InfoHub Logo

قازاقستاندىقتاردى مەديسينالىق ساقتاندىرۋ جۇيەسىندەگى جاڭا "Qalqan" پلاتفورماسى قىزىقتىرۋى مۇمكىن. الەۋمەتتىك مەديسينالىق ساقتاندىرۋ قورىنىڭ (ءامسق) باسشىسى گۇلميرا سابدەنبەك بۇل جاڭا جۇيەنىڭ نە ءۇشىن قاجەت ەكەنىن جانە ونىڭ جۇمىسى تۋرالى تولىق اقپارات بەردى.

بۇل تۋرالى Infohub.kz اقپارات اگەنتتىگى حابارلايدى.

"Qalqan" – جاڭا جۇيە ەمەس، دامىعان ينفراقۇرىلىم

ءامسق باسشىسىنىڭ ايتۋىنشا، "Qalqan" بۇرىننان بار جۇيەلەردىڭ ۇستىنە جاڭادان قوسىلاتىن بولەك جۇيە ەمەس. بۇل – قوردىڭ قازىرگى سيفرلىق ينفراقۇرىلىمىن دامىتۋ جانە ونى قارجى مينيسترلىگى قولدانىپ جۇرگەن زاماناۋي تەحنولوگيالىق پلاتفورماعا كوشىرۋ.

"بۇل پلاتفورمانى تاڭداۋ سەبەبى – وندا بۇرىننان بار تەحنولوگيالىق شەشىمدەر بار، قارجى مينيسترلىگىمەن ينتەگراسيالاۋ مۇمكىندىگى كەڭ جانە جاڭا ينفراقۇرىلىمسىز قاجەتتى فۋنكسيالاردى تەزىرەك ىسكە اسىرۋعا مۇمكىندىك بەرەدى"، – دەپ جازدى گۇلميرا سابدەنبەك ءوزىنىڭ الەۋمەتتىك جەلى پاراقشاسىندا.

قوسىمشا شىعىن بولمايدى

پلاتفورمانى قۇرۋ ءۇشىن قوسىمشا قارجى قاجەت دەگەن اقپارات شىندىققا جاناسپايتىنىن دا باسشى راستادى. ""Qalqan" پلاتفورماسىن قۇرۋ مەديسينالىق ساقتاندىرۋ جۇيەسى ءۇشىن قوسىمشا شىعىنسىز جۇزەگە اسىرىلادى"، – دەپ اتاپ ءوتتى ول.

"Qalqan" – مەديسينالىق جۇيە ەمەس

گۇلميرا سابدەنبەكتىڭ ايتۋىنشا، "Qalqan" – بۇل مەديسينالىق اقپاراتتىق جۇيە ەمەس، Damumed جانە باسقا دا مەديسينالىق قىزمەتتەردى الماستىرمايدى. ونىڭ نەگىزگى ماقساتى – قارجى اعىندارىنىڭ اشىقتىعىن قامتاماسىز ەتۋ، كورسەتىلگەن قىزمەتتەردى تەكسەرۋ جانە مىندەتتى الەۋمەتتىك مەديسينالىق ساقتاندىرۋ قاراجاتىنىڭ ءتيىمدى جۇمسالۋىن باقىلاۋ.

بۇل پلاتفورما وپەراسيالاردى ەسەپكە الۋدان شىعىستاردى باسقارۋعا جانە ولاردىڭ تيىمدىلىگىن ارتتىرۋعا باعىتتالعان سيفرلاندىرۋدىڭ كەلەسى دەڭگەيىنە ءوتۋدى بىلدىرەدى. جاڭا پلاتفورما دەرەكتەردى بىرىكتىرىپ، ەسەپ ايىرىسۋلاردىڭ اشىقتىعىن ارتتىرىپ، قاراجاتتىڭ قوزعالىسىن تولىق باقىلاۋعا مۇمكىندىك بەرەدى.

ءار تەڭگەنىڭ ەسەبى

"Qalqan" پلاتفورماسىنىڭ باستى مىندەتى – ءاربىر تولەنگەن قىزمەتتىڭ راستالعانىن، ال ءامسق-نىڭ ءاربىر تەڭگەسىنىڭ نەگىزدەلگەنىن جانە مەديسينالىق كومەككە باعىتتالعانىن قامتاماسىز ەتۋ. بۇل جۇيە مەديسينا سالاسىنداعى قارجىلىق اشىقتىقتى ارتتىرىپ، قاراجاتتىڭ ءتيىمدى پايدالانىلۋىنا جاعداي جاسايدى.