InfoHub Logo

قازاقستان مۇعالىمدەرىنىڭ ەڭبەك جاعدايى مەن جالاقىسى بويىنشا الەمدىك كوشباسشىلار قاتارىنا قوسىلعانى تۋرالى وقۋ-اعارتۋ مينيسترلىگىنىڭ مالىمەتى كوپشىلىكتى تاڭ قالدىردى. مينيسترلىك مالىمەتىنشە، 2018 جىلى مۇعالىمدەردىڭ 39%-ى عانا جالاقىسىنا قاناعاتتانسا، 2024 جىلى بۇل كورسەتكىش 71%-عا جەتكەن. ءتىپتى، پەداگوگتەردىڭ 95%-ى جۇمىسىنا كوڭىلى تولىق تولاتىنىن ايتىپ، كاسىبي قاناعاتتانۋدىڭ جوعارى دەڭگەيىن كورسەتىپتى. سوڭعى جىلدارى مەكتەپ مۇعالىمدەرىنىڭ جالاقىسى ەكى ەسە وسكەن دەلىنەدى.

بۇل تۋرالى Infohub.kz اقپارات اگەنتتىگى حابارلايدى.

رەسمي مالىمەت پەن شىندىق

الايدا، مۇعالىمدەردىڭ وزدەرى بۇل مالىمەتتەرگە كۇمانمەن قارايدى. 20 جىلدىق ءوتىلى بار، "پەداگوگ-شەبەر" اتاعى بار گۇلنار ەسەنجول قىزىنىڭ ايتۋىنشا، ونىڭ جالاقىسى 2021 جىلى 380 مىڭ تەڭگە (شامامەن 909 دوللار) بولسا، ءقازىر 520 مىڭ تەڭگەگە (شامامەن 1،1 مىڭ دوللار) دەيىن وسكەن. بۇل ءوسىم تاجىريبەسى مەن بىلىكتىلىگىنە بايلانىستى ەكەنىن ايتادى. ال وزگە ارىپتەستەرىنىڭ جالاقىسى 500 دوللاردان دا اسپايتىنىن جەتكىزدى.

ساراپشىلاردىڭ تالداۋى

«ءبىرىنشى كرەديتتىك بيۋرو» ساراپشىلارىنىڭ زەرتتەۋى بويىنشا، پەداگوگتەردىڭ ناقتى جالاقىسى 2023 جىلدان بەرى ينفلياسياعا بايلانىستى تومەندەپ كەلەدى. وتكەن جىلى ءبىلىم بەرۋ قىزمەتكەرلەرىنىڭ ايلىعى ورتا ەسەپپەن 322 مىڭ تەڭگەدەن ءسال اسقانىمەن، 12،3% ينفلياسيانى ەسكەرگەندە، بۇل ءوسىم باعانىڭ ءوسۋىن وتەي الماعان.

حالىقارالىق رەيتينگتەگى ورنىمىز

Visasam پورتالىنىڭ مالىمەتىنشە، ءومىر ءسۇرۋ قۇنى مەن سالىقتاردى ەسكەرگەندە، قازاقستان مۇعالىمدەرىنىڭ جالاقىسى بويىنشا 52 ەلدىڭ ىشىندە سوڭعى ورىندارعا جاقىن ورنالاسقان. بارلىق سالىقتار مەن ينفلياسيانى ەسەپتەگەندە، قازاقستاندىق مۇعالىمدەر قولىنا ورتا ەسەپپەن شامامەن 486 دوللار الادى. بۇل كورسەتكىش بويىنشا تەك نيكاراگۋا، الجير، قىرعىزستان سياقتى ەلدەر عانا ارتتا قالىپ وتىر.

سالىستىرمالى تۇردە، شۆەيساريادا مۇعالىمدەر ايىنا 6240 دوللار، گەرمانيادا 4390 دوللار، جاپونيادا 4000 دوللار، ال اقش-تا ورتا ەسەپپەن 3900 دوللار جالاقى الادى.

زاڭناما مەن جۇكتەمە

ءماجىلىس دەپۋتاتى يرينا سميرنوۆانىڭ ايتۋىنشا، مۇعالىمدەردىڭ جالاقىسىنىڭ تومەندەۋىنە بىرنەشە فاكتور اسەر ەتەدى. سونىڭ ءبىرى – مۇعالىمدەرگە 1،5 ستاۆكادان ارتىق ساباق بەرۋگە تىيىم سالىنۋى. بۇرىن مۇعالىمدەر كوبىرەك تابىس تابۋ ءۇشىن 10-12 ساعاتقا دەيىن ساباق بەرە الاتىن بولسا، ەندى بۇل مۇمكىندىك شەكتەلگەن. بۇل كەيبىر مۇعالىمدەردىڭ ايىنا 100 مىڭ تەڭگەگە دەيىن تابىستان قاعىلۋىنا اكەپ سوقتىرعان.

سونىمەن قاتار، كەيبىر مۇعالىمدەردىڭ بۇرىن العان ساناتتارىن راستاي الماۋى دا تابىسىنىڭ ازايۋىنا سەبەپ بولعان. اتتەستاسيا پروسەدۋراسىنىڭ كۇردەلىلىگى دە بۇل ماسەلەنى ۋشىقتىرا تۇسكەن.