InfoHub Logo

مەملەكەت باسشىسى قاسىم-جومارت توقايەۆ قارجى مونيتورينگى اگەنتتىگىنىڭ (قما) ءتوراعاسى جانات ەليمانوۆتى قابىلدادى. كەزدەسۋدە اگەنتتىكتىڭ اتقارعان جۇمىستارى مەن الداعى كەزەڭگە ارنالعان مىندەتتەرى باياندالدى.

بۇل تۋرالى Infohub.kz اقپارات اگەنتتىگى حابارلايدى.

مەملەكەتتىك قاراجاتتىڭ ءتيىمسىز جۇمسالۋى

جانات ەليمانوۆتىڭ ايتۋىنشا، بيۋدجەت شىعىستارىن باقىلاۋ بارىسىندا مال شارۋاشىلىعى سالاسىنداعى سۋبسيديالاردىڭ ءتيىمسىز قولدانىلۋىنا قاتىستى 30 ميلليارد تەڭگە كولەمىندەگى تاۋەكەلدەر انىقتالعان. سونداي-اق، عىلىمي زەرتتەۋلەر مەن عىلىمي-تەحنيكالىق قىزمەت ناتيجەلەرىن كوممەرسيالاندىرۋعا بولىنگەن گرانتتار ەسەبىنەن 10 ميلليارد تەڭگەدەن استام قارجىنىڭ ىسىراپ ەتىلگەنى تۋرالى بەلگىلەر تابىلدى.

قارجىلىق پيراميدالار مەن الاياقتىق

مەديسينالىق ساقتاندىرۋ قورىنىڭ (وسمس) قاراجاتىن جىمقىرۋ فاكتىلەرى بويىنشا 14 سوتقا دەيىنگى تەرگەۋ باستالدى. قۇرىلىس كەزىندە 5،3 ميلليارد تەڭگەنى جىمقىرۋ بويىنشا 21 قىلمىستىق ءىس تەرگەلۋدە. الاياقتىقپەن كۇرەس سالاسىندا 17 قارجىلىق پيراميدا جويىلىپ، بانكتەر مەن بايلانىس وپەراتورلارى اتىنان ارنايى قۇرىلعىلاردى پايدالانىپ، جاپپاي فيشينگتىك SMS-حابارلامالار تاراتقان توپتىڭ ارەكەتى اشكەرەلەندى. 3،7 مىڭ الاياقتىق سايت پەن 25 مىڭنان استام ادامدى بىرىكتىرگەن 22 توپتىق چات جابىلدى. 400-دەن استام نومينالدى قۇرىلىس كومپانياسىنا ءبىرىنشى ساناتتاعى ليسەنزيالاردى زاڭسىز الۋىنا جول بەرىلمەدى.

قىلمىستىق كىرىستەردى جىلىستاتۋمەن كۇرەس

قما باسشىسى قىلمىستىق كىرىستەردى جىلىستاتۋمەن كۇرەس بويىنشا دا مالىمەت بەردى. اتاپ ايتقاندا، جالعان تۇلعالار اشقان 68 مىڭنان استام كارتا ارقىلى جالپى اينالىمى 13 ميلليارد تەڭگەدەن اسقان «دروپ-كارتالاردى» پايدالانۋ فاكتىلەرى بويىنشا 14 سوتقا دەيىنگى تەرگەۋ باستالدى. جالعان كومپانيالار مەن قۇجاتتاردى قولدانۋ ارقىلى شامامەن 13 ميلليارد تەڭگە زالال كەلتىرۋ فاكتىسى بويىنشا 23 سوتقا دەيىنگى تەرگەۋ جۇرگىزىلۋدە. قارجىلىق پيراميدالار مەن ونلاين-كازينولاردان تۇسكەن تابىستاردى جىلىستاتقان ءۇش «كولەڭكەلى» كريپتوايىرباستاۋشىنىڭ قىزمەتى توقتاتىلدى. كريپتوۆاليۋتامەن زاڭسىز اينالىساتىن 483 ونلاين-سەرۆيس سىلتەمەسىنە قولجەتىمدىلىك شەكتەلدى.

مەملەكەت باسشىسىنىڭ تاپسىرمالارى

مەملەكەت باسشىسى اگەنتتىكتىڭ نەگىزگى باعىتتارى بويىنشا ءبىرقاتار تاپسىرما بەردى. بۇعان دەيىن پرەزيدەنت عىلىمدى قارجىلاندىرۋدا قاتاڭ ءتارتىپ پەن قاراجاتتى جۇمساۋدا ناقتى باسىمدىقتار بولۋى كەرەكتىگىن اتاپ وتكەن بولاتىن. ول سوڭعى التى جىلدا عىلىمعا بولىنگەن قارجىنىڭ ەسەلەپ ارتقانىمەن، ودان ناقتى ناتيجەلەردىڭ ءالى كورىنبەيتىنىن ايتتى.