InfoHub Logo

بيىلعى ناۋرىز ايىنداعى ۇلتتىق ءبىرىڭعاي تەستىلەۋگە (ۇبت) قاتىسقان 179 مىڭنان استام تالاپكەردىڭ ناتيجەسى جاريالاندى. الايدا، بۇل جولى جۇزدەگەن تالاپكەر ەمتيحان ەرەجەلەرىن بۇزعانى ءۇشىن تەستىلەۋدەن شەتتەتىلدى. بۇل تۋرالى ق ر عىلىم جانە جوعارى ءبىلىم مينيسترلىگى مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

تەستىلەۋ ناتيجەلەرى

مينيسترلىك دەرەكتەرىنە سۇيەنسەك، تالاپكەرلەردىڭ 75 پايىزى ەمتيحاندى قازاق تىلىندە، 25 پايىزى ورىس تىلىندە تاپسىرعان. ال 157 ادام اعىلشىن ءتىلىن تاڭداپتى.

جالپى، بەس ءپان بويىنشا ورتاشا بالل – 66 بولسا، ەڭ جوعارى كورسەتكىش 140 باللعا جەتكەن. تالاپكەرلەردىڭ 70 پايىزى بەلگىلەنگەن شەكتى باللدى ەڭسەرە الدى.

اتىراۋ وبلىسىنىڭ جازيرا كەڭەسوۆا ەرەكشە كوزگە ءتۇستى. ول ءتورت پاننەن 90 بالل جيناپ، قازاق تىلىنەن كازتەست سەرتيفيكاتىن پايدالانىپ، قورىتىندى بالىن 140-قا جەتكىزگەن.

اپەللياسيا جانە كوميسسيا شەشىمى

تەستىلەۋ اياقتالعان سوڭ 30 مينۋت ىشىندە تالاپكەرلەر تاپسىرما مازمۇنىنا قاتىستى اپەللياسيا بەرە الدى. ال تەحنيكالىق سەبەپتەر بويىنشا شاعىمدار ەمتيحان كەزىندە قابىلداندى.

بارلىعى 31 مىڭنان استام ءوتىنىش كەلىپ تۇسكەن. ونىڭ ىشىندە 17 تاپسىرما بويىنشا وتىنىشتەر قاناعاتتاندىرىلدى. رەسپۋبليكالىق كوميسسيا جۇمىسىن اياقتاپ، سەرتيفيكاتتار قاتىسۋشىلاردىڭ جەكە كابينەتتەرىنە قويىلدى.

سۇرانىسقا يە پاندەر

تالاپكەرلەر اراسىندا «ماتەماتيكا-فيزيكا» كومبيناسياسى ەڭ كوپ تاڭدالعان – 18،7 پايىز. ودان كەيىن «بيولوگيا-حيميا» كومبيناسياسى – 16،5 پايىز.

ءۇشىنشى ورىندا «شىعارماشىلىق ەمتيحان» تۇر، ونى 10،3 پايىز تالاپكەر تاپسىرعان.

ەرەجە بۇزۋشىلىقتار

ەرەكشە ءبىلىم بەرۋ قاجەتتىلىگى بار 408 تالاپكەر تەستىلەۋگە قاتىستى. ولار ءۇشىن ارنايى جاعدايلار جاسالعان.

ۇبت كەزىندە 264 ەرەجە بۇزۋشىلىق تىركەلدى. ونىڭ 130-ى تىيىم سالىنعان زاتتاردى (سمارتفون، «شپارگالكا») الىپ وتپەك بولعاندىقتان، ەمتيحاننان شىعارىلدى.

تاعى 134 تالاپكەر ەمتيحان ەرەجەسىن بۇزعانى ءۇشىن اۋديتوريادان شىعارىلىپ، ناتيجەلەرى جويىلدى. وزگە ادامداردىڭ اتىنان كىرگەن جاعدايلار انىقتالمادى.

قوسىمشا تەكسەرۋ

ۇبت-2026 اياقتالعاننان كەيىن 31 قازانعا دەيىن بەينەجازبالار تالدانادى. ەگەر بۇزۋشىلىقتار انىقتالسا، تەستىلەۋ ناتيجەلەرى جويىلۋى مۇمكىن.