InfoHub Logo

ەلىمىزدىڭ مەكتەپ باسقارۋ جۇيەسىندە كادر تاپشىلىعى بايقالادى. وقۋ-اعارتۋ ءمينيسترى جۇلدىز سۇلەيمەنوۆانىڭ ايتۋىنشا، قازىرگى تاڭدا رەسپۋبليكا بويىنشا 490 مەكتەپ ديرەكتورىنىڭ ورنى بوس.

بۇل تۋرالى مينيستر وڭىرلىك ءبىلىم باسقارمالارى باسشىلارىمەن وتكەن القا وتىرىسىندا مالىمدەدى. ديرەكتور جەتىسپەۋشىلىگى اسىرەسە سولتۇستىك قازاقستان، اقمولا، شىعىس قازاقستان جانە قاراعاندى وبلىستارىندا ايقىن سەزىلەدى.

ۇمىتكەرلەردىڭ تەك 21%-ى عانا تالاپقا ساي

كادر تاپشىلىعىنىڭ نەگىزگى سەبەبى – ۇمىتكەرلەردىڭ باسقارۋشىلىق قۇزىرەتىنىڭ جەتكىلىكسىزدىگى. 2025 جىلى وتكىزىلگەن تەستىلەۋ ناتيجەسى بويىنشا، مەكتەپ ديرەكتورى لاۋازىمىنا ۇمىتكەرلەردىڭ تەك 21 پايىزى عانا سىناقتان ءساتتى وتكەن. بۇل ءار بەس كانديداتتىڭ تورتەۋىنىڭ تالاپقا ساي كەلمەگەنىن كورسەتەدى.

مينيسترلىك باسقا وڭىرلەردەن تاجىريبەلى مەنەدجەرلەردى تارتۋ مۇمكىندىگىن قاراستىرىپ جاتىر. ءمينيستردىڭ سوزىنشە، باسقارۋداعى السىزدىك ءبىلىم ساپاسىنا، مۇعالىمدەر اراسىنداعى كاسىبي احۋالعا جانە مەكتەپ ىشىندەگى كليماتقا تىكەلەي اسەر ەتەدى.

فورمالدى ەسەپكە ەمەس، ناتيجەگە باسىمدىق بەرىلەدى

القا وتىرىسىندا مينيستر فورمالدى ەسەپكە نەگىزدەلگەن ءتاسىلدى سىنعا الدى. «بىزگە قاعاز جۇزىندەگى كورسەتكىش ەمەس، وقۋشى ءبىلىمىنىڭ ناقتى ءوسۋى كەرەك. شىنايى ناتيجەگە تەك اشىق تالقىلاۋ مەن بىرلەسكەن شەشىم ارقىلى جەتەمىز»، – دەدى مينيستر.

ديرەكتور لاۋازىمى – ۋاقىتشا ميسسيا

بۇعان دەيىن مينيستر مەكتەپ ديرەكتورلارىن ەكى وقۋ جىلىنا عانا تاعايىنداۋ تۋرالى باستاما كوتەرگەن بولاتىن. بۇل ۇسىنىس قوعامدا قىزۋ پىكىرتالاس تۋدىردى. مينيستر ءوز ۇستانىمىن ناقتىلادى: «مەكتەپ ديرەكتورى – ءومىر بويى وتىراتىن ورىنتاق ەمەس. بۇل – بەلگىلى ءبىر مەرزىمگە جۇكتەلەتىن باسقارۋشىلىق ميسسيا».

جاڭا ءتارتىپ بويىنشا، ديرەكتور العاشقىدا 2 وقۋ جىلىنا تاعايىندالادى. جۇمىسى وڭ باعالانسا، وكىلەتتىگى تاعى 2 جىلعا ۇزارتىلۋى مۇمكىن. الايدا، ءبىر مەكتەپتى 4 وقۋ جىلىنان ارتىق باسقارۋعا رۇقسات ەتىلمەيدى. بۇل وزگەرىستەر مەكتەپ باسقارۋ جۇيەسىنە جاڭا سەرپىن بەرىپ، جاۋاپكەرشىلىك پەن تيىمدىلىكتى ارتتىرۋعا باعىتتالعان.