InfoHub Logo

قازاقستان مەكتەپتەرىندەگى مۇعالىمدەردى اتتەستاسيالاۋدىڭ جاڭا ەرەجەلەرى قوعامدا قىزۋ تالقىلانىپ جاتىر. وسى ورايدا، بەلسەندى پەداگوگ ايمان ساعيدۋللا وقۋ-اعارتۋ ءمينيسترى جۇلدىز سۇلەيمەنوۆاعا ۇندەۋ جولداپ، جۇيەدەگى كەمشىلىكتەردى اشىق ايتتى.

بۇل تۋرالى Infohub.kz اقپارات اگەنتتىگى حابارلايدى.

پەداگوگتىڭ ايتۋىنشا، بىرنەشە اي بويى جۇمىس توبىندا بولعان مۇعالىمدەردىڭ ءوزى جاڭا وزگەرىستەردەن حابارسىز قالىپ وتىر. ايمان ساعيدۋللا اتتەستاسيا كەزىندە تالاپ ەتىلەتىن اشىق ساباقتاردىڭ فورمالدىلىققا اينالعانىن، بۇل "شوۋ-ساباقتاردىڭ" ءمۇعالىمنىڭ ۋاقىتىن عانا ەمەس، وقۋشىلاردىڭ ءبىلىم الۋىنا دا كەرى اسەرىن تيگىزەتىنىن العا تارتتى.

"شىندىقتىڭ قانىن جالاعانىمىز دۇرىس ەدى"

ايمان ساعيدۋللا ءوز سوزىندە مۇعالىمدەردىڭ اتتەستاسيادان ءوتۋ ءۇشىن "شوۋ-ساباقتار" كورسەتىپ، ۋاقىتتى بوسقا وتكىزىپ جاتقانىن سىنعا الدى. "وتىرىكتىڭ مايىن ىشكەنشە، شىندىقتىڭ قانىن جالاعانىمىز دۇرىس ەدى. ءبىر وتىرىكتەن قۇتىلا الماي جۇرگەندە ەكىنشى وتىرىك. جۇمىس توبىنان شىعىپ كەتكەنىم جاقسى بولدى. ايتپەسە وقۋشىلاردىڭ كوز جاسىنا قالار ەدىم"، - دەپ جازدى ول.

باعالاۋ جۇيەسىنە كۇمان

پەداگوگ سونىمەن قاتار، قازىرگى باعالاۋ جۇيەسىنىڭ، اتاپ ايتقاندا، توقساندىق جانە جىلدىق باقىلاۋ (بجب مەن تجب) ناتيجەلەرىنىڭ شىنايىلىعىنا دا كۇمان كەلتىردى. ول پورتفوليو مەن قوسىمشا قۇجاتتاردى الىپ تاستاپ، ونىڭ ورنىنا پاندىك تەستتى ساقتاپ قالۋدى ۇسىندى. "مەكتەپ باعدارلاماسىنا نەگىزدەلگەن تەستتى ءبىلىمى بار مۇعالىمدەردىڭ ءبارى تاپسىرا الادى. ال 50 سۇراقتان قاشاتىن مۇعالىمگە 140 سۇراقتىق تەستكە وقۋشى دايىنداۋدى تاپسىرۋ – ورىنسىز"، - دەپ ەسەپتەيدى ول.

ايمان ساعيدۋللا مينيسترلىكتى اتتەستاسيا تالاپتارىن قايتا قاراپ، مۇعالىمدەرگە ارتىق جۇكتەمە تۇسىرمەيتىن ءتيىمدى جۇيە قالىپتاستىرۋعا شاقىردى.