InfoHub Logo

ماڭعىستاۋ وبلىستىق پروكۋراتۋراسىندا وبلىس پروكۋرورى سەرىكقالي قۋشالييەۆتىڭ توراعالىعىمەن القا وتىرىسى ءوتتى. جيىندا ازاماتتاردىڭ سوتقا دەيىنگى تەرگەۋ ساتىسىنداعى كونستيتۋسيالىق قۇقىقتارىن قامتاماسىز ەتۋ ماسەلەلەرى قارالدى.

بۇل تۋرالى Infohub.kz اقپارات اگەنتتىگى حابارلايدى.

سوتقا دەيىنگى تەرگەۋدەگى زاڭدىلىق

وتىرىسقا وڭىردەگى سوت ورگاندارىنىڭ ءتوراعالارى مەن قۇقىق قورعاۋ قۇرىلىمدارىنىڭ باسشىلارى قاتىستى. كۇن تارتىبىندە سوتقا دەيىنگى تەرگەۋ بارىسىندا ازاماتتاردىڭ كونستيتۋسيالىق قۇقىقتارىن قوزعايتىن تەرگەۋ ارەكەتتەرىن جۇرگىزۋ كەزىندە زاڭدىلىقتى قامتاماسىز ەتۋ ماسەلەلەرى قارالدى.

2025 جىلدىڭ قورىتىندىسى بويىنشا سوتتارعا 3697 پروسەسسۋالدىق ارەكەتكە سانكسيا بەرۋ تۋرالى ءوتىنىشحات جولدانعانى، ونىڭ 88،2%-ى قاناعاتتاندىرىلعانى اتاپ ءوتىلدى. اعىمداعى جىلى بۇل كورسەتكىش 84،6%-دى قۇرادى.

بۇلتارتپاۋ شارالارى مەن تەرگەۋ ارەكەتتەرى

جيىن بارىسىندا بۇلتارتپاۋ شارالارىن، سونىڭ ىشىندە قاماۋدا ۇستاۋدى قولدانۋ ماسەلەلەرىنە ەرەكشە نازار اۋدارىلدى. تەرگەۋ ورگاندارىنىڭ وتىنىشتەرىنىڭ جەتكىلىكسىز نەگىزدەلگەندىگى سالدارىنان قاماۋعا سانكسيا بەرۋدەن باس تارتۋ جاعدايلارى ورىن العانى ايتىلدى.

سونداي-اق، ءتىنتۋ جانە الۋ ارەكەتتەرىن جۇرگىزۋ ماسەلەلەرىنە جەكە توقتالدى. ءوتىنىشحاتتاردى قاناعاتتاندىرۋدىڭ جوعارى پايىزىنا قاراماستان، پروسەسسۋالدىق قۇجاتتاردى رەسىمدەۋدە فورماليزمگە جول بەرىلگەن جانە زاڭ تالاپتارىنىڭ بۇزىلۋى سياقتى بۇزۋشىلىقتار انىقتالدى.

سونىمەن قاتار، بۇلتارتپاۋدىڭ بالاما شارالارىن قولدانۋ بويىنشا وڭ ديناميكا بايقالادى. 2026 جىلى ءۇي قاماعىنا الۋ تۋرالى بارلىق ءوتىنىشحاتتار سوتتارمەن قاناعاتتاندىرىلدى.

«ازاماتتاردىڭ كونستيتۋسيالىق قۇقىقتارىن قامتاماسىز ەتۋ – بۇل فورمالدىلىق ەمەس، قىلمىستىق پروسەستىڭ نەگىزى. ولاردىڭ بۇزىلۋىنىڭ ءاربىر فاكتىسى ءپرينسيپتى باعالانۋى جانە تاجىريبەدەن الىنىپ تاستالۋى ءتيىس»، - دەدى وبلىس پروكۋرورى.

وتىرىس قورىتىندىسى بويىنشا، سوتقا دەيىنگى تەرگەۋدىڭ ساپاسىن ارتتىرۋعا، قىلمىستىق پروسەستىڭ ءۇش بۋىندى مودەلى اياسىندا ۆەدومستۆوارالىق ءوزارا ءىس-قيمىلدى كۇشەيتۋگە جانە بۇدان ءارى بۇزۋشىلىقتارعا جول بەرمەۋگە باعىتتالعان شارالار كەشەنى بەكىتىلدى.