان كوزدىڭ تاعدىرىن كۇندەر ەمەس، ساعاتتار شەشەدى. كوز الماسىنىڭ ىشكى قاباتتارىنىڭ شىعىپ كەتۋى، كوز ىشىنە قان قۇيىلۋ، كوز ىشىلىك ءىرىڭدى جۇقپانىڭ دامۋى سەكىلدى اسقىنۋلار ادامنىڭ كوزدەن ايىرىلۋىنا الىپ كەلۋى مۇمكىن.

كوز اعزالارى زاقىمدانعان ناۋقاستاردىڭ حيرۋرگيالىق جانە تەراپيالىق ەمىن تەك كوز دارىگەرى عانا جۇرگىزەدى.

كوز ۇياسىنىڭ جاراقاتتانۋى جانە كونتۋزياسى كوبىنە باس ميىنىڭ زاقىمدانۋىمەن قاتار جۇرەدى. سوندىقتان جاراقاتقا زالالسىزداندىرىلعان تاڭعىش بايلاپ، ناۋقاستى زەمبىلگە جاتقىزىپ، جەدەل جاردەم كولىگىمەن اۋرۋحانانىڭ نەيروحيرۋرگيا نەمەسە كوز بولىمىنە جەتكىزەدى. جاراقاتتانعان ادامدى اۋرۋحاناعا جاياۋ جىبەرۋگە ۇزىلدى-كەسىلدى تىيىم سالىنادى.

قاباق جاراقاتتانعاندا جاراقات اينالاسىنداعى تەرىگە جاسىل بريلليانتتىڭ 1 پايىزدىق ەرىتىندىسىن جاعادى. جاراعا زالالسىزداندىرىلعان تاڭعىش بايلاپ، تەز ارادا دارىگەرگە جەتكىزەدى. جاراقاتتى جۋۋعا، جىرتىلعان جەرلەرىن جۇلۋعا بولمايدى. ەگەر قاباق بۇتىندەي جۇلىنىپ قالسا، ونى تاستاماي دارىگەرگە اپارۋ كەرەك. ونى ءوز ورنىنا تىگۋگە بولادى.

قاباققا تۇسكەن بوگدە زات اۋىرتىپ قانا قويماي، كوز جاسىن اعىزادى. ەگەر زات قاباقتىڭ استىڭعى جاعىندا تۇرسا، كوزدى جىپىلىقتاتقاندا جانە جاس اققاندا ول سىرتقا شىعىپ كەتەدى. ەگەر شىقپاسا، استىڭعى قاباقتى سىرتقا اۋدارۋ كەرەك. بوگدە زاتتى سىرىڭكەگە ورالعان، قايناعان سۋعا مالىنعان ماقتامەن، بەتورامال ۇشىمەن نەمەسە داكەمەن الىپ تاستايدى. ەگەر بوگدە زات قاباقتىن ۇستىڭگى جاعىنا تۇسسە، ونى دارىگەرگە بارىپ الدىرتقان دۇرىس.

قاباق تەرميالىق كۇيىك العان جاعدايدا وعان زالالسىزداندىرىلعان تاڭعىش تاڭىپ، تەز ارادا دارىگەرگە جەتكىزەدى.

حيميالىق كۇيىك كەزىندە العاشقى كومەك اسا ماڭىزدى: الدىمەن كۇيگەن قاباقتى مول اعىن سۋمەن جۋادى، كۇيۋگە الىپ كەلگەن حيميالىق زاتتى دا تەز ارادا جۋىپ تاستاۋ ماڭىزدى. 5-10 مينۋت جۋعان سوڭ دارىگەرگە كورىنۋ كەرەك. ەگەر كۇيىك حيميالىق زات ۇنتاعىنان نەمەسە ۇساق بولىكتەردەن بولسا، جۋماس بۇرىن ولاردى كۇرعاق ماقتامەن نەمەسە پينسەتپەن الىپ تاستاۋ كەرەك. بۇل جاعدايدا قاباقتى جۋۋ حيميالىق زاتتىڭ ەرىپ، ودان ءارى كۇيدىرۋىنە الىپ كەلەدى.

كوز الماسىنىڭ جاراقاتتارى ىشكە ەنگەن جانە ەنبەگەن بولىپ بولىنەدى. بۇنى تەك دارىگەر انىقتايدى. سىلەيمەلى قابىق پەن قاساڭ قابىكتاعى بوگدە زاتتى ءوز بەتىنشە الۋعا بولمايدى، بۇنىڭ سالدارىنان ادام كوزىنەن ايىرىلۋى مۇمكىن. تەك تەرىنى جاسىل بريليانتتىڭ 1 پايىز سپيرتتىك ەرىتىندىسىمەن وڭدەپ، كوزگە 30 پايىزدىق ناتريي سۋلفاسيلى ەرىتىندىسىن نەمەسە 0،25 پايىزدىق ليەۆوميسيتين ەرىتىندىسىن تامىزىپ، شۇعىل تۇردە اۋرۋحاناعا جەتكىزۋ كەرەك.

كوزدى سوعىپ الگاندا زاقىمنىڭ اۋىرلىعىن ءوز بەتىنشە باعالاۋ قيىن. سوندىقتان زارداپ شەگۋشىنى تەز ارادا مامان دارىگەرلەرگە جەتكىزۋ كەرەك.

كوز تەرميالىڭ كۇيىك العان جاعدايدا قاباق پەن كوز اينالاسىن جاسىل بريليانتتىڭ 1 پايىز سپيرتتىك ەرىتىندىسىمەن وڭدەپ، كوزگە 30 پايىزدىق ناتريي سۋلفاسيلى ەرىتىندىسىن نەمەسە 0،25 پايىزدىق ليەۆوميسيتين ەرىتىندىسىن تامىزىپ، سونداي-اك 1 پايىزدىق تەتراسيكلين جاقپامايىن سالىپ، كوزدى زالالسىزداندىرىلعان تاڭعىشپەن تاڭىپ، شۇعىل تۇردە اۋرۋحاناعا جەتكىزۋ كەرەك.

قاباققا قىشقىل نە ءسىلتى تۇسكەندە، حيميالىق كۇيىك ورىن الادى. بۇل زاتتار ابدەن جۋىلعانشا اسەرىن توقتاتپايدى. سوندىقتان العاشقى كومەكتى دۇرىس كورسەتۋ جانە دارىگەرگە تەز ارادا جەتكىزۋ اسا ماڭىزدى. اسىرەسە سىلتىدەن كۇيۋ ءقاۋىپتى. ول تىندەردىڭ كۇرامىنداعى ءبىرقاتار زاتتاردى ەرىتىپ جىبەرەدى دە تەرەڭ ەنەدى. بۇندا دا حيميالىق زات ۇنتاقتارىن الىپ تاستاعان سوڭ كوزدى جۋۋ كەرەك. ناۋكاستى تەز ارادا اۋرۋحاناگا جەتكىزۋ ءلازىم. الايدا مامانداندىرىلعان كومەك تەز جانە ساپالى كورسەتىلسە دە، حيميالىق كۇيىكتەر اۋىر زارداپتارعا سوقتىرادى. سوندىقتان وندىرىستە جانە تۇرمىستا قىشقىلدارمەن، سىلتىلەرمەن جۇمىس جاساعاندا، مىندەتتى تۇردە قورعانىش كوزىلدىرىك نەمەسە بەتپەردە كيۋ كەرەك.

س.ا.كاۋسوۆا، كوز دارىگەرى.

---