InfoHub Logo

اتىراۋ وبلىسىنىڭ تۇرعىنى رەسەيدەگى ازاماتتىق ايەلىنىڭ ميلليون دوللارلىق مۇراسى بار دەگەن سىلتاۋمەن بىرنەشە قاراعاندىلىقتى الداپ سوققان. ول اقشانى ەسەلەپ قايتارىپ بەرەمىن دەپ ۋادە ەتكەن.

بۇل تۋرالى Infohub.kz اقپارات اگەنتتىگى حابارلايدى.

سوت ماتەريالدارىنا سايكەس، الاياق ازاماتتىق ايەلىنىڭ رەسەيدەگى اتا-اناسى قايتىس بولعاننان كەيىن وعان ميلليون دوللارعا جۋىق مۇرا قالعانىن ايتقان. الايدا، قۇجاتتاردى رەسىمدەۋ، ادۆوكاتتار مەن نوتاريۋستاردىڭ قىزمەتىنە اقى تولەۋ ءۇشىن 250 مىڭ دوللار قاجەت ەكەنىن العا تارتقان.

سەنىمگە يە بولىپ، اقشا العان

بۇل وقيعاعا ءبىرىنشى بولىپ 2022 جىلى كۇدىكتىمەن تانىسقان قاراعاندىلىق سەنگەن. ول ءوزىن تابىستى كاسىپكەر رەتىندە تانىستىرىپ، بۇعان دەيىن ونىڭ سالعان اقشاسىن قايتارىپ بەرگەندىكتەن، سەنىم ۇيالاتقان.

مۇرا تۋرالى اڭگىمە بولعاندا، قاراعاندىلىق ءوزى اقشا سالۋعا بەل بۋادى. 2023 جىلدىڭ تامىزى مەن 2024 جىلدىڭ اقپانى ارالىعىندا ول تانىسىنا 105 ميلليون تەڭگە بەرگەن. بۇل اقشا ءۇشىن جەر تەلىمدەرىن، اۋىل شارۋاشىلىعى تەحنيكاسىن، مۇلىكتەرىن جانە پاتەرىن ساتقان.

دوستارى دا الدانىپ قالدى

كەيىننەن قاراعاندىلىق بۇل مۇمكىندىكتى دوستارىنا دا ايتىپ، ولار دا «ءتيىمدى جوباعا» قاتىسۋعا شەشىم قابىلداعان. ولاردىڭ ءبىرى پاتەرىن نارىقتىق باعادان تومەن باعالاپ ساتقان. سوت دەرەكتەرى بويىنشا، مۇنى اقشانى تەز جيناۋ قاجەتتىگىمەن تۇسىندىرگەن. قالعان سومانى كەيىن ەسەلەپ قايتارىپ بەرۋگە ۋادە ەتكەن. سودان كەيىن ەر ادام بىرنەشە نەسيە راسىمدەپ، كەيىن Range Rover كولىگىن كەپىلگە قويعان. ونىڭ جالپى شىعىنى 38،5 ميلليون تەڭگەگە جەتكەن.

تاعى ءبىر جابىرلەنۋشى بىردەن بىرنەشە بانكتەن نەسيە العان. اقشانى تانىسى ارقىلى الاياققا اۋدارعان. كەيىن ادۆوكات اقىسىن تولەۋ ءۇشىن قوسىمشا قاراجات جىبەرۋدى سۇراعان. ناتيجەسىندە ول 10 ميلليون تەڭگەدەن استام قاراجاتتان ايىرىلعان. ءىس بويىنشا جالپى شىعىن 153 ميلليون تەڭگەدەن اسقان.

سوت ۇكىمى

قىلمىستىق ءىس قاراعاندىنىڭ قازىبەك بي اۋداندىق سوتىندا قارالدى. سوتتالۋشى جابىرلەنۋشىلەردەن اقشا العانىن جوققا شىعارمادى، ءبىراق ءوزىنىڭ كىناسىن مويىندامادى. ول الاياقتىق ەمەس، ينۆەستيسيالىق جوبا تۋرالى بولعانىن ايتتى. ونىڭ ايتۋىنشا، قاراجات ازاماتتىق ايەلى ارقىلى شەتەلدىك قورعا باعىتتالعان، ال داۋ ازاماتتىق-قۇقىقتىق سيپاتتا.

الايدا، سوت مۇرا تۋرالى وقيعانىڭ ويدان شىعارىلعانىنا كوز جەتكىزدى. ۇكىمدە جابىرلەنۋشىلەرگە تابىستىڭ تەز جانە ۇلكەن بولاتىنى تۋرالى ۋادەلەر بەرىلىپ، الداۋ مەن سەنىمدى تەرىس پايدالانۋ ارقىلى اقشا العانى ايتىلعان.

سوتتالۋشى بىرنەشە جابىرلەنۋشىگە قاتىستى اسا ءىرى كولەمدە الاياقتىق جاساعانى ءۇشىن كىنالى دەپ تانىلىپ، التى جىلعا باس بوستاندىعىنان ايىرىلدى. سونداي-اق، سوت جابىرلەنۋشىلەردىڭ پايداسىنا تيىسىنشە 105 ميلليون، 38،5 ميلليون جانە 9،7 ميلليون تەڭگە ءوندىرىپ الۋ تۋرالى قاۋلى ەتتى.

ۇكىم زاڭدى كۇشىنە ەنگەن جوق.