InfoHub Logo

جۋرناليست بوتاگوز وماروۆانىڭ «كورىنەۋ جالعان اقپارات تاراتتى» دەگەن ايىپپەن ءۇيقاماققا الىنۋى قوعامدا ۇلكەن رەزونانس تۋدىردى. بۇل وقيعا الەۋمەتتىك جەلىلەر مەن اقپارات قۇرالدارىندا قىزۋ تالقىلانىپ، ءسوز بوستاندىعى، جۋرناليست جاۋاپكەرشىلىگى جانە ازاماتتاردىڭ ار-نامىسى مەن بەدەلىن قورعاۋ ماسەلەسىن قايتا كۇن تارتىبىنە شىعاردى، دەپ حابارلايدى infohub اقپارات اگەنتتىگى.

وسى ۋاقىتقا دەيىن قوعامدا نەگىزىنەن ءجۋرناليستىڭ ءوزى مەن ونى قولداۋشىلاردىڭ پىكىرى كەڭىنەن تاراسا، ەندى داۋلاسۋشى ەكىنشى تاراپ تا ءوز ۇستانىمىن جاريا تۇردە جەتكىزدى.

بوتاگوز وماروۆاعا قارسى ارىز تۇسىرگەن «ۆد ينجينيرينگ» كومپانياسىنىڭ قۇرىلتايشىسى ازامات ۇسىمبەكوۆ Ulysmedia.kz باسىلىمىنا بەرگەن سۇحباتىندا بۇل ءىستى ءجۋرناليستى قۋدالاۋ ەمەس، ءوزىنىڭ ىسكەرلىك بەدەلىن قورعاۋ ارەكەتى دەپ باعالايتىنىن ايتتى.

«ءقازىر قوعامدا مەنى ءجۋرناليستى سوتقا سۇيرەگەن ادام رەتىندە كورسەتىپ جاتىر. ءبىراق مەنىڭ ماقساتىم ەشكىمدى قۋدالاۋ ەمەس. مەن تەك ءوزىمنىڭ اتىمدى، بەدەلىمدى جانە كاسىبىمدى قورعاۋعا تىرىسىپ ءجۇرمىن»، – دەدى كاسىپكەر سۇحبات بارىسىندا.

كومپانيا اتاۋى قوعامعا ءدال وسى داۋدان كەيىن كەڭىنەن تانىلا باستادى. بۇعان دەيىن الەۋمەتتىك جەلىلەر مەن ءبىرقاتار مەديادا بوتاگوز وماروۆانى قولدايتىن ماتەريالدار ءجيى جاريالانىپ، ءىستى ءسوز ەركىندىگىنە قىسىم رەتىندە باعالاعان پىكىرلەر باسىم بولدى. ال جۋرناليست ءۇيقاماققا الىنعاننان كەيىن قوعامدا «ۆد ينجينيرينگ» كومپانياسىنىڭ قىزمەتى، ونىڭ قۇرىلتايشىلارى جانە ميللياردتاعان تەڭگەنىڭ ينفراقۇرىلىمدىق جوبالارىن قالاي الىپ جۇرگەنى تۋرالى ءتۇرلى زەرتتەۋلەر مەن بولجامدار كوبەيدى.

ازامات ۇسىمبەكوۆتىڭ ايتۋىنشا، كومپانيا بىرنەشە جىل بويى قۇرىلىس جانە ينجەنەرلىك جوبالارمەن اينالىسىپ كەلەدى. ول بيزنەستىڭ قالىپتاسۋى وڭاي بولماعانىن ايتىپ، ءتۇرلى تەكسەرىس پەن كۇماننىڭ اراسىندا جۇمىس ىستەۋگە تۋرا كەلگەنىن جەتكىزدى.

«الەۋمەتتىك جەلىدە نەمەسە كەيبىر ماتەريالداردا ايتىلعان اقپاراتتار ءبىزدىڭ كومپانيانىڭ بەدەلىنە اسەر ەتتى. سەرىكتەستەرىمىز سۇراق قويا باستادى. وتباسىما دەيىن قىسىم سەزىندى. وسىنداي جاعدايدا زاڭ اياسىندا ءوز قۇقىعىمدى قورعاۋعا ءماجبۇر بولدىم»، – دەدى ول.

كاسىپكەردىڭ سوزىنشە، قوعامدا تاراعان كەيبىر مالىمەتتەر شىندىققا سايكەس كەلمەيدى جانە ولاردى تەكسەرمەي جاريالاۋ ۇلكەن سالدارعا الىپ كەلۋى مۇمكىن.

«جۋرناليستيكا – ۇلكەن جاۋاپكەرشىلىك. كەز كەلگەن اقپارات ناقتى دالەلگە سۇيەنۋى كەرەك دەپ ويلايمىن. ەگەر ادامنىڭ ابىرويىنا نۇقسان كەلسە، ونىڭ دا قورعانۋعا قۇقىعى بار»، – دەدى ۇسىمبەكوۆ.

سونىمەن قاتار سۇحبات بارىسىندا ول كومپانيانىڭ قىسقا مەرزىم ىشىندە ءىرى ينفراقۇرىلىمدىق جوبالارعا شىعۋىنا قاتىستى سۇراقتارعا دا جاۋاپ بەردى. ونىڭ ايتۋىنشا، بارلىق كەلىسىمشارتتار زاڭ اياسىندا جاسالعان جانە مەملەكەتتىك ساتىپ الۋ راسىمدەرىنەن وتكەن.

ال بوتاگوز وماروۆا قازىرگى تاڭدا تەرگەۋ شەڭبەرىندەگى شەكتەۋلەرگە بايلانىستى جاعدايعا اشىق پىكىر بىلدىرە الماي وتىر. سوندىقتان قوعامدا بۇل ىسكە قاتىستى ءبىرجاقتى پىكىر قالىپتاسىپ كەتكەنىن ايتقاندار دا بار.

الەۋمەتتىك جەلىلەردە اتالعان ىسكە بايلانىستى پىكىر ەكىگە بولىنگەن. ءبىر تاراپ جۋرناليستەرگە قىسىم كورسەتىلىپ جاتىر دەپ ەسەپتەسە، ەندى ءبىرى جالعان اقپارات ءۇشىن جاۋاپكەرشىلىك بولۋى كەرەك دەگەن ۇستانىمدى العا تارتادى. كەيبىر مەديا ساراپشىلار بۇل جاعداي قازاقستانداعى ءسوز بوستاندىعى مەن قۇقىقتىق مادەنيەتكە قاتىستى ماڭىزدى تەستكە اينالعانىن ايتۋدا.

«بۇل ءىس ءبىر عانا جۋرناليست پەن كاسىپكەر اراسىنداعى داۋ ەمەس. مۇندا قوعام ءۇشىن ماڭىزدى بىرنەشە ماسەلە قاتار تۇر: جۋرناليستيكانىڭ جاۋاپكەرشىلىگى، اقپاراتتىڭ انىقتىعى جانە ازاماتتاردىڭ ءوز بەدەلىن قورعاۋ قۇقىعى»، – دەپ جازۋدا جەلى قولدانۋشىلارى.

وسىلايشا بوتاگوز وماروۆاعا قاتىستى ءىس قوعامداعى ەڭ كوپ تالقىلانعان تاقىرىپتاردىڭ بىرىنە اينالىپ، مەديا كەڭىستىكتەگى جاۋاپكەرشىلىك پەن ەركىندىك اراسىنداعى تەپە-تەڭدىك تۋرالى پىكىرتالاستى قايتا كۇشەيتتى.